Wir Ludwig vnd Ludwig gebrüder der Romer von gots gnaden Margrafen ze Brandenburg vnd ze Lusitz des heiligen Römischen Reichs Oberstkäm(er)er pfalzgraven bei
Rein vnd Herczogen in Beyern Bekennen vnd tun kunt offenlichn mit disem brief Allen den die in sehen horen oder lesen daz wir mit wolbedachtem mute vnd mit Rät
vnsir getrwen vnd ouch mit rechter wizzen für vns all vnsir brüder vnsir vnd ir erben vnd nachkomen Margrafen ze Brandenburg ewiclichen vns verczigen
haben vnd verczehen Aller der rechten Anredung vnd Ansprache ob wir dheine als Margrafen ze Brandenburg vnd ze Lusitz gehabet haben vnd haben oder
gehaben mochten zu dem Lande ze Budissin vnd ze Gorlicz vnd zu den Steten Luban Lubaw Camencz vnd and(er)n Steten Lehen Mannen Manscheften Wiczpilen
vnd kreiczen die darczu gehornt geistlichen vnd werltlichen Vnd beinämen zu den Edeln herren h(er)n Vlrichen von Pak von Strow vnd zu dem Lande ze Sa
raw vnd h(er)n Albrechten von Hakemborn vnd seiner herschefte vnd ir beider erben vnd nachkomen ewiclichen Als waz do selbest der allerdurchluchtigiste fürste
vnd vnsir gnediger herre her Karl Römischer kung ze allen zeiten Merer des Reichs vnd kung ze Behem innehat vnd die hochgebornen fürsten vnd h(er)ren
her Johans etwenn kung ze Behem sein vater selig(er) vnd her Heinrich weilent Herczog zu dem Jäwir vnsir Ohem seliger innegehabt vnd besezzen habent
Vnd geloben mit guten trwen on geuerd für vns vnsir brüder vnsir vnd ir erben vnd nachkomen Margrafen ze Brandenburg mit geswornem eyde den
wir daruber zu den heiligen getan haben daz wir den vorgen(anten) vnsirn lieben gnedigen herren sein erben vnd nachkomen kung ze Behem an den vorgen(anten) Landen
Budissin Gorlicz vnd den Steten Luban Lubaw Camencz vnd and(er)n Steten Lehen Mannen Manscheften Wiczpilen vnd kreiczen vnd allen zugehörungen
geistlichen vnd werltlichen vnd beinämen an den vorgen(anten) h(er)n Vlrichen von Pak von Strow h(er)n Albrechten von Hackemborn iren erben vnd nachkomen
vnd allir zugehörung nicht hind(er)n beschedigen ansprechen noch betrüben wellen Vnd geloben mit guten trwen on geuerd vnd mit den vorgen(anten) geswornem
eyde daz wir noch den vorgen(anten) Landen herren Steten Mannen Manscheften vnd allen zugehörungen als vorgeschriben stet nymmer gesten wellen noch
sullen mit Ansprache Anredunge noch mit dheinen sachen geistlichen oder werltlichen wie man die genennen mag Ez sullen ouch all brief vnd hantfesten
die wir von vnsirn väter seligen oder von ymand andirs darubir haben vnbrefte vntüglich vnd allir sachen absein vnd dem vorgen(anten) vnsirn gnedigen
herren seinen erben vnd nachkomen kungen ze Behem keinen schaden bringen wann wir vns mit wolbedachtem müte vnd mit guten räte verczigen haben
vnd verczehen genczlichen für vns vnsir brüder vnsir vnd der selben vnsir brüder erben vnd nachkomen Margrafen ze Brandenburg ewiclichen allir d(er)
selben hantfesten vnd briefe ob dheine ze liecht quemen oder fürbracht würden In vrkund ditz briefs versigelt mit vnsirn Jnsigeln der geben ist ze Bu
dissin nach Cristes gebürt drewczehenhund(er)t Jar vnd darnach in dem funfczigsten Jare an dinstag nach dem Sontag als man singet Jnuocauit