Ich vridil vedmangil von den Grupen bekenne an dysem offen briue alle den dy dysen brif sen adir horn lesen .
Daz ich mit rate vnde mit guten willen myner husvrowen vnde myner sune myn gut daz ich han gehabt
zum kyrchehyn . myt alleme rechte als ichz han gehabt . vnde yn allen den reynen als iz lit habe vorkouft
myme hern h(er)n Thymen von koldiz vnde synen Erben zu eyme rechten erbe . vmme Nunzik schok an
eynen vndank . vnde des selben guts gelobe ich yn zu werne . myt alle deme rechte alle lant recht
ist . vnde der rede sint gezuk . her Lutolt von der Ausele . vlrich von kalvmburn . Herman von Pe=
ras . heynrich von Zeteraz . kunzeman richter von den Grupen . Pezolt vleisch . vnde Jenyl huterer
vnde daz dy rede ganz vnde stete blibe . des hengich vorgenantir vridil vedmangil myn Ingesigile zu
eyme gezucnisse an dysen brif . vnde der selbe brif ist gegeben nach gotis geburte . Tusent Jar dryhun=
dirt Jar . yn dem eyn vnde dryzegisten Jare an dem andirn tage nach des heyligen tage sente Alexius