Wir peter von gotes vnd des heilgen stuls zu Rome gnaden Erczbischoiff zu magdeburg bekennen vnd
tun kund offenlich mit disem briue allen den die yn sehent adir horent lesen das wir dem allerdurch
leuchtigisten fursten vnd herren hern karl Romischen keis(er) zu allen zeiten merer des Reichs vnsern
liebn gnedigen herren den durchleuchtigen fursten vnd herren h(er)n Wenczlawen kunig zu Beheim
Margrauen zu Brandemburg vnd herczogen in Slesien h(er)n Sigemunde vnd Johansen Margrauen
zu Brandemburg des vorgenanten vns(er)s herren Sunen globt habn vnd globn mit crafft dicz briues
das wir nicht seczn oder penden sullen od(ir) wollen nach iren landen hesten steten slossen lehenen
gutern vnd iren zugehorungen wo die gelegen sin die sie uff dysen hutigen tag in nucz vnd gewere
gehabt habn vnd auch iczunt habn in guten truwen on alles geuerde czur vrkund dicz briues ver
sigelt mit vnserm anhangendem Ingesigel Gebn zu Tangermunde nach Cristus geburte driczenhund(er)t
jare dornach in dem vierundsibenczigistem jare an dem nehsten mitwochen nach sant peters vnd
pauls tage der heilgen Czwelfboten