Wir Ludowig von Gots gnaden Marggraf ze Brandenburk vnd ze Lusicz des hailigen Römischen Reichs oberster Kamerer Pfalczgraf bei Rayn Herczog in Payrn
vnd in Kärnden Graf ze Tirol vnd ze Görz vnd Herr der hochäwser Aglay Triend vnd Prichsen Veriehen vnd tůn chunt offenleichen mit disem brief daz
wir für vns vnd alle vnser brüder auf den Freytag vor Judica als diser brief geben ist dem allerdurchleuchtigisten Fürsten vnd vnserm gnadigen Hern Hern
Karln Römischem Künig ze allen zeiten merer des Reichs vnd Künig ze Pöhaim getrewleich vnd warhaftigleich daz hailigum des hailigen Reichs vnd
die chlaynod die da bei sind benennen ain guldin Crücz geziert mit edeln gestain vnd pärlein gancz vnd vnueruckt vnd in dem selben Crücz ist das
Sper vnd ain Nagel vnsers Hren Auch ist darinne ain stück des hailigen Crücz Ein zan sant Johans des tauffers in ainer Cristallen vnd sant Annen Arme
Auch sind da besunder zwai swert das aine sant Mauricien vnd das ander sant Karls mit vergulten schaiden Auch ist da bei besunder gancz vnd vnueruckt
des egenanten hailigen Kais(er) Karls guldin Krone mit dem pogen vnd den Crücz die darauff gehoernt geworcht von mangem edeln gestaine vnd golde
darinne ist besunder geworcht ain edel stain den man nennet den waysen Auch ist da ain weizer Rock sant Karls an den ärmen geworcht mit gestaine
vnd mit pärlein vnd ain gämtel sant Karls mit zweyn guldinen Lëwen geworcht von golde von gestaine vnd von pärlein Auch ist da kain guldin apfel
mit ainem guldinen Crücz sant Karls vnd zwen seiner hantschuch mit gestaine mit pärlein vnd mit golde vnd ain silbrein zeptar Auch ist do ain
groz vingerlein mit ainem grozzen rubin vier grozzen saphyr vnd vier pärlein das ist dar chomen von ainem Herczog von Brünswig Auch ist do ain
ander vingerlein mit ainem rubin vnd drey guldain sporn Auch ist do ain vergulter apfel mit ainem Crücz vnd ain vergult zeptar Ein guldain rauch=
vaz zway sinnwelle stück wachs vnd ain worm apfel Auch ist do ain plawer rok geworcht an den ärmen mit golde vnd mit pärlein vnd ain
ander Prawn Rock mit swarczen adlärn vnd ain Cugel zwen hantschuch vnd zwen schuch der selben värbe Auch ist do ain stol geworcht mit
golde gestain vnd pärlein vnd ain ander diuualtigiv stol Auch ist da ain silbergults schreinlein darinne ist ain demonstracio vnd ain Cristalle
mit hailigum vnd ain guldin ledig cruglein das vns besunder vnser l(ie)b(e)n H(er)r(e)n vnd vater Kais(er) Ludowigs säligen Gedächtnussen an minner=
nung vnd vnueruckt angeantwurt haben in alle der maze Als vns das selb hailigum vnser vorgenant liber H(er)r(e) vnd vater Kais(er) Ludowig sälig
gelazzen hat vnd das nemen wir auf den ayt vnd huldunge die wir dem hailigen Römischen Reyche gesworn vnd getan haben Mit vrchunde
disz briefs der geben ist ze München nach Crists geburt Dreuczehen hundert iar vnd darnach in dem funfczigisten iare an Freytag vor Judica