In gotes namen amen Wir hansa rost Richter / nyclas ortel Burgermeister / hansa leuthmerizer Engel Apatteker / herdegen salczner / Erhard lobel
Rudolff von mulhausen / Cristoff goltsmid / fridel kussenphennig / sigmund toscaner / Johes puschman / Jessco kotko / hannsso fort / Cunrad von coln
Peter von trautnaw / Niclas von sagan / kynsel des swarczen gieschels eydem / vnd vlrich furter / gesworne scepfen die nu sind oder in
czeiten hernach werden vnd die gancze gemeine / Burg(er) der grossen stat czu prage / Bekennen offenlich vnd tun kunt mit dem briue allen den die yn
ansehen horen oder lesen / als wir derkant habn den grossen vberlast schadn / vnd vngelimpfen der da gescheen ist / an dem allerdurchleuchtigistem
fursten vnd herren / h(er)n wenczlaw Romischen künige czu allen czeiten merer des Reichs vnd künig czu Behem / vns(er)m gnedige(n) herren / von seiner
gefenknisse wegen / vnd des wir vor nicht gewost habn / sunder nu wol wissen / darumb wir mit wolbedachtem mute / mit gemeine(m) Rate / vnd in
recht(er) wissen / gelobt habn / vnd globen bey dem hochsten eyde mit auffgerakten fingern czu den heyligen / bey trewen vnd bey ern / dem durchleuchtigistem
fursten vnd herren / h(er)n Johansen Markgrafen czu Brandemb(ur)g czu lusicz / vnd herczogen czu Gorlicz / vns(er)m genedigen herren / yn vor einen rechten her=
ren vnd vorweser der kron des künigreichs czu Behem habn haldn sulln vnd wolln / alle die czeit / die weil der obgenante Allerdurchleuchtigiste furste
vnd herre / h(er)re wenczlaw Romischer künig czu allen czeiten merer des Reichs vnd künig czu Behem vns(er) liber genedig(er) herre / nicht ledig vnd frey wirt
als ein freyer künig czu recht wesen sol / wer sache daz got vor sey das er abging / indisen gefenknis von todes wegen / so sulln vnd wollen wir den eyenan(n)te(n)
herczog Johansen vor einen rechten vnd volkumen erbherren vnd künig czu Behem haben vnd halden als vns got helffe vnd alle heiligen / darumb so
globn wir alle binttnis wider geben / die czwisschen vns / vnd markgraff Josten / markgrafen czu merh(e)n / vnd den lanth(e)n czu Behem / die vnsern genedigen h(er)=
ren halden in gefenknis / vernicht sind genczlich vnd gar / vnd die alle glubde vnd eyde / die wir yn vber die briue oder in den briuen gelobet habn / die sulln
ab geen vnd nicht gehalden werden / an geuerde vnd an alle argelist / Auch globen wir alle vestigung vnd einig / vnser egen stat czu prage halden / noch
vnsers obgeschriben hern des herczogen Johansen willen / gebote vnd gebot an alles geuerde nichtes aussgenomen / darumb das wir in einen rechte(n) geborn
fursten czu dem lande / vnsers herren des küniges bruder habn / czu einem herren vnd vorweser vns(er) stat / vnd des ganczen künigreichs der einigung
vnd vestigung / wir furbas nicht bedurffen / Auch sullen wir vnd wollen / vnd geloben / dem obgeschriben herczog Johansen vns(er)m genedigen herren /
trew vnd gewer vnd beraten vnd beholffen sein / seines lieben bruders / vnsers lieben genedigen herren / des obgenan(n)te(n) fursten wenczlawen / Romisch(e)n
vnd Behemischen küniges / rechen vnd czudrengen mit leib vnd mit gut / auff sein feinde / die yn vnschuldiclichen gefangen haben vnd halden / mit
vnser ganczen macht / in trewen mit auffgerakten baniren / mit dem wir von dem obgeschriben künig wenczlawen / vnd von seine(n) vorvordern vnd
eltern / bis her begnadet sein / czu felde vnd czu hause / als offte er des bedurffen wirt / bereyt sein sullen / an geferde vnd an alle argelist / Auch sulln
vnd wollen wir / dem obgenan(n)te(n) herczog Johansen / alle czinse Rente vnd nucze / reychen vnd geben die in vns(er) obgenan(n)te(n) stat sind / nichtes ausgeno=
me(n) / wie die benant sein / mit voller herschafft / als die ein künig von alters / vnd bis her gehabt vnd vffgehabn hat / an alle argelist / Auch
sal der offtgenan(n)te herczog Johans vns(er) herre vollen gewalt haben czu seczen vnd entseczen alle amptleuth in derselben vns(er) stat / wenne vnd
wie offte ym das fuget vnd gefellet / die ein künig czu Behem seczen czu rechte vnd entseczen hat / die da gemein(e)m arm(e)n vnd reichen recht tun /
yederman in seinem ampt / als das gewonleich ist / vnd wer das sache das von den gnaden gotes vns(er) obgenan(n)te(r) lieber genedig(er) herre der künig
ledig vnd los vnbekümert an leyb vnd an gut / als ein freyer künig / aus derselben seiner gefenknis keme / vnd die obgeschriben vorpüntnis
widerruffe offenbar / mit worte ader mit seiner maiestat brieuen / denne so sulln wir furbasmer / aller obgenante(r) vorpüntnis / gelübde
vnd vorscreibunge / ledig vnd los sein gancz vnd gar / vnd der kegenwörtige brieff sal dene furbas tod sein / vnd kein krafft noch macht
mer habn / des czu vrkunt so haben wir vns(er) obgenante stat Sigel das grösser mit recht(er) wissen / gehangen an den baeff / der Geben ist
czu prage / do man czalte nach cristi gepürte / dreyczenhundert Jar vnd darnach in dem vier vnd neunczigistem Jare / an send peters vnd
send pauls abend der heyligen czwelffboten