Wir Johan Graue zu Spanheim Symont Graue zu Spanheim vnd zu Vianden heinrich graue zu Salmen in Oysling Arnold graue zu hohenfels vnd h(er)re gerlach vlrich herre zu hinstingen vnd zu valkenberch Gilg herre zu
Rodemachen vnd zu Jaghenstein Conrad algebe von ger sladen herre zu Vrenstein Johan h(er)re zu wolden w(er)n(er) dusselburg Peter herre zu Cronenberch vnd zu der Nuwemburg ditrich van aryssembourch herre zu klerue friderich
van anylberch h(er)re zu Ham Jofrit von Cronenberch herre zu Berghe Johan h(er)re zu Brandenberch herman von Brandenberg h(er)re zu esche huwart herre zu Oter Arnold van Gymmich h(er)re zu gyoistorff Renhart von dimen
h(er)re zu deynsberch giffart schalk von lugemburg schalk h(er)re zu diespurg Gerhart Zobel h(er)re zu Bitingen wylhelm h(er)re zu Bourscheit ditrich h(er)re zu Scharpilch wilhelm h(er)re zu Bernart loymar van Gymmich h(er)re zu dudelingen
Enprecht h(er)re zu florchingen vnd Gockel h(er)re zu hoylueg Bekennen vnd tun kunt offenlich mit disem briue allen den die yn sehen oder horen lesen wanne der hochgeborn furste vnser lieber gnediger h(er)re h(er)re wenczlaw van Beheim van
gotes gnaden herczog zu lugemburg zu lymburg zu Brabant vnd marggraue des heiligen Romischen Reichs durch nucz gemach vnd selikeit derselben lande ab derselbe vnser h(er)re ane eliche semes leibes erben von diser werlde
vorscheide davor In(n) s(er) yeme suliche ordenungen mit vns(er)m rate vnd wissen gescheket vnd gemachet hat die hernach von worte zu worte geschriben steet Wir wenczlaw von Beheim van gotis genaden herczog zu lugemburg zu lym=
burg zu Brabant vnd marggraue des heiligen Romischen Reichs Bekennen vnd tun kunt offenlich mit disem briue allen den die yn sehen oder horen lesen das wir zu vnderstechen vnd bewaren gukunstigen vnfall vnd stosse
die nach vns(er)m tode ab wir ane erben elichen von vns(er)m leibe kymend sturben da got fur sey dem h(er)zogtume vnd herschafft zu lugemburg zukomen vnd erstehen mochten mit wolbedachtem mute gutem vorrate vnser vnd der
selben h(er)zogtumes zu lugemburg Barmgen edeln Rittern eynemen vnd steten eyntrechticlichen obirtagen gemachet gescheket vnd geordiniret haben machen schicken vnd ordiniren mit rechter vnser wissen in craffte dicz briues
Geschiht es das wir ane eliche erben von vns(er)m leibe kymend sturben des got nicht enwolle So sal das egenant h(er)zogtum zu lugemburg seyne manne Ritter knechte stete alle seyne herlicheit vnd angehorungen erblichen genzlich
vnd erben uff die Allerdurchluchtigsten fursten vnd h(er)ren h(er)rn Karl Romischen keiser zu allen zeiten merer des Reichs vns(er)n lieben h(er)ren vnd bruder vnd uff vns(er)n lieben h(er)ren vnd vatern h(er)rn wenczlaw Romischen kunig vnd kunige
zu Beheim seinen sone vnd uff yre erben vnd nachkomen kunige zu Beheim nemelichen den der denne kunig zu Beheim ist rechtlichen vnd erblichen geuallen vnd erben ane allirley hindernisse wanne sie von rechtem veterli=
chem stamme vnd linien rechte erben seyn nach vns In dem egenan h(er)zogtume zu lugemburg aller seyner herlicheit vnd zugehorungen ab wir sturben ane elichen erben vns(er)s leibes als davor begriffen ist wer auch sache das
wir sturben vnd nicht sone sunder tochter alleyne eyne oder mer elichen von vns(er)m leibe kymend hynder vns liessen So ist vnser ordenungen gesecze wille vnd wort das dieselben vnse tochter mit rate vnd wissen des egen(anten)
vns(er)s h(er)ren des keisers des Romischen kunigs oder yres erben oder nachkomen der denne kunig zu Beheim ist bestatet vnd beraten sulle werden Vnd dise vnse ordenunge vnd schickungen geloben in eides weise von vns(er)m
