Wir Ferdinand der Dritte von Gottes gnaden Erwöhlter Römischer Kaiser
zu allen Zeitten, Mehrer deß Reichs, in Germanien, zu Hungarn, Behemb, Dalmatien, Croatien, vnd Sclauonien (etc.) König. Ertzhertzog zu Osterreich, Marggraff zu
Mähren, Hertzog zu Lucemburg vnd in Schlesien, Vnd Marggraff zu Laußnitz. Bekennen offentlich mit disem Brieff, Vnd thuen khund allermänniglich, wie wahl Wir auß Röm(ischer) Kaiser(licher) Vnd Königlicher
hohe, vnd würde, darein Vnß Gott der allmächtige gesetzt, auß angeborener guette Vnd mildigkeit iederzeit geneigt sein, aller Vnd ieder Vnserer gehorsamben Vnd getrewen Vnderthanen Ehr, Nutz, aufnehmen, Vnd bestes zübetrach=
ten Vnd zübefördern, so seindt Wir doch billig mehrers gewogen, die ienigen welche Vnß vnd Vnserm hochlöblichen Ertz Hauß Osterreich, Vor allen andern, mit getrewer Vnd gehorsamber dienstbarkeit, anhängig, Vnd zügethan seindt, mit
sondern Ehren, würden Vnd gnaden zü bedenckhen. Wann Wir dann gnadigst angesehen, wahr genohmbn Vnd betracht, die gütte qualiteten, Tugend, Vernunfft, vnd geschicklichkeit, damit Vnß der Gelehrte Vnser
lieber getrewer Adolph Hammar von vnd zür Schreyburg, beeder Rechten Doctor, berühmet worden, insonderheit aber die getrewe, gehorsambe, vnd willigste dienste, so Vnß, vnd Vnserm hochlöblichen Ertz Hauß Osterreich
Er in Vnderschiedtliche wege gantz Vngesparten fleißes beweiset, Vnd erwiesen, nit weniger solches hinführo zü thuen erböttig ist, auch wohl thun khan, soll, vnd mag. So haben Wir mit wohlbedachtem Mueth, güt= Vnd
Rath, vnd rechten wissen, gedachten Adolph Hammar, von vnd zür Schreyburg zü Vnserm Königlichen Rath, gnadigst gewürdiget, an= vnd aufgenommen, erheben aüff vnd würdigen ihne, darzue hiemit wissentlich Vnd
in Crafft dieses brieffs, mainen, setzen, Vnd wollen, daß Er nun hinführo Vnser Rath sein, Von männiglich darfür gehalten, erkant, geehret, genandt, Vnd ihme solcher Titul, auß allen Vnsern Cantzelleyen, Vnd sonsten gegeben, vnd
geschriben werde, darzue auch alle vnd iede Ehr, Würde, vnd Vortheil, freyheit, vnd gerechtigkait, wie andere Vnsere würckhliche Räthe haben, Vnd sich deren erfrewen, gebrauchen, nutzen, Vnd geniessen soll vnd mag, Von allermännig=
lich vngehindert. Jedoch solle Er dargegen Vnsere gehaimb, die ihme anvertrawet werden, biß in seine grueben zü Verschweigen, auch in sachen vnd geschäfften, darzue Er ins künfftig, gebrauchet werden möchte, Vnß seinen güt=
ten Verstandt nach, daß beste einzuethen, Vnsern nutz, Vnd fromben zübefördern, allen schaden, vnd Nachtheil züwarnen, Vnd züverhuetten schuldig sein, auch sonsten ins gemein alles daß ienige thuen, waß einem getrewen Rath
gegen seinem Herren züthun gebühret, vnd geziemet. Hierauf den dan Vnser gnadigstes Vertrawen, in seine Persohn gestellet ist. Mit Vrkhundt diß brieffs, besigelt, mit Vnserm Kaiser(lichen) Vnd Königlichen anhangenden grössern
Insigell, der geben ist auf Vnserm Königlichen Schloß zü Prag, den andern Monats Tag Augusti, im Sechtzehenhundert Sechs vnd Viertzigsten, Vnsers Reichs deß Römischen im Zehenden, deß Hungarischen im Ein vnd zwaintzigsten,
Vnd deß Behmischen im Neünzehenden. Jahr.
Ferdinandus