Phelipe byder g(raci)en goids hertoge van Bourg(oign)en van lothr(ing)en van brabant en(de) van lymborch Graue van vlaend(er)en van artois van Bourg(oign)en palatin van heneg(ouwen)
van holland van zeelland en(de) van namen marq(ui)s des heilige(n) Rijcx heere van vriesland van salins en(de) van mechelen mambor en(de) gouu(er)neur der lande en(de) hertogdom(m)e
van luxemb(ourg) ende graefscap(pe) van chiny Doen cond en(de) bekennen openbaerlic allen den genen die desen brieff zullen zien offt horen lesen Also die hoigeboren vorstinne
onse lieue en(de) geminde moye Elizabeth van g(raci)en hertoginne in beyeren en(de) van luxemb(ourg) greuinne van chiny om(m)e midts zulken groten laste en(de) openbare
krigen en(de) onvrede dat zy en(de) huer(e) voirs(creuen) landen en(de) ondersaten in zyn / dair zy zwaerlic en(de) grotelic in verdruct ende verneert werden van huer(en) en(de) van
huer(er) voirs(creuen) landen vianden / Diese dagelicx mit viere brande doitslage(n) namen en(de) andere rouen en(de) orlogen dat zy des(er) leyder als een v(r)ouwe v(er)an(de)rt
als zy is / niet gebeteren en(de) den voirs(creuen) huer(en) vianden wederstant gaven(n) noch den zeluen huer(en) lande(n) gehelpen mach / als zy dat geern en(de) billicxelic dede
Daerom heeft zy ons als aen voirs(creuen) die huer zo nae mit bloide en(de) mit zwaegerscap bestaent is goidlic gebeden en(de) ernstelic aengeroepen onse hant ende
beschermisse ouer huer en(de) ouer huere landen en(de) ondersaten voirs(creuen) te hebben en(de) te houden dat zy noch de huere voerder dalz v(er)druct zonde(r) gebetere
en(de) wederstant niet verdoruen noch veriaecht en(de) worde(n) / So hebben wy om der conster bede en(de) begerte(n) wille onser lieuer moyen die hertoginne
voirs(creuen) ons daertoe geneiget en(de) die mambornie of gouu(er)nem(en)t bewaringe hoede en(de) beschermisse van huer en(de) van huer(er) voirs(creuen) landen en(de) ondersaten
tonswaert genome(n) en(de) behouden in zulker vougen dat wy gelooft hebben mit onser vorstliker trouwen in k(r)isten eede daertoe gesworen op dat heylige
euangelie goids en(de) gelouen mit crachte van desen brieue dat wy allen prelaten grauen baen(er)her(en) Ridderen knechten edele en(de) onedele allen en(de) yegeliken steden
besloten en(de) onbesloten der voirs(creuen) lande en(de) hertogdom(m)e van luxemb(ourg) ende graefscape van chiny ouer al in duytsch(en) en(de) walschen lande allen den
luyden Inwo(n)ner(en) ende ondersaten groote en(de) clene aerm en(de) Rijke geestelike en(de) wereltlike ga(r)ne wtgenomen laten houden en(de) ha(n)d(en) sullen by
allen en(de) yegeliken huer(en) Rechten gerichten costummen priuilegien hantuesten en(de) allen herkomen(n) v(r)iheden brieue(n) en(de) p(r)iuilegien die zy In vorleden(en)
tyden gehadt hebb(en) / en(de) hebb(en) van zaliger gedinchenissen koningen hertogen grauen en(de) heerscappen der voirs(creuen) lande(n) van luxemb(ourg) en(de) van chiny en(de)
van onse lieuer moyen der hertoginne voren genoemt / en(de) alremanlich daer by genadichlic te laten en(de) niement dair ouer weder te dringen
Ende in geliker vougen hebb(en) wy gelooft en(de) gesworen / zweren en(de) gelouen te verhoren en(de) verstaen off te doen horen en(de) verstaen die clagen en(de)
gebreken van elken yegeliken ondersaten en(de) inwo(n)ner(en) der voirs(creuen) lande aerm en(de) Rijke clene en(de) groot en(de) hem te doene en(de) te doen doene goet gerichte
en(de) onv(er)toechtich g(er)echticheit nae onsen besten v(er)mogen onv(er)treclic / naer Recht costumme en(de) gewoenheit der lande steden dair en(de) alzo dat gebuer(en)
zal Also lange als wy dat momberscap en(de) gouu(er)nem(en)t van onser voirs(creuen) lieuer moyen en(de) van huer(er) voirs(creuen) landen hebben zullen Behonden de
zeluer onser lieuer moyen der hertoginne den erffsc(ap) der landen van luxemb(ourg) en(de) van chiny voirs(creuen) en(de) alremanlich den zine(n) zyn(en) rechte
Alle voirs(creuen) puncten p(r)iuile(gien) en(de) artickelen en(de) elcby zonder gelouen wy vaste gestade en(de) onuerbreclic te houden zonder alle arge liste en(de)
genaede In orconden der waerheit onsen zegel hieran gehangen Gegeuen in onser stat van dyon in boergoen(n) op(en) dach in meye Int Jaer ons her(en)
duysent vierhondert twee en(de) viertich

By mynen her(en) den hertoge
J. de
~M~