Wir Sigmund von gotes genaden Romisscher keyser zu allengeiten Merer des Reichs vnd zu Hungern zu Behem Dalmacien Croacien (etc.) kunig
Bekennen vnd tun kunt offenbar mit disem brieff Allen den die in sehen oder horen lesen Als wir vormals do wir noch Romisscher kunig waren den Burgermeister Rate vnd Bur=
gern gemeinlich der Stat Budissin vnsern lieben getrewen Alle vnd ygeliche jre gnade freiheite Recht gerichte brieue vnd priuilegia die sy von vnsern vordern kunigen zu Behem
herbracht haben bestetigt vnd Confirmirt haben Als dann vnser kuniglich maiestat brieff die sy doruber haben das clerlichen vswysen Also haben vns die obgen(anten) Burgermeister
Rate vnd Burgere gemeinlich der Statt Budissin durch jr erbere bottschafft diemutiglich bitten lassen das wir als ein Romisscher keyser vnd kunig zu Behem derselben Statt
Budissin soliche obgenante alle vnd ygliche jre gnade freiheit Recht gerichte brieue priuilegia hantuesten vnd gut gewonheit Vnd nemlich einen brieff den jn der allerdurch=
luchtigist furst vnser lieber herre vnd vatter keyser karl seliger gedechtnuss vber jr freiheit lautund gegeben hat Jtem einen brieff den jn vnser lieber Bruder kunig
wentzel selig vber die kure des Rats lautund gegeben hat zuuerneuwen zubestetigen zubefesten vnd zu Confirmiren gnediglich geruchten Des haben wir angesehen soliche
jre fleissige bete vnd ouch betracht jre stete getrue vnd willige dienste die der vorgenant von Budissin vordern vnsern vordern kunigen zu Behem vnd jn per=
lich vnd costlich getan vnd sunderlich als sy vns ytund in disen swaren leufften gegen den ketzern vnd vnglaubigen zu Behem mit grosser darlegung getan
hant Vnd furbas tun sollen vnd mogen in kunfftigen zeyten Vnd haben drumb mit wolbedachtem mute gutem Rate vnserer fursten Edeln vnd getruen
vnd Rechter wissen den vorgenanten Burgermeister Rate vnd Burgern gemeinlich der Statt Budissin vnd jren nachkomen Alle vnd ygelich jre freiheit gnade
Rechte gerichte brieue hantuesten priuilegia vnd gut gewonheit der sy bissher genossen haben vnd die jre vordern vnd sy von vnsern vordern seliger gedecht=
nisse Vnd nemlich die brieff die jn vnser lieber herre vnd vatter keyser karl seliger gedechtnisse vber jr freyheit lautund Jtem die brieff die jn vnser lieber
Bruder kunig wenczlaw seliger vber die kure des Rats lautund gnediglich gegeben vnd die sy redlich herbracht hant jn allen jren puncten stucken artickeln
vnd meynungen als die von worte zu worte lautund vnd begriffen seind gnediglich verneuwet beuestent bestetiget vnd Confirmirt Verneuwen beuesten
bestetigen vnd Confirmiren jn die ouch von Romisscher keyserlicher vnd kuniglicher macht zu Behem in crafft dis brieffs in aller der masse vnd wyse
als ob sy alle vnd ygeliche besunder von worte zu worte in disem vnserm brieffe begriffen vnd geschriben weren Vnd meynen setzen vnd woll=
en von derselben Romisscher keyserlicher vnd kuniglicher macht zu Behem das die vorgenan(ten) von Budissin vnd jre nachkomen furbas mere dabey be=
liben sollen von allermenniglich vngehindert Vnd wir gebieten drumb allen vnd yglichen fursten geystlichen vnd werntlichen Grauen freyen
herren Rittern knechten vogten Amptleuten Burgermeistern Reten vnd gemeynden der Stett merckte vnd dorffere vnd sunst allen andern vnsern
vnd des Reichs vnd vnsers kunigreichs zu Behem vndertanen vnd getruwen den diser brieff furkomet ernstlich vnd vestiglich mit disem brieff das
sy die vorgen(anten) von Budissin furbas bey solichen jren freyheiten gnaden Rechten gerichten brieuen hantuesten priuilegien bestetigung vnd guten
gewonheiten der sy bissher redlich gebraucht vnd herbracht haben beliben lassen vnd sy doran nit hindern noch jrren in dehein weis Als lieb
jn sey vnser vnd vnser nachkomen swere vngnade zuuermeyden Mit vrkund dis brieffs versigelt mit vnserm keyserlichen maiestat jnsigel
Geben zu Basel Nach Cristi geburt vierzechenhundert jare vnd dornach in dem vierunddreissigisten jare am nechsten mittwochen vor dem
heiligen pfingstag Vnser Reiche des hungrischen (etc.) in dem Achtunddreissigisten des Romisschen in dem vierundzwentzigisten des Behemischen
im vierzechenden Vnd des keysertumbs im ersten jaren
Ad mandatum domini jmperatoris
Hermannus Racht