Wir Ratlewte vnd Burger gemeinlichen der Stat zu Werben Bekennen fur vns alle vnser erben vnd nachkomen Burger zu Werben vnd fur dieselben stat ewiclich vnd tun kunt offenlich mit
disem briue allen den die yn sehent oder horent lesen Wann wir furmals gesworen vnd gehuldet haben erblich vnserm liben gnedigen herren keyser karls sonen kunig Wenczlawen von Beheim vnd
seinen Brudern vnd ir aller erben vnd erbes erben als markgrauen zu Brandemburg vnsern rechten erbherren Vnd ob die alle nicht weren Markgrauen Johansen von Merhern des egenanten vnsers
herren des keysers Bruder seinen erben vnd erbes erben als das in andern vnsern briuen die wir yn daruber gegeben haben volkomenlicher ist begriffen Vnd wann ouch nu der egenant vnser herre der
keyser sunderlichen betracht hat wie er die Marken zu Brandemburg mit iren landen steten vnd lewten die furmals lange zeit mit manigualdigem krieg vorderbet vnd beschedigt ist in ewigen frid
vnd selikeit seczen muge Vnd vns zu sunderlichen gnaden gegunst hat vnd gan daz wir vnd die egenanten Marke zu Brandemburg von dem kunigrich vnd lande zu Beheim der Markgraffschafft zu
lusicz den Herczogtumen zu Bresslaw zu der swidnicz vnd zu dem Jawr die zu dem kunigriche vnd zu der kronen zu Beheim gehoren Vnd dasselb kunigrich hinwider von vns vnd der Marken ewign
schucz hilffe vnd rate haben mugen Vnd ouch daz wir vnd die Marken zu Brandemburg vns zu demselben kunigriche vnd lande zu Beheim in ewige eynunge sasse vnd fride seczen mugen Dauon zu
eren vnd dinste dem heiligen Romischen Reiche durch ewigen fride besserung vnd nuczes willen vnser vnd der Marken zu Brandemburg die wir in disen sachen kuntlich erkant haben vnd eigent=
lich erkennen So haben wir mit wolbedachtem mute gutem Rate vnd von vnserm rechten wissen fur vns vnser erben vnd nachkomen ewiclichen vnd die egenante stat zu Werben mit willen
vnd volbort des egenanten vnsers herren des keysers als eines obristen lehenherren der egenanten Marken zu Brandemburg dem vorgenanten vnserm herren kunig Wenczlaw allen seinen Brudern
vnd ir aller erben erbes erben vnd nachkomen die nu sein vnd hernach geboren werden kunige zu Beheim Vnd ob die nicht weren dem obgenanten Markgrauen Johansen von Merhern allen seinen
erben vnd erbes erben als Markgrauen zu Brandemburg vnsern rechten Erbherren gelobt vnd gesworen geloben vnd sweren in guten trewen on alles geuerde daz wir ewiclichen bei dem kunigriche
vnd lande zu Beheim bleiben wollen vnd sullen Vnd wir sullen vnd wollen vns dauon nymmer scheiden oder scheiden lassen durch dheinerlei stucken oder sache willen in dheinenweis Vnd were es sache
daz vnsers herren kunig Wenczlawes zu Beheim Bruder erben oder Vettern oder derselben erben vnd nachkomen die nu sein oder in kunftigen zeiten werden vnser herren Markgrauen zu Brandem=
burg ir weren einer oder mere vns von dem kunigriche vnd lande zu Beheim dem kunige vnd andern seinen Brudern Vettern erben vnd erbes erben die in zeiten vnser herren Markgrauen zu Brand=
burg sein vnd werden scheiden wolten Oder ob sie die Marken zu Brandemburg zumale oder ir ein teile von dem lande der Marken vorgeben verkauffen vorseczen vorwechseln oder empfremden
wolten So sullen wir obgenanten Ratlewte Burger vnd stat dem oder denselben nichtes pflichtig oder bunden sein von huldungen wegen noch sust in dheinenweis Vnd den oder die fur
vnser herren nicht haben alle die weil daz sie nicht von solichen sachen lassen Sunder vns halden an den kunig von Beheim vnd an ander seine Bruder Vettern erben erbes erben vnd nach=
komen die denne vnser herren Markgrauen zu Brandemburg sein oder sein werden Vnd die sulche vorgenante scheidung vorgebunge verkauffung vorseczunge vorwechselunge oder empfrem=
dunge nicht teten Were ouch sache daz die obgenanten vnser herren kunig Wenczlaw von Beheim seine Bruder vnd ir aller erben erbes erben vnd nachkomen kunige zu Beheim vnd
Markgrauen zu Brandemburg der obgenant Markgraff Johan von Merhern seine erben vnd erbes erben Alle abesturben do got fur sei So haben wir obgenanten Ratlewte vnd Burger zu Werben
fur vns vnser erben vnd nachkomen Burger zu Werben vnd fur dieselbe stat ewiclichen gelobt vnd gesworen geloben vnd sweren von rechter wissen mit krafft diz briues in guten trewen on alles
geuerde einem iglichen kunige zu Beheim der denne in zeiten wesen vnd ist daz wir den vnd mit ym seine erben vnd nachkomen ewiclichen vnd nymand anders fur Markgrauen zu Brandemb(urg)
vnser rechte naturliche erbherren haben vnd halden sullen vnd wollen Vnd vns von von dem kunigriche zu Beheim seinen egenanten furstentumen herschefften vnd landen die darzu gehoren
nicht scheiden noch scheiden lassen sullen noch wellen in dheinenweis on alles geuerde Wenne es ouch zu sulchen schilden kumpt So sullen vns dieselben vnser Erbherren vnsere rechte briue
vnd freiheite bestetigen als ir vorfarn Markgrauen zu Brandemburg getan haben Vnd des zu ewigem vrkund vnd ganczer sicherheit haben wir vnser egenanten stat Infigel an disen briue
lassen hengen Der geben ist zu Werben nach cristus geburte drewczehenhundert Jare darnach in dem vierundsibenczigstem Jare an dem heiligen pfingest tage