Wir Sigmund von gotes gnaden Romischer kunig zuallenzeiten merer des Reichs vnd zu Vngern zu Behem Dalma
tien Croatien ec(etera) kunig Bekennen vnd tun kunt offenbar mit disem briefe allen den die jn sehen oder horen lesen
Als der Durchluchtigiste furst herr Wenczlaw kunig zu Behem vnser lieber Bruder seliger gedechtnusz dem Janko
malerzik vnserm lieben getreuen auf dem haws hertemberg ein suma gelts verschribn hat Vnd als wir jm auch
ettwas gelts zu derselben Suma auch auf dasselbe haws geslogen haben Also horen wir daz dasselbe slosz vastbaw
fellig sey vnd daz Es guter besserung bedurffe Dorumb mit wolbedachtem mute gutem Rate vnd Rechter wissen
haben wir dem vorgen(anten) Janko malerzik gegunnet vnd erlowbet gunnen vnd erlouben jm in krafft disz briefs daz Er
hundert Schok guter Behemischer grosz prager munge auf dem vorgen(anten) haws hertemberg verbawen solle vnd
moge doch daz er das tu mit guter kuntschafft erber lute daz er souil dorauff verbawet hat vnd wenn wir
vnser erben oder nachkomen kunige zu Behem das egent(e) haws hertemberg mitsampt seinen nuczen vnd zugeho
rungen von dem offtgenan(ten) Janko malerzik vnd seinen erben wider losen wollen so sollen wir jm sein Suma dorub
jm dasselbe haws verschriben ist nach siner briue lawt Vnd auch die vorgen(anten) hundert schok die Er verbawen vnd
auf den baw desselbn huses legen sol gancz gar vnd redlich bezaln Vnd Er vnd sine erbn sollen vns vnd vnsern
erben vnd nachkomen kunigen zu Behem das offtgenant(e) haws hertemberg mit seinen nuczen vnd zugehorugen
nicht abtreten wir haben Sy dann gancz vnd redlich beyde vmb die hawbtSum Vnd auch hundert schok fur den
bawe betzalet alles geuerde gentzlich auszgeschaiden Doch so sol das vorgen(ante) haws hertemberg vnser vnd vnser
erben vnd nachkomen kunige zu Behem offen haws sein daz wir vns vnd vnsere Amptlute daraws vnd wider
darein wider vnsere finde behelffen mogen doch auf vnser koste vnd on des vorgen(anten) malerzikes vnd seiner erben
schaden mit vrkund disz briefs versigelt mit vnserm kuniglichen Anhangenden Jnsigel Gebn zu prespurg
Nach Crists geburt vierczehenhundert jar vnd dornach in dem Sechsondzwemczigisten jaren des heristen Din
stag(e)s nach dem palmtag Vnser Reiche des Vngerischen ac(etera) in dem Virczigisten des Romischen in dem Sechs
zehenden vnd des Behemischen jm Sechsten Jaren