Wir Sigmund von gotes gnaden Romischer kunig zuallenzeiten Merer des Reichs vnd zu Hungern zu Behem Dalmacien Croacien (et)c(etera) kunig.
Bekennen vnd tun kunt offenbar mit disem brief allen den die In sehen oder horen lesen Wiewol die Gestrengen Ditz karl Eberhart Balthazar Cuncz
Sigmund vnd Engelhart alle von Tungen das Sloß Tungen mit seinen herlichkeyten rechten nutzen vnd zugehorungen nichts vßgenomen fur eign
vnd erblich gut besessen vnd herbracht habn fur sich vnd Jre forvordern on allermenniclichs widerrede vnd yrrung ydoch so haben sie angesehen solich gro
sse gnade gutikeit vnd forderung die keyser karl vnser her vnd vater seliger kunig Wenczlaw vnd wir kunig Sigmund vnd das hauß zu Behem Jren eldern
vnd vorvordern vnd In manigfeldiclich beweist vnd getan haben vnd wir kunig Sigmund In noch teglichen tun mugen vnd drumb des dancken
zusin vnd durch sunderlich schutz vnd schirmsi willen die In die Cron zu Behem wol getun mag So haben sie vnsern kuniglichen gnaden vnd der
Cron zu Behem die eygenschafft des egenan Sloß Tungen mit gutem willen genzlichn vbergeben vnd das mit allen sein herlichkeyten wa(e)ldn
eren gerichten hultzenen weiden wassern nutzen gemessen vnd allen andern zugehorungen nichts vßgenomen wie man die mit sunderlichen worten
benennen mag von vnsern kuniglichen gnaden vnd der Cron zu Behem zulehen empfangen vnd versprochn fur sich Ir erben vnd nachkomen dasselbe
Sloß Tungen mit sein zugehorungn als vor berurt ist alle zeit wenne es sich geburen wirt von vnsern kuniglichen gnaden vnser erben vnd Nach
komen vnd der Cron zu Behem zulehen empfahen vnd dieselben lehenschaft dennen der Eldest von Tungen vnder den egenant von Tungen Jren er
ben vnd nachkomen zulehen empfahen sullen dem wir vnser erben vnd nachkomen vnd die Cron zu Behem die lehen also leyhen sullen die er denne tra
gen sal yedem zu seinem rechten vnd doron tun als lehenlut Jren rechten lehenherrn von recht vnd gewonheit tun sollen on alles geuerde vnd argelist
Als dann Jre brieue die Sy vns druber gegeben habn das clerlichen vßweisen Nu ist fur vns komen der Streng dyetz von Tungen vnser lieber getru
er vnd hat vns demuticlich von seinen vnd aller ander von Tungen wegen gebeten Im die obgenan lehen zuleyhen daz wir ouch also getan vnd Im
die gereicht haben tun vnd teichen mit disem brief vnd von kuniglicher macht zu Behem die als der Eldste von vns vnd der Cron zu Behem wegen
zuhalden vnd zutragen yederman an seinen rechten onentgolten Er hat vns ouch doruff von seinen vnd der andern wegen gesworen vns vnd
der Cron zu Behem gehorsam zusein vnd zutun als lehenleutt Jrem herrn von rechts wegen zutun pflichtig sin on geuerde Mit vrkund dß bri
effs versigelt mit vnsern kuniglichen maiestat Insigel Geben zu Nurenberg Nach Cristi geburt vierzehenhundert Jar vnd dornach in dem dryssigistn
Jare am montag vor sant Symons vnd sant Jude tag Vnserer Reiche des vngrischen (et)c(etera) Im vier vndfierczigisten des Romischen Im Eynvndzwenczigis
ten vnd des Behemischen Im Eylfften Jaren

[ad mandatum domini regis] Caspar Slik