Wir Räture vnd die gancz gemeinlich der stäte zu der Sweydnicz bekennen vnd tun kunt offenlich mit disem briue allen den die in sehen oder horen lesen wann der hochgeborn furste vnd herre her Bolke herczog zu Slezien vnd herre zu furstenberch zu Sweydnicz vnd zu dem Jawr vnser lieber gnediger herre mit wolbedacht
tem mute mit gutem willen vnd mit rate siner getruen manne angesehen hat die besunder fruntschaft vnd liebe vnd ouch die sunderliche truwe do mitte er die allerdurchluchtigste furstinne vnd frawe frawen Anna Romissche kunginne zu allen ziten mererinne des Riches vnd kunginne zu Beheim eewenn seliger
gedechtnisse herczogen Heinreichs vnsers herren sines bruder tochter vnser gnedige frawe begriffen hat vnd von angeboren gute fruntlichen meinet vnd hat ir der obgen(anten) vnser frawen vnd ires libes erben ludis geslaffte die sie mit dem allerdurchluchtigsten fursten vnd herren h(erren) Karln Romisschen kunige zu allen
ziten merer des Riches vnd kunig zu Beheim gewinnet alle sine furstentum herczogtum vnd herschafte zu d(er) Sweydnicz vnd zu dem Jawor mit allen iren steten vesten vnd zugehorungen geschenket vnd geuberg(e)b(e)n in all der maze als in sinen furstlichen briuen daroch begriffen ist in semlichen lute Wir
Bolke von gots gnaden herczog von Slezien herre von furstenberch zu der Sweydnicz vnd zu dem Jawr bekennen vnd tun kunt offenlich mit disem briue allen den die in sehen oder horen lesen daz wir haben angesehen die sunderliche gnade vnd sunderliche gunst des allerdurchluchtigsten fursten vnd herren h(erren)
Karls Romisschen kunigs zu allen zeiten merer des Riches vnd kunigs zu Beheim vnsers lieben gnedigen herren die er vns vnd vnsern geslechte bewiset hat mit der hohschaft die geschehen ist zwisschen im an einem teil vnd der durchluchtigen furstinