Wir Wilhelm von gotis gnaden Marggraffe czu Myssen lantgraffe In doringen vnd pfaltzgraffe
czu Sachssen Bekenn vor vns vnß erbin vnd nachkomen vnd thun kunt offintlichin mit dysim brieffe
allen den die yn sehin adir horen lesin Als wir wider die Edeln Ern Albrechte vnd Jorgen von Coldicz
vnd ire erbin vnß liben getruwin die veste hus vnd Stat Coldicz mit iren czubehorungen recht vnd
redelichin gekoufft habin als daz soliche brieffe die darobir gegebin syn eygentlichir vswisen daz in
dem kouffe vnd tedingen zo bered ist wordin geschege daz die obgenanten Er Albrecht vnd Jorge
von Coldicz adir ire erbin die selbe veste Coldicz mit irer czubehoruge nicht widerkoufftin in sol
chir czit als die brieffe vswisen vnd daz Coldicz hus vnd Stat mit iren czubehorugen als sie vns
das vorkoufft habin vnß vnd vnß erbin vnd nachkomen rechte gut vnd erbe worde wolde denn eyn
konig von Behemen die gut die von der kronen czu Behem gehin adir von Beme die von rechte czu
lehen gengin widerkouffin die sal er widerkouffin vor czwenczig tusent marg lotigis silbers fri
bergischis gewichtis dauor wir adir vnß erbin vnd nachkomen die gut die so von der krone
gehin adir von Beme sie gengin ouch wider czukouffe gebin sollen ane widerrede vnd ane geuerde
vsgeslossin die guter vnd lehen die von vns vnd der herschafft czu Myssin czulehen ruren vnd
gehin die sollen wir vnd vnß erbin vnd nachkomen czufortbas als vnß rechte erbe vnd gut behal
den vnd endorffen der guter nymande vorkouffin des czuorkunde vnd merer sicherheit habin
wir vnß Inßigel an dyssen brieff wyssintlichin lassin hengen der gegebin ist czu Gryme nach
gotis gebirte driczehenhundert Jar darnach in dem nunden Jare am nehisten donrstage vor aller
heiligen tage