Wir Elisabeth von gotis gnaden zu Hungern Dalmacien Croacien (etc.) kunigynn Erb vnd fraw des kunigreichs zu Behem vnd Herczogynn zu Osterreich (etc.) Bekennen fur vns vnsern lieben son kunig
laslaw vnd vns erben vnd nachkomen kunig zu Behem mit disem briue allen den die In sehen oder horen lesen Wann wir angesehen vnd gnediclich betracht haben solich angeneme vnd getrewe dinste die der Edel Caspar Slik Ritter
pfleger zu Eger vnd zum Elbogen vns(er) ratte vnd lieber getrewer Vnsern lieben h(er)n vatter vnd gemahel keiser Sigmund vnd kunig Albrecht lannge Iare vnd auch vns vil zeit Vnuerdrossenlich an vnderlas nochfolgend vnd ouch der
Crone zu Behem gar nuczlich vnd vnuerdrossenlich getan hat das wir In vmb solicher dinst vnd trewe willen die allhie aufzuschreiben vil zulangk weren vnd ouch nicht notdurfft wann das lautkundig ist grosser gnad vnd
furdrung pflichtig sein Vnd drumb vnd ouch vmb sunderlicher gnade vnd zuneigung willen die wir zu Im haben vnd zu seinen eren vnd auffnemen sunderlich gnaigt sind So haben wir dem egenan(ten) Caspar seinen erben vnd
nachkomen das gut zur Liechtenstat im Pllogner kraise gelegen das vorczei(ten) vns(er) lieber her vnd vatter keiser Sigmund von dem Ersamen vnd geistlichen Cunczo abbt vnd seinen conuent des closters zur Tepl vnsern lieben
Andechtigen vmb ein merklich Sum gelts redlich gekaufft vnd Sy dorumb benuget hat mit allen vnd yglichen seinen wenckhen dorffern gerichten allerley auge es sey an eisen oder anders hoffen leuten eckern gebawe vnd vngebawe
wassern weiden mulen welden puschen gegeyden vischereien lehen geistlichen vnd werltlichen gebieten zinsen renten pussen vnd fellen vnd allen andern zugehorungen nichts ausgenomen wie man die mit sundern worten
benennen mag gnediclich gegeben vnd In damit begabet vnd geben In das wissentlich in crafft diß briues vnd als ein rechter angeborner erbe der Cron zu Behem Also das der egen(ant) Caspar sein erben vnd nachkomen dasselb
gut zur Liechtenstat mit allen seinen zugehorungen als oben stet furbas erblich vnd zu ewigen zeiten besiczen des gebrauchen vnd geniessen sollen vnd mugen von vns vnsern nachkomen vnd allen den vnsern vnd sust allermenicli
chen vngehindert Vnd ab Sy es furbas verkauffen vergeben versetzen oder sust verwechseln oder wenden wolten andern leutten noch Ir notdurft vnd gefallen des sullen Sy vollen gewalt haben Ouch tun wir In dise besunder gnade
das der egen(ant) Caspar sein erben vnd nachkomen vnd ouch sein leute vnd guter zu der Liechtenstat vnd aller seiner zugehorunge gancz frey sein vnd nyndert zugericht steen sullen Sunder wer mit In zuschaffen hat der sal das in dem
gerichte tun zur Liechtenstat Sy sollen auch hinfurt vnd aller ander dinste anstege stewer bete vnd beswerung frey vnd ledig sein vnd vnser Burggrauen zu Elbogen vnd all ander Ambtleut die in zukunfftigen zeiten sein werden
sullen vber Sy nichts zugebieten noch mit In zuschaffen haben Sy mugen auch auff denselben gutern smiden halden zu Irem geniesse vnd slos vnd allen vestlickein paw nach Ir notdurfft aufrichten vnd machen on meniclichs
hindernuß vnd irrung Vnd so wir oder vnsere nachkomen den Elbogen losen wollen nach tode des egen(anten) Caspars So sollen wir seinen erben die ganczen Sum in Iren pfandbriuen begriffen vor ausrichten vnd alsdann so sullen
Sy vns das slos Elbogen mit seinen rechten zugehorungen abtreten vnd die Liechtenstat vnd dieselben guter die zu dem slos nit gehoren sunder also von dem egen(anten) abbt gekaufft sind in sunderheit die sollen Sy erblich behalden
als wir In dann die mit disem brieff gegeben haben Vnd wir gebieten dorumb allen der Cron zu Behem Amptleuten vnd vndertanen vnd sunderlich vnsern Burggrauen lantrichter vnd andern zu Elbogen vnd in dem
kreise in welichen wirden oder wesen die sein ernstlich mit disem briue das Sy die egen(anten) Caspar seine erben vnd nachkomen an sulchen vnsern gnaden vnd freihaiten nicht hindern noch In dorein sprechen in dheinerweis Wer
aber doruber tet vnd Sy hindert oder besweret der sol hundert mark lotigs silbers alsofft das geschicht verfallen sein halb der kuniglichen kamer vnd halb dem egen(anten) Caspar vnd sein nachkomen vnleslich zubeczalen Vnd
wer disem brieff mit des egen(anten) Caspars guten willen kintlich vnd wissentlich ynnehaben wirt der solle alle recht haben an dem obgen(anten) gut als er selber Mit vrkunt diß briues besigelt mit vnserm kuniglichen anhangenden
Insigel Geben zu Offen nach Cristus geburt Vierzchenhundert Iar vnd dornach in dem Virczigisten Iare am dem heiligen Palmtag