Wir peter von gots vnd des heiligen stuls zu Rome gnaden Erczbischof zu meidburg bekennen vnd tun kunt offenlich
mit disem briue allen den die yn sehent oder horent lesen das wir mit wolbedachtem mute mit rate vnser getrewen
vnd mit rechter wissen ein fruntliche veste vnd stete verpuntnisse vnd eynunge gemachet vnd gelobet haben machen
vnd geloben mit disem briue mit dem Allerdurchlauchtigstem fursten vnd herren hern karl Romischem keiser zu allen ziten
merer des Ruchs vnserm liben gnedigen herren vnd mit den durchlauchtigen fursten vnd herren hern wenczlawen kunig
zu Beheim Marggrauen zu Brandemburg vnd herczogen in slesien hern sigmund vnd hern Johansen Marggrauen zu
Brandemburg desselben vnsers gnedigen herren des keisers sonen als mit Marggrauen zu Brandemburg die wil wir
leben vnd Erczbischof zu meidburg sein in aller der masse als hernach geschriben steet Czu dem ersten daz wir yn
vestiglich getrewlich vnd ernstlich beholfen vnd beigestendig sein sullen vnd wollen wider allermenniglich niemands vzgenomen
an alleine vnsern heiligen vater den pabst vnd die heilige kirchen zu Rome die sie in iren Markgraffschefften zu Bran=
demburg vnd zu lusicz vnd derselben lande herschefften steten vesten slossen burgen lehen gutern rechten freiheiten
leuten vnd iren zugehorungen wider recht angreiffen beschedigen oder irren wolten in dheinemweis in guten trewen
vnd an alles geuerde vzgenomen alleine den landen vber Oder die vns vnd vnsern landen zu leine gelegen sein Vnd
sol ouch der vorgenant vnser herre der keiser vnd seine sone zu andern vnsern landen steten vnd vesten dheiner hilfe
von wegen diser buntnisse nicht pflichtig sein denne zu den landen vnd vesten die wir iczunt in nucze vnd gewere
haben vnd die in sechsischen landen gelegen sein Vnd wir sullen ouch des vorgenanten vnsers gnedigen herren des
keisers vnd der vorgenanten seiner sone als Marggrauen zu Brandemburg zu dem rechten mechtig sein Were aber
sache daz der vorgenant vnser herre der keiser vnd seine sone mit dheinen fursten Grauen freien herren steten
rittern knechten mannen oder sust wer die weren anheben oder hielen in dheinen krieg des oder der wir zu dem
rechten mechtig weren So sullen wir den vorgenanten dem keis(er) vnd seinen sonen als Marggrauen zu Brandemburg
nicht verpunden oder pflichtig sein wider den oder dieselben dhein hilfe zu tun dise verpuntnisse sol vnschedlich
sein den rechten vnd dem gehorsam den wir dem vorgenan(ten) vnserm herren dem keiser als einem Romischem keiser schul=
dig vnd pflichtig sein zu tun an alles geuerde Czu vrkund dicz briues versigelt mit vnserm anhangendem Insigel
Geben zu Tangermund nach Cristus geburte drewzenhundert Jare darnach in dem vier vnd sibenczigstem Jare an
dem nehsten mitwochen nach sants peters vnd pauls tage der heiligen Czwelfboten