Wir Taute von Swa(r)nprunn Haben und Albreht von Hertenberch bekennen offenlich mit disem brief und tun chunt allen den die in sehent horent oder lesent Daz daz Haus ze Hertenb(er)g
in dem chunigreich und Lande ze Beheim gelegen ist und laut und ez unser Erben und vordern und nu wir von dem selben chunigreich und chunge ze Beheim zu rehtem Lehen hetten
und haben mit allen den dorfern Guten und Nutzen die hie nach geschriben stent Gossengrun Loeh Vmberg Adelberg Kuntz leins wendisch dorf Lupsergrun Radwengrun Sverd
Obernhoyenneut Luterbach und halbtayl des dorfes zu dem Hornn mit Hantwerhen des Hleis des zway tayl zu dem selben Hause gehorent mit Gerihten und gewalt des Gerihtes mit
Cynsen an pfenning an Waytze an korn an Habern und an Huen(er)n oder and(er)n fruhten wie sie genant sein oder namen haben Akkern welden pergen talen und gesuhen weiden puschen wispeln
Jagt und weyden wazzer wazzerleiten wayden Seen vischwaiden und vischerein mulen Eysenhamern und smarhteten und gemainhait mit allen nutzen ob der Erden oder dar under sie sein genant
oder furba(z) werden Nu hat der allerdurchleuchtig furste unser gnedig(er) h(er)re h(er)r Karl von gots gnaden Romisch(er) chunig ze allen zeiten mer(er) des Reichs und chunig zu Beheim angesehen unsern getrewen
dienst den wir im gebitehch getan haben und furbaz tun sullen und wellen darumb er uns sunderlich begnadet hat mit zwain tailen des vorgenanten Hauses ze Hertenb(er)g als wir daz von im
und seinen vord(er)n Behaim chungen ze Beheim ze Lehen haben gehabt Als hat er ez uns nu anderwaid gelihen und Lehen vernewet mit allen den Guten dorfn Gerihten Cynsen korn
gulden Akkern welden pergen talen und gesuhen weiden puschen wispeln Jagt und weyden wazz(er) wazzerleiten wayden Seen vischerein und vischwaiden mulen Eysenhamern und
Eysenhamsteten mit Hantwerhen und gemainhait mit allen nutzen die zu den vorgen(anten) zwain tailen des vorgeschriben(n) Hauses gehoren sie sein ob(er) oder under der Erden als wirs vor von im ze
Lehen hetten empfangen haben und empfahen an disem gegenburtigen brief von uns uns(er)n Erben und Nachkomen zu rehtem Lehen und aigenlich mit sulher vreyhait und nutzen als
wir die biz her gehabt und besessen haben Also beschaidenlich daz die selben zwai tail des Hauses ze Hertenb(er)g dem vorgen(anten) uns(er)m gnedigen h(er)ren seinen Erben und Nachkomen chungen zu Beheim
offen sullen sein und wir in da mit beholfen sein sullen zu allen seinen noten und noht und daz sein dyner und sein volck ir sein veint oder vil auz den selben uns(er)n zwain tailen ain
und auz reiten und sich mit den beholfen wenn oder wie dick in dez not ist uf all(er) menhch der da lebt niemant auzgenumen Auch sulln wir auf den selben uns(er)n zwain tailen cheynen turnen
kasten oder kemnaten pawen ez sey danne unsers vorgen(anten) herren oder seiner Erben und Nachkomen chunig ze Beheim gut wille und wort und mit iren laube Hat auch uns oder unser
Erben und Nachkomen iemant anzesprechen umb div gut die zu den vorgen(anten) zwain tailen gehoren oder an and(er)n sachen waz die weren dar uber sullen wir entwurten vor uns(er)m vorgen(anten) herren
seinen Erben oder seinen Nachkomen oder wen er uns von seinen gnaden ze Riht(er) gibt wir geloben auch fur unser Erben und Nachkomen wenn si dar zu komen daz si die vorgen(anten) Lehen
mutzen und sullen besitz(en) daz si auch fur uns(er)n Herren den chunig sein Erben und Nachkomen komen sullen und ire Lehen empfahen und sulhen gelubden als vor geschriben stet und auch das
sweren ze halten als wir gesworen haben daz wir dise vorgeschriben gelubde stuck und artickel stet und gantz halten ewichlich an arglist Auch haben wir fur uns und unser Erben und Nachko=
men daz uns(er)m vorgen(anten) Herren dem chunig seinen Erben und Nachkomen ainen ayd gesworen unser hande uf die hailigen geleyt und mit uns unser lieb frunde und vettern h(er)r Engelhart von
chungswe(r)t h(er)r Wytig von chungswe(r)t gesazzen ze Sandow und h(er)r Johans Bryesner von pynck die unser purgen auch darumb worden seint Wer aber daz wir bruchig wurden an den
vorgeschriben artickeln und stucken oder an ir ainem daz got niht geb so sullen wir niem(er) erlos rehtes und triwlos sein und sullen uns(er)m obgen(anten) herren seinen Erben und Nachkomen chungen
ze Beheim unsere vorgeschribene Lehen veruallen sein und sullen und mugen uns unser Erben und Nachkomen in allen steten aigen(n) an dorfn oder vesten welher slah die sein an alles ge=
riht angreiffen an Leib und an Gut und da mit tun nach iren genaden Und diser vorgeschriben(n) gelubde Red und artickel ze Urkunde und sicherhait haben wir unsere Insigel an disen
brief gehangen Und wir obgenant(en) Engelhart und Wytig von chungswe(r)t und Hans Bryesner von pinck bekennen offenlich an disem brief daz wir fur unser obgenant(en) frunde
und vettern Tauten Habarten und Albrehten von Hertenberg purgen und mit in selbscholn worden sein und werden an disem brief aller der vorgeschriben(n) gelubde und Rede und uns
mit in verschriben und verbinden mit disem brief daz si und ir Erben und Nachkomen die selben stuck artickel und rede und auch gelubde stet und gantz halden ewichlich an argelist
und haben auch daz mit in ainen ayd gesworen uns(er)m obgenanten herren dem chunig seinen Erben und Nachkomen und unser hand geleyt uf die hailigen Und zu ainer mereren vestenung diser
dinge haben wir durch bet willen uns(er) frunde und vettern und auch durch unsers gelubdes und ayds willen unsere Insigel mit sampt den iren an disen brief gehangen Der Geben ist ze prage
Nach christus geburt Driuzehenhundert Jar und in dem funfzigistem Jar an dem nehsten Sunnabent vor dem obersten tag