Wir Albreht von gots gnaden furste ze Aschamen vnd Graue von Anhalt geloben mit guten twen an geuerd fur
vns vnd fur den Erwirdigen vater in got h(er)n Otten Erczbis(chof) ze Meideburg vnd fur die hochgebornn fursten h(er)n Rudol
fen herczogen ze Sachsen des heiligen Romischen Reichs obirster Marschalk h(er)n Ernst herczogen ze Brunswig des
Langreuen von hessen eydem h(er)n woldmar Grauen von Anhalt vnsern lieben bruder h(er)n Rudolfen den Jungen herczo
gen ze Sachsen vnd alle andir vnser frunt vnd helfer wie die genant sein dem Allirdurchluchtigsten fursten
vnd herren h(er)n Karl Romischem kung ze allen zeiten Merer des Reichs vnd kung ze Behem vnsim lieben gnedigen
herren daz wir mit dem hochgebornn fursten h(er)n Ludwigen pfaltzgrauen bei Rein vnd herczogen in Beyrn seinen
Bruder vn(d) mit den hochgebornn fursten vnd h(er)n fridrichen Marggrauen ze Meyssen den herczogen ze Stetin von Sun
de ze Lunemburg von Meckelnburg vnd andirn seinen frunden vnd helfr(e)n wie die genant sein vnsern widirsach(e)n
in der Marken zu Brandemburg vnd mit allen den die sie an gehorn vnd mit in sein einen steten ganczen fride
halden vnd haben wellen vntz uff sanct Johans tag Baptisten der schirst kunftig ist. Ouch geloben wir mit guten
twen an geuerd daz wir mit vnsern Amptluten vnd houbetmannen schaffen vnd bestallen wellen daz d(er) selbe fride be
statzt vnd gewisset werde so wir schirst mugen mit sulcher bescheidenheit wo vnd als snelle d(er) selbe fride
bestatzt wirt daz er sich danne zuhant anheben sulle. Gebn ze Prage noch criste geburt druzenhundirt vnd dar noch
in dem einvndfunfczigstem Jar des nehisten fritags fur sanct Vrbans tag.