Wyr Burgreue otto von lyznic bekennen Alle den dy dysen brif sen adir horn lesen. daz wir
mit guten willen vn(de) mit bedachten mute vnde mit rate vnser vrunde vn(de) vnser manne. daz
wir daz gerichte in den zven dorfern zu wemgen sormut vn(de) zu kofmen vn(de) andir gut vnde
recht daz wir dar ynne han gehabt adir noch mochten gehaben. vnsime liben Omen hern Thyme
von koldiz vn(de) sinen erben han gegeben zu eyme rechten erbe myt Alle deme rechte alse wirs
han gehabt vn(de) vnse brudere. Der rede sint gezuc Abt vlrich von kemniz. her Albreht von
lyznic Tumprobist zu misne. vn(de) burgreue heynrich von lyznic. vn(de) vnse ome her heynrich von
koldiz. vn(de) vnse man vlrich von grunov vn(de) Meynrich vo(n) gudeliz. vn(de) daz di rede ganc vnde
stete blibe des henge wir vnse jngesigil An dysen brif. Vn(de) d(er) brif ist geschriben nach gotis
geburte Tusent Iar drihundirt Iar in dem eyn vnde drizegisten Iare an dem andirn tage
nach sente donatus tage