Wir Heinrich von gotes gnaden Herzog zu Slesie. und H(er)re zu Glogow und zu Sagan, tu(e)n chunt und
bechennen offenbar mit disem brief, allen den di in sewen, und her nach chunftig sein. Daz wir mit
bedachtem mu(e)t und mit gu(e)tem willen unbetwungen, globt haben und loben mit gu(e)ten trw(e)n an aller
arge list fu(e)r uns und unser erben und nachchomen, Dem Hogebornen fursten, H(er)rn Karlen, unsers
gnedigen Herren, H(er)rn Johans Chunges zu Behem, Erstgebornem sune, Margrafen zu Merh(e)n, wenne
er nach seines vat(er)s tod, den got noch lange friste, Chung wirt zu Behem, daz wir danne alle
unser lande di wir nu haben od(er) noch gewunnen, di zu lehen gen von dem Chunreich zu Behem
wellen und sullen von im zu rechtem lehen nemen und enphahen, und im danne warten, und gegen
im, allez daz volfuren, halden, und volbringen, des wir uns gegen uns(er)m vorgenanten Herren dem
Chung seinem vat(er), hewt an disem tag, mit and(er)n uns(er)n briefen haben v(er)lubt und v(er)punden,
und dar ube geben wir disen offen brief v(er)sigelten mit uns(er)m hangundem Jnsigel, Geb zu Prag
an sand Clementen tag, nach Cristes geburd, Dreutzehenhund(er)t Jar, in dem vierundvirzigisten Jar(e)