Ich heinrich der Junger herr von Schwambergh vnd auff dem Pffreimberge Vor mich meyne Erben erbnemen vnd nachkumen vor menigklich bekenne wiewol ich vor
ruckhter Jare neben dem wolgebornen meynem freuntlichen lieben Brudern hern Adam herrn von Schwambergh (et)c(etera) von wegen vnser auch an stadt der andern
vnserer der selben zeytt vnuortayllten gebrüeder angesehen die vnderthenigen vnd getreuen dienste Szo der Erbar Vengel Schmid Burger züm Pffreim
berge vnserm lieben hern vnd vatter seligen volgend auch vns gebrüedern willig gethan Ime auff sein vndertheniges ansuchen die Loe Muel sampt
der selben drey vogelern eyn vnd zügehörung mitt ettlichen Artickeln befreydtt begnadet vnd priuilegirt fuernemlich das alle wassergenge prünnen prün
quellen vnd teüchle der selben flüsse an dem pfreimberg vmbher von eyner wisten zü der andern biß die wassergenge die muelstatt erraichen alle wochen
von Sonttage zü vesper zeytt anhebende biß widder auff den Sonnabentt zü vesper zeytt vnuerhindert vnd vnabgeschlagen des flüsse vnd wasser
leüffs haben sollen In solchem niemandes obgemelten Vengel Schmid seinen erben erbnemen vnd nachkumen einiche verhinderung thuen solle
wurde aber sich Jeman solchen wasser flüssen Jemandes darwidder einlassen soliche fluesse zustellen oder aber In der wochen abschlagen vnd solichs
uff den selben durch besichtigung bezeuget wurde der selbe oder die selben solten der Obrigkeit an alles mittel ein Scheiben salz zur straffe zü
geben verfallen sein Auch solle der alte herkumende wege vnd steig zü der muele vnuerhindertt sein Eweyl ich aber obgenannter heinrich herr von
Schwambergh mitt meynem brüedern nach rath vnserer hern vnd freunde vortaylet vnd die heimb hoffmessigkeyt vnd obrigkeytt der obange
zenen Loe mül sampt den vogelern auch anderer zue ein vnd zügehörung In gedachter taylunge vnder andern an mich kumen Szo habe ich Jne In
ansehung seiner vnderthenigen dienste damitt ich Jne gegen mir geflissen gespüert sich dessen auch furbas In nach allen seinen vermügen zübe
fleissigen erpotten den vorigen von wolgedachtem meynem Brudern hern Adam vnd mir außgangenen begnadungs brieffe vnder beider vnsern
anhangenden Insigilln bekrefftiget den datum den Monttage nach der heilig drey künig tage nach cristi vnsers selig machers geburth Tausent
funffhundert vnd Im viertzigisten Jare haldet bestettiget confirmirt vnd ratificirt bestettige confirmir vnd ratificir den selben auch hiemitt vor mich
alle meyne erben erbnemen vnd nachkumen vnd noch vber das Auß sundern gnaden erlasse ich Jm seinen erben vnd nachkumen zü ewigen zeytten die
pflichtigen zinsse die zweintzigh groschen szo er vns vnd mir vorhien von bemelter loe mül Jherlichen züraichen schuldig gewest ferner das er s(eine) mülge vnd
macht haben soll ecke vnd wisen an der Naab gehaubt dz der selben gegend vmb her künstlichen zü sich züperingen weyer schütten pessern vnd nütz
schaffen nichts auß geschlossen zü eynen freyen vnbeschwerten vnd vngmüthaern guett from aller beschwärung wie In oder ausserhalb rechtens am be
stendigisten gescheen sol künte oder mocht dasselbe hinfürh an alle fron vnd scharwerck frey zü geniessen züverkauffen züverwechseln züverpfenden
züvergeben vnd zümacht hafften bey gesündem leibe oder am todt peth vnd damitt zü thüen vnd zü lassen als mit eynem freyen guett Außgenümen
was die landt steüer vnd herschafft belanget dar Jnnen sol er sich szo offt es die notturfft erhaischet den andern befreitten guettern gemees verhalten
Alles getreülich vnd ongeferlich des zü warer vrkunt habe ich meyn angeborn Insigill an dißen brieff thuen hengen vnd mich mit aÿgner handt vnder
schriben Auch darneben erpetten den wolgebornen meynem freünttlichen lieben hern bruder hern Zdenko von Schwambergh vnd auffm Erbek
auch den Edlen vnd Ernuesten Jhan von wyderßpergh vnd auff Mütterßdorff das sie Jre angeborne Insigil zü gezeugknis auch nebendas meyn
an dißen brieffe gehengt welchs wier Zdenko herr von Schwambergh vnd Jhan von wyderßpergh also gescheen bekennen doch vns vnser erben vnd
Insigel ane schaden Geben vnd gescheen den Monttag nach Sandt Georgen tage Nach cristi vnsers seligmachers geburth Tausent funffhundert
vnd Im sechs vnd funfftzigisten Jare
hendricus Jünner de Schwamberch
manu propria