Ich Wilhalm von Hoen Rechperg verich und tůn kunt offenlich mit disem briue daz ich dem aller durchleuchtigisten
fursten und herren hern Karl Romischen kunige ze allen zeiten mer(er) des Ruchs und kunige ze Beheim
meinem lieben genedigen herren gelobt habe und gelobe mit guten truwen one geuerd daz ich im alle
brife die mein vat(er) selig(er) von im gehabt hat uber die staur ze Ulm wider geben wil zwischen
Weynechten die schirist kunftig sein und ob ich des nicht tete oder sust deheinerley summu(n)ge darin
keme so bekenne ich mit meinem guten willen daz die selben briue ob si ymmer zu liehte k(a)men
untuglich und unkreftig sein und wesen sullen und daz sie dem obgen(anten) meinem herren oder seinen nach
komen Romischen keysern und kunigen und ouch den kunigen ze Beheim keinen schaden bringen
sullen Mit urkunde dicz briues versigelt mit meinem Ingesigel Der geben ist ze Prag do
man zalt nach Cristes gepurt Dreutzchen hundert Jar dar nach in dem zwei und funfzigistem jar
an dem nehsten Montag nach sants Michels tag