Ich Johannes von gots genadenn zu Olesen Herczog In oppel obriste(r) haubtman In Slesien Bekennenn unnd thun khundt menniglich das Ich dem Durchleuchti
gistenn Grosmechtigenn furstenn unnd hern herenn Ferdinanden In hungern unnd Behem (et)c(etera) kunige meinem gnedigistenn herenn alle meine herschafft
unnd khainat nach meinem todte ubergebenn unnd Ingeeigent habe thue ubergebe unnd Ineeigenn auch dasselb seiner khuniglicher maiestat gegenwertigclich
auß aignem bewegnus von undertheniger liebe unnd trewe mit wolbedachtem mute gancz frey volligclich unnd nemlich also wo es sach wer das ich
one leibs erben menlichs oder weiblichs geslechts totlich verfalle unnd sein khunigliche maiestat des erwarttet so sol sein khunigliche maiestat khrafft
macht unnd gewalt habenn all dieselb mein herschafft unnd khainat gar nichts daruon außgeschlossenn sol es sey der nam wie er welle allenthalben
inzunemenn Inzuziehenn unnd Inzuhabenn damit thuen unnd lassenn als mit anderm Irem aigentumb vor allen meinenn erben frewndtenn
gaistlich unnd weltlichenn personen menlichs oder weiblichs geslechts gancz unuerhindert damit auch sein khunigliche maiestat Innermerckhen hab
das sein khunigliche maiestat wol mugenn versichert sein so verbinde Ich mich In krafft diß brieffs wo got der allmechtig schöpffer meines leibs uber
mich verhengt das Ich In alle heusern dem herenn Bischoff In Breslaw will Innehaben gebenn damit sein lieb Innenn dieselb meine nach
gelassene herschafft wisse unnd versichere aber wo nach gots verhengnus ein schnel(er) todt uber mich begegne so soll unnd wil Ich doch meinem
Ambtman auff dem schloß In oppel unnd danebenn zu dem Burgermeister unnd Rath In oppel In beiwesenn meiner Rethe sigent daruon
verfassenn damit sy dasselb auch an alles seumenn Innehaben unnd Inbehaltenn sollen schuldig sein auff das es khuniglicher maiestat darumb raths
dann nach muge verendt werdenn wiewol ich mir solichs wol bedingt unnd außgeczogenn habenn weil ich lebe das ich aller derselbenn meiner
herschafft unnd khainat nichts minder dann vorhell unnd will mechtig unnd gewaltig sein damit als mit meinem aigen proper gut thuen
unnd Inlassenn hab so offt unnd wo mirs gefellt an seiner khuniglicher maiestat unnd meniglich ungehindert allein nach meinem todte wo
Ich nit leibs erben menlichs oder weiblichs geslechts hinter mir verliesse so wil der vermelltenn herschafft unnd khainat nach
stellich beleibenn das sol seiner khuniglicher maiestat an alles mitt Ingeeigent sein unnd haimfallenn gancz treulich ungeuerlich
unnd ungeserlich In sonderheit verspreche unnd globe ich bey meinem christenlichen unnd furstlichenn waren wortenn so bald ich heim
kume das ich dy amptleute von all meinen schlossenn wo mich beschaidenn wil dieselbenn notturfftigclich einnemenn unnd verpflichttn wem
got denn todt uber mich verhengt das sy dieselbenn schlosse treulich halttenn Innhalttenn die Ingesessenn leuthe einbeuttenn unnd nuczunge
von landt unnd stetten einhebenn unnd das meine schlosse nucz gult unnd einkomen Irer khuniglicher maiestat unnd allen nachkhumffti
genn khunigenn In Behem In ire gewalt unnd Inhabenn nach meinem tode abgetrettenn unnd eingeleumt werdenn doch meinglich sein
gerechtikait furbehaltenn Zu urkhundt hab ich mein offentlich(es) Insigel mit meinem guttenn wissenn an diesenn brieff henckenn la
ssenn der gegebenn ist In oppel am tage marie magdalene Nach cristi geburt Tausentt funffhundert unnd In dem Acht unnd
zwainczigistenn Jare