Wir Ott von gotes genaden pfallenz grafe ze rein und hertzog in Beyrn tu(e)n chunt an dem brif daz wir gelobt und gehaizzen
haben und rechte purgen sein worden unsers lieben oheims des edeln hertzogen Hainriches von chernden und grauen ze tyrol und ze go(e)rtz
gein im und gein allen seinen erben ez sein sun oder to(e)chter umb vierzig tausent march silbers prager gænges fur den hoch
geborn fursten chunig Johansen von Beheim und von polan und grauen ze Lucemburch. Do sulben phennig suln im geuallen
zehen tausent march zu des vorgenanten chunig Johansen chumen der nách suln im geuallen zwaintzig tausent march silbers
des selben gænges fur die haimstewr chunigin frawen Annen seiner wirtinn der got genade der nách suln im geuallen zehen
tausent march silbers des selben gænges prager muntze fur den spruch den im unser bruder hertzog Hainrich von Beyrn und
pfallenz graue ze rein und der wirdige herre pischof Hainrich von trient im hin zu gesprochen habent der sume pringet also
vierzig tausent march silbers prager muntze der vorgenanten phennig suln im geuallen auf sande michels tag da im schirst
chumt funf tausent march der nách von dem selben sand michels tag uber ein Jár zehen tausent march der nách aber von
dem selben sand michels tag uber ein Jár zehen tausent march der nách aber von dem selben sand michels tag uber ein Jár
zehen tausent march und der nách aber von dem selben sand michels tag uber ein Jár funf tausent march daz wirt alles
also vierzig tausent march. mit so getánem gedinge zu stætte stætt man im oder seinen erben die vorgenanten phennige nicht
gebe so hat er oder sein erben gewalt uns ze manen nách der frist und sullen im danne nách der manunge unser erbare
ritter in den næhsten vierzehen tagen legen gein regenspurch in die stat und die suln da laisten in gaiselweis und nimmer duz
chomen untz lange untz daz im wider chert wirt der pruch des im an der gulte der phennig geprochen ist ez suln auch die selben
unser ritter untz lange laisten untz daz er oder sein erben der phennig gar und gæntzlich gewert werdent dær an in spruche ge
schehen sint ez suln auch unser vorgenante ritter auz der laistunge nimmer chomen ez geualle e daz gu(e)t alles da spruche an ge
schehen wæren gein regenspurch in die stat wa er od(er) sein erben od(er) ir gewizze poten si hin schuffen ze geben und ze antwurten
dise vorgeschriben sache loben wir stæte ze haben bei unsern trewn und geben dar uber disen brif versigelten mit unserm Ingesigel der
ist geben ze munchausen do von christes geburt wæren ergangen dreutzehen hundert Jár und dar nách in dem aht und
zwaintzigisten Jár an sand matheus des zwelf poten und ewangelisten tage