Wir Sigmund von gotes gnaden Romischer kunig zu allenczeiten merer des Richs vnd zu hung(er)n zu Behem Dalmatien
Croatien (et)c(etera) kunig Bekennen vnd tun kunt offenbar mit disem brieff allen den die jn sehen oder horen lesen Wann der hochgeborn
kazimir hertzog zu Awswitz (et)c(etera) vnser lieber Oheim vnd furst an vns durch seyne botschafft vnd brieue bracht hat wie Er dem hoch
geborn ludwigen hertzogen in Slesien zu Brige vnd zu lignitz vnserm lieben Oheimen vnd fursten die Stat Strelin verkoufft
hat vnd vns mit diemutigem flisse gebeten hat das wir dem egenan(ten) hertzog ludwigen die v(or)gen(anten) Stat vnd land Strelin mit allen
jren zugehorungen vnd rechten zuleihen vnd zureichen gnediclich geruchten Vnd wann vns derselb hertzog ludwig ouch flissiclichen
vnd diemuticlich gebeten hat jm solich vorgen(ante) Stat vnd land Strelin mit aller jrer zugehorungen als Er dann die von dem egenan(ten)
kazimir gekoufft hat gnediclich zureichen Des haben wir angesehen der vorgen(anten) vnser lieben Oheimen hertzog kazimirs vnd hertzog
ludwigs diemutige bete vnd ouch betracht vnuerdrossene vnd getreue dienste die sie vns vnd der Cron zu Behem offt vnd dicke getan
habent teglichen tun vnd furbas tun sollen vnd mogen in kunftigen czeiten Darumb habn wir mit wolbedachtem mute gutem Rate vnd recht(em)
wissen dem obgenan(ten) ludwigen die vorgen(ante) Stat vnd land Strelin mitsampt jren manschafften Rechten nutzen Renten gerichten vnd
zugehorungen als Er dann die von dem egenan(ten) kazimir redlich gekoufft vnd an jm bracht hat gnediclich gereicht vnd gelihen Reichen
vnd leihen jm die von Behemischer kuniglicher macht in crafft dis briefs die von vns vnd der Cron zu Behem zulehen zuhaben zuhalten
zubesitzen vnd der zugeniessen Als dan solichs lehen Recht vnd herkomen ist von allermeniclich vngehindert Vnschedlich doch vns
vnd der Cron zu Behem an vnser(n) diensten vnd sust yderman an sinen Rechten mit vrkund dis briefs versigelt mit vnser kuniglicher
maiestat jnsigel Geben zu tewin Nach Crists geburt vierzehenhundert jar vnd dornach in dem Achtundzwenczigisten Jare An dem
nechsten Suntag vor sand Margarethen tag vnser(r) Riche des hung(er)ischen (et)c(etera) in dem Czwenundvirczigisten des Romischen in
dem Achtzenden vnd des Behemischen jm Achten Jaren