WIr Jorgen von gots gnaden künig zu Behem Marggraue ze Merhern Herczog in Slesy vnd Lucemburg Vnd
wir Albrecht von denselben gnaden Erczherczog ze Osterreich ze Steyr ze kernden vnd ze krain Herre auf der Wyndischenmarch vnd ze
portenaw Graue ze Habspurg ze tyrol ze pfyrt vnd ze kyburg Marggraue ze Burgaw vnd lantgraue in Elssazzen Bekennen vnd tun kund offenlich mit disem briefe
Das wir angesehen vnd betracht haben die sunder freuntschafft gutwillikait vnd aynunge die vnser vordern loblicher gedechtnuss künige zu Beheim vnd Herczogen
ze Osterreich mit einander gehabt vnd gemacht willen miteinande fur sich ire erben vnd nachkomen gemacht haben Daraus dann vnsern künigreiche Beheim vnd
dem furstenthumb Osterreich lannden vnd leuten vil frides vnd nutz erstanden ist vnd darumb solhem nachzuuolgen vnd auch vmb befridinge vnd gemach vnser bayder
lannde vnd leute So haben wir vns miteinande freuntlichen vnd gutlichen veraynet vnd vertragen in massen hernach volgend zu erste so sullen vnd wellen yede
bayde ainander vnd vnser yeglicher den andern mit sunder freuntschafft gantzem vnd gutem willen maynen haben vnd hallten Auch vnser yeglicher des andern schaden
warnen sein ere vnd frumen furdern getreulich vnd on geuerde Es sol vnd wil auch vns kainer diezeit diser aynunge gantz auß vmb kainerlay sachen
willen vnsselbs die vnsern oder yemands anders vber der oder vber die wir beuelhend des andern vnder vns veynde werden in angreiffen noch beschedigen in dhain
weg Wir wellen vnd sullen auch den vnsern noch den die vnser yeden zubechürmen oder versprochen stunden auch den die sich ye zuzeiten in vnsern künigreiche dem
furstenthumb Osterreich lannden oder gebieten enthalten werden der wir dann vngeuerlich wechtig sein wissentlich nicht gestatten noch verhengen das sy ainer oder
mer vnser ains wellicher der were oder vns ains vndertan oder der die vnser aynem zubechürmen oder zunersprechen stunden veind weren oder sy angreiffen oder
beschedigen in dhain weg on geuerde Vnd auf das solhe vns aynung dester bestentlicher vnd aufrechter müge gehallten vnd volbracht werden So haben wir vns
auch dabey vertragen Ob vnser ainer mit dem andern zuschicken gewunne von sache wegen die sich hinfur begeben wurden Wan dann vns ayner dem andern
darumbe schreibt vnd im ainen tag der dann in ainem monad nach solher schrifft erscheynen sol benennet So sullen wir baide vnser schiedlich freunde auf solhen
tag gen Passaw in die Stat schicken so verre dann das vnser ainer mit den von passaw in vehden vnd veintschafften were vnd das den seinen von den von
passaw nicht gelait geben wurde So sollten sich vns baider Rete miteinander ainer andern gleychen gelaitsstat vnuerzogenlich vertragen daselbst hyn komen
vnd versüchen vnd fleis tun die sachen gütlich zurichten Ob sy aber die gütlikait nicht erlangen mochten So sol der vnder vns der dann der sachen ain klag
vnd vorderer ist ainen obman benennen auß des andern Rate derselb Obman sol sich auch der sachen beladen vnd in ainem monad von der zeyt anzurechen
als er zu einem obman benant wirdet ainen Rechttag gen passaw seczen auf den sol vnser yeder zwen seiner Rate zuseczen Niderseczen dieselben baid parthey
in Recht geneinander notturfftichlichen verhorn vnd wie sy alle oder der merer tail die sachen in Recht entschaiden dabey sol es beleyben vnd dem von vns bay=
dentaylen nachgangen werden on alle waygerung vnd aufzug getreulich vnd on geuerde vnd solher entschaid sol geschehen in ainem halben jar von der zeit
anzurechen als der erste rechttag von dem Obman geseczt ist es wer dann das sich die sach durch erkentnuss des Rechten lenger verziehen wurde dem solt auch
nachkomen werden vnd der obgenant Obman sol solher phlicht vnd Ayde damit er dem herrn vnder vns des Rate er ist gewant were in disen sachen des Rech=
ten von dem herrn vnder vns dem er gewant ist vnuerzogenlich als palde er zu einem Obman benant wirdet ledig gezalt werden Es sol in auch der herre
des Rate er ist darzu hallten vnd vermügen das er sich solhs rechten anneme belade vnd den sachen wie vor stet nachkome Ob aber vns ayns prelaten
Grauen Herrn Rytter knecht oder vndertan mit dens andern vnder vns zetun gewünnen So sol er sich darumb an recht benügen lassen vor des Rete mit
dem er zetun vermaint zuhaben wurden aber vnser vndertan baiderseyt geneinander zuschicken gewynnen in was states wirden oder wesens der oder
die wern Berurte das geistlich sach die solt an geistlichen gerichten gehandelt werden Berurte es aber lehen darumb solt man fur des lehenherrn lehen=
gericht vethien von dem die gütter darumb man dann rechtet zu lehen herrurten Berurte es aber spruch personen antreffend die sollten verrechtet
werden an den gerichten darinn dann der Antworter gesessen vnd wonhafft were Soch weren es Rytter vnd knecht vnd die in kainen gerichten gesessen
weren alsdann solt der Antworter gerecht werden vor dem vnder vns des Rate diener oder angehoriger er were Berurte es aber erb vnd aigen das
solt verrechtet werden an den gerichten darinn dan solhe gütter gelegen weren Berurte es aber freuel vnd missetat das sol berechtet werden an den Gerichten
darinn der Misseteter begriffen wurde vnd was also an yedem gericht wie vorsteet Zurecht erkant vnd gesprochen wurde dem sollen baid Partheyn nachkom
on weyter aufzug waygerunge vnd Appellirunge getreulich vnd on geuerde Wer ist beredt das vns kainer hinfur diezeit gantz auß dieweil dise aynung weret
in kain ander aynung noch verstentniss geen noch komen noch auch kain andre ernewen noch erstrecken sullen er hab dann zuuoran dise aynunge
darzu des andern persone vnder vns hie außgenomen vnd dise Aynunge sol wern vnd besteen vns des künigs vnd Erczherczogen bayder leb=
tagen lang gantz auß Darinn nemen wir künig Jorg zu Beheim ir auß vnsern hailigen vater den pabst vnsern herrn den Römischen kaye
vnser liebe Freund Brueder vnd Swager den Erczbischoffe ze Mayntz den Bischof zu Wirtzburg Herczog fridrichen pfalltzgrauen bey Rein ir
Herczog Fridrichen vnd Herczog wilhalmen von Sachssen alle Marggrauen zu Brandemburg vnd Herczog ludwigen von Bayren So nemen
Wir Erczherczog Albrecht von Osterreich ir in solher verstentnuss vnd aynuikait auch auß vnsern heiligen Vater den Babst vnsern gnedign
lieben herrn vnd den Römischen kays vns lieb Freund Sweger vnd Oheym den Bischoue von passaw vnd sein Capitel Herczog
Fridrichen pfalltzgrauen bey Rein Herczog Fridrich von Sachssen Sein Sun vnd Herczog ludwigs von Bayren personen verstentnuss vnd
ainung so wir mit in haben Vnd vnsern Vettern Herczog Sigmunden von Osterreich Alle vnd yeglich püncte vnd Artickel wie die von
wort zu wort hie vorgeschrieben steen haben wir baide einander vnd vnser yeder dem andern mit vnsern trewen an waares Aydes stat bey
vnsern küniglichen vnd furstlichen Eren vnd wirden gelobt die waare stat vnd veste zuhallten zuuollfuzen vnd den Nachzekomen getreu
lich vnd on alles geuerde Mit vrkund des briefs besigelt mit vnser künig Jorgens künigklichen vnd vnser Erczherczog Albrechts Furstlichn
anhangunden Ingesigln Geben ze lyncz an Suntag nach sand Andres tag Nach Cristi vnsers lieben Herren geburde vierczehenhun
dert vnd in dem Newnvndfunfczigisten Jaren