Wir Wenczlaff von gotes gnaden Romischer kunig zu allen zeiten Merer des Reichs vnd kunig zu Behem Bekennen vnd tun kunt offen=
lich mit disem briue allen den die jn sehen oder horen lesen das wir fur suliche Tausent Schok grosschen prager muncze die wir dem Edeln Vlrichen
hasen von hasemburg vnserm kuckenmeister Rate vnd liben getrewen von des gerichte wegen in vnser grossen Stat zu prage das wir vmb jn
recht vnd redlich gekawft haben schuldig sein vnd gelten sollen demselben Vlrichen mit wolbedachtem mute gutem Rate vnser fursten herrn Edeln
vnd getrewen hundert Schok grosschen prag(er) muncze vff vnser closter zu doxan vnd vff den Vumen vnsers kuniglichen Berns doselbst verschriben
haben vnd verschreiben jn die doruff mit craft dicz briues vnd kuniglicher macht zu Behem also das er vnd sein erben dieselben hundert
Schok grosschen prager muncz anzuheben vff sand jorgen tage schirist komende halb vnd das ander halbe teil vff sand merteins tage nechst dornach
folgende vnd furbasmer alle Jare vff suliche tage von den egen(anten) Vumen vnsers kuniglichen Berns die vns die Eptissen vnd Geistlichen probst
Eptessin vnd conuente des egen(anten) vnsers closters zu doxan vnse liben Andechtigen Jerlichen in vnser kunigliche camer zugeben pflichtig sein
vffheben einnemen vnd empfahen sollen von vns vnsern nachkom(en) kunigen vndersamern vnd camerschreibern vnd sust allen and(er)n vnsern
vnd der cron zu Behem Amptlewten vngehindert so lange bis das wir vnd vnser nachkom(en) kunige zu Behem jn die egen(anten) Tausent Schok
grosschen prager muncz genzlich vnd gar gericht gegeben vnd bezalt haben vnd dorumb so gebieten wir dem probst Eptessin vnd conuente
des egen(anten) closters vnser liben Andechtigen die nu sind oder in zeiten werden ernstlich vnd vestigclich mit disem briue das sie dem egen(anten) Vlrichen
vnd seinen erben die egen(anten) hundert Schok grosschen von den Vumen vnsers kuniglichen Berns die sie vns Jerlich in vnser kunigliche cam(er)
zugeben pflichtig sein vff die vorgeschriben tage alle Jare geben richten vnd bezalen sollen so lange bis das wir vnd vnser nachkom(en) kunige
zu Behem jn die egen(anten) Tausent Schok grosschen prager muncze genzlich vnd gar gericht gegeben vnd bezalt haben wann als offte sie das
getan haben als offte sagen wir sie vnd iren conuente an den egen(anten) Vumen vnsers kuniglichen Berns mit wolbedachtem mute vnd rechter
wissen fur vns vnd vnser nachkom(en) kunige zu Behem vnd sust alle vnse Amptlewte in craft dicz briues genzlich vnd gar qweit ledig vnd
los vnd wes sache das derselb Vlrich seine Erben vnd nachkom(en) an denselben hundert Schok grosschen gehindert vnd jn drein griffen wurd
in welicher masse das geschee so mogen sie vnse Stete vnd lewte dorumb vffhalden pfenden vnd bekumern so lange bis das jn dieselben hund(er)t
Schok grosschen genzlich vnd gar wider werden oder die egen(anten) Vume gelts als obengeschriben stet genzlich vnd gar bezalt wirdet an iren
schaden ouch so mag der egen(ante) Vlrich seine Erben vnd nachkom(en) die egen(anten) hund(er)t Schok grosschen prager muncze furbas vorkauffen seczen
verpfenden hinlassen vnd vermieten einem andern Erbern vnd vnussprochen mane als sie das allernuczlichst dunken wirdet in sulichem
rechten vnd sulcher Vume gelts als sie die vnhaben vnd besiczen vnd nicht anders in dheineweis vnd wer disen briue mit desselben Vlrichs
vnd seiner Erben guten willen vnd wissen vnhaben wirdet der sol in den egen(anten) sachen alle recht haben als hieselber anit vrkunt dicz briues ver=
sigelt mit vnser kuniglichen maiestat Jnsigel Geben zu prage nach Cristi geburt virczehen hundert Jar vnd dornach in dem dreiczehen=
den Jare des nechsten donerstags vor dem heyligen pfingstage vnser Reiche des Behemischen in dem funfczigisten vnd des Romischen
in dem Sybenvnddreissigisten Jaren
per d(ominum) conrad(um) Epm(iscopum) olom(ucensem)
Johannes de Bamberg