geheisse vnd gebote Barmge h(er)ren Ritter knechte amptlute vnd stete des h(er)zogtumes zu lugemburg in yren offenen besigelten briuen stete vnd vaste zu halden ane widerrede vnd ane allis geuerde Auch so haben die egen(anten) vns(er)
h(er)re vnd bruder der keiser vnd vnser vatter der Romisch kunig vnd kunig zu Beheim fur sich vnd yre erben kunige zu Beheim sunderlichen vorbuntet Ab es zu schulden kumpt das als davor begriffen ist das h(er)zogtum vnd
herlicheit zu lugemburg uff sie gefellet vnd erbet das sie denne alle amptlute Ritter knechte stete vnd vndersessen geistliche vnd werltliche desselben h(er)zogtumes vnd herlicheit zu lugemburg vnd yrer angehorun=
gen bey yren alten freihaiten gewonheiten vnd rechten beleiben lassen sullen vngehyndert vnd ane allis geuerde Auch behalden wir vns macht vns zu behelffen mit dem vorgenan h(er)zogtume zu lugemburg vnd
seinen angehorungen nach vns(er)m freyen willen als mit erblicher herschafft vnd gute ab vns des kuntliche not seyn wurde ane argelist vnd ane allis geuerde Vnd behalden auch vnser amter der kunigynnen vnd vns(er)s lieben
elichen gemahel der h(er)zogynnen von lugemburg vnd Brabant yrer beider d(er)ware witegabe vnd bellossung en die sie haben yre lebetage in dem vorgenan h(er)zogtume zu lugemburg vnd seinen angehorungen nach yn halde
vnd begriffe sulicher briue die sie doruber haben ane allis geuerde mit vrkunde dicz briues versigelt mit vns(er)m anhangenden Ingesigele dergeben ist zu lugemburg nach Cristis geburte dreiczenhundert Jare dornach in dem
Acht vnd sibenczigisten Jare des nehsten sunabends vor vns(er) frawen tage lichtmesse Dauon mit wolbedachtem mute gutem vorrate vnd rechter wissen doruff das sulichs h(er)zogtume vnd herschafft zu lugemburg vnd seyne
Zugehorungen nicht in fremde hant kome Sunder bey yrem rechten erblichen stamme von dannen sie von alters herkomen seyn besteen erben vnd beleiben vnd auch vor gukunstigem vnfalle vnd schaden werden bewaret
haben wir den vorgen(anten) vns(er)n h(er)ren dem keiser vnd vns(er)m h(er)ren h(er)rn wenczlaw Romischem kunige vnd kunige zu Beheim yren erben vnd nachkomen kunigen zu Beheim verheissen vnd gelobt verheissen vnd geloben fur
vns vnd vnse erben in guten truwen an eydes stat in craffte dicz briues Ab es zu schulden kumpt das der egenan(te) vnser herre h(er)r wenczlaw herczog zu lugemburg sturbet vnd nicht eliche erben von seinem leibe kymend
sone oder tochter hynder ym lesset das denne wir vnd vnse erben die egenan(ten) vns(er) h(er)ren den keiser seinen sone den Romischen kunig vnd kunig zu Beheim yre erben vnd nachkomen nemelichen den der denne ku=
nig zu Beheim ist fur sie von rechtem veterlichem stamme doru(n)t geborn vnd geburtig seyn fur vnse rechten naturlichen erbherren herczogen zu lugemburg vnd nyemanden anders empfahen haben vnd halden sul
len vnd yn auch denne getruwliche huldungen vnd eyde tun vnd gehorsam zu seyn als sich das billichen vnd von rechte geburt ane widerrede vnd ane allis geuerde Behelffende vns(er)m h(er)ren dem herczogen zu lugem
burg seines freyen willen sich zu behelffen mit dem egenan(ten) h(er)zogtume zu lugemburg vnd seyner amter vnd seyner elichen gemahel vorgen(anten) yre d(er)waren witegaben vnd bewissungen yre lebetage vnd vns auch
vnser freihaiten rechten vnd gewonheiten als wir die von alters herbracht haben als das auch alles in den vorgen(anten) vns(er)s h(er)ren des h(er)zogen briuen clarlichin begriffen ist Vnd zu vrkunde diser obgeschriben sachen haben
wir vns(er) allir Insegele an disen brieff lassen hengen Dergeben ist zu lugemburg nach Cristis geburte dreiczenhundert Jare dornach in dem Acht vnd sibenczigisten Jare des nehsten montages nach vnser frawen tage
lichtmesse