Wir Ludwigh von gots gnaden In hunngern Behem e(t)c(etera) Kunigk Marggraff zu Merhern hertzog
zu Lutzemburgk vnd In Slesien Marggraff zu Laußitz e(t)c(etera) Bekennen vnd thun kunt vor allermennigclich
Das der hochgeborne vnnser Ohem Im(er) vnnd lieber getrewer Karll hertzog zu Munsterbergk vns von
wegen vnd Im namen des wolgebornen Vlrich vnsers lieben getrewen Vlrichen Graffens zu hardeck
zu Glatz vnd In machlant ersucht hat als sinen Kunigk vnd naturlichen Erbhern vmb die lehen
zuempfahen von welichen er vns erkant als sinen gnedigen lehns hern vnd kunigk vnd sich erbotten nach
laut siner schrifften die pflicht zuthun Vnd vns ferner gebetten im gnediglich zuuernewen sin alte
freiheiten vnd begnadungen die er vnd sine forfaren von vnsern forfaren keisern vnd kunigenn
bracht hetten zubestetigen Do wir dan haben angesehen sin zimlich bitz vnd billich begerung
mit vorgehabtem rath vnser rethe vnd lieben getrewen vnd obgedachten Vlrichen vnd sin erben
in disem fall also versehen das wir soliche Confirmation zu einer andern zeit vff schieben vnd
wo es aber zu siner zeit kompt wollen wir Im vnd sinen erben soliche bestetigung gnediglich
verleihen, das es Im aber dieweil kein nachteil breng Geben wir Im durch disen brieff vnd vn
ser kuniglich maiestat kuntschafft das er die lehn nach ordnunge des lehnrecht zu rechtem tag
von vns suchet an vns gesucht derhalb Im vnd sinen erben kein verseumnus daran zugemessen
werden mag durch vns ader vnser nachkumen Vnd versprechen Im auch mit so es zu siner zeit
kompt alle sine freiheiten Confirmacion vnd bestetigungen die er von vnsern forfaren keisern vnd
kunigen zu hunngern Behem e(t)c(etera) hat gnediglich zu Confirmiren bestetigen zu vnd sie dabey genntz
lich zubehalten Zu vrkunt mit vnserm kuniglichen anhangenden Insigel besigelt Geben zu
Ofen am dornstag nach letare Nach cristi geburt Tausent funffhundert vnd Im Sibentzehen
den Vnnser Reiche des hunngrischen Im Eilfften vnd Behemischen Im Andern Jarenn