Wir ludwig von gots gnaden In Hungern Behaim Dalmatien Croatien etc(etera) kunig Marggraf In Merhern Hertzog In Lutzemburg In Slesien vnnd Marggraue In Lausitz etc(etera) Bekennen
vnnd thun kund offenlich mit disem brieff fur vnns vnnsere erben vnnd nachkomen dyser vnser kunigreich wem allermenglich Nachdem der hochgeborn furste vnnser
lieber vetter Herr Georg Marggraue In Brandenburg In Stetin Pomern der Cassuben vnnd Wenden Hertzogen Burggraue In Nurnberg vnnd furste In Rugen Weilund vnnserm
lieben herren vnnd vater loblicher vnnd seligergedechtnisse vnns vnnd vnnserm kunigreichen lange zeit bisshere vnnd In vil wege nutzlich getrewlich vnnd wol gedient hat
vnnd das auch hinfuro wol thun kan Wie er sich dann des auch getrewlich erbeut Also das wier Ime desselben pillich ergetzen wie wier dann gnediglich genaigt sind.
derhalben gemelter vnnser lieber herr vnnd vater seliger gedechtnisse vnnserm lieben vetter Marggraue Georgen mit den Hertzogthumern Opoln vnnd Ratbarn durch
allen derselbigen zugehorungen gnediglich vnnd freuntlich begabt vnnd versehen Welche gabe vnnd begnadung wier seiner lieb aus ku(niglicher) macht volkomenhait vnnd
rechten wissen fur vnns vnnser erben vnnd nachkomen kunigen widerumb bestetigt haben Geben vnnd zustellen aus sonndern gnaden vnnd aigner bewegnusse
Alain Obb(er)ster Hertzog In der Slesien ehamals seiner lieb vnnd derselben sonndlichen lehen hiemit In crafft dits brieffs selbs angetzaigte bede Hertzogthumer Opoln
vnnd Ratbarn sambt allen In(n) guden Iren guttern In vnnd empfahungen Wie sie Itzo vnnser Oheim vnnd lieber getrewer Iohanns Hertzog In Opoln etc(etera) besitzt Innehat
nutzet niesset vnnd gebrauchet Vnnd thun das alles vnuerhindert vnnser vnnser Erben vnnd Nachkomen kunig In Behaim Vnnd sunst meniglichs Doch also das sein
lieb vnnd derselben nachkomen vnnser Cron In Behaim verpflicht sein sollen Wie annder vnnser fursten In der Slesien Damit sich aber vnnser lieber vetter Marggraf
Georg mitler zeit In dem selben In der vnns selben vnnd gesten dester erhalden mag Versprechen wier seiner lieb hiemit In crafft dits brieffs Ierlichen Zwausent gut
gulden Vngrisch aus vnnser Cron In Behaim zeuberantwurten Ingestalt das vnnser Obrister haubtman der Cron In Behaim Hertzog Carl In Munsterberg Vnnd ob
Er nymer sein wurd ain annderer In gemeltem vnnserm lieben vettern Marggraue Georgen des Itzo negstkunfftigen sant Iorgen tag dits gegenwertigen Iars Zway
tausent guld vngrischer vberantwurten vnnd zalen soll Vnnd nachuolgends alle Iar Ierlich vnnd Iedes Iar besonnders Zway tausent guld vngrisch vf benanten sannt
Iorgen tag seiner lieb alwegen vor anern anndern on vercziehe getrewlich behendigen bisselang sein lieb dy angetzaigten angetell empfahen vnnd besitzen Do aber wier
vnnser Erben oder nachkomen kunig selbige regirunge vnnser Cron In Behaim In aigner person verwalten wurden Binden vnnd versprechen wier fur vnns vnnser
Erben vnnd nachkomen hiemit In crafft dits brieffs seiner lieb solich obgenant Zway tausent vf bestimbte zeit durch vnnsere Schatz kemer od(er) Camer maister
auch getrewlichs vnnd on allen behelff vberantwurten zelassen Alles getrewlich vnnd vngeuerlich Zwr vrkund haben wier mit wolbedachtem mut diesen
brieff mit vnnser ku(niglichen) handt vnderscriben vnd vnnserm ku(niglichen) Insigel aus Behemischer ku(niglicher) macht versigeln lassen Beschlohen vnd geben zw Vfenich am montag
nach Palmaru(m) Nach Cristi geburt Funfftzehenhundert vnnd Im dreyvnndzwaintzigisten Vnnserer Reich des hungerischen vnnd Behemischen In achten Iaren
Ludouicus Rex
manu p(ro)p(ri)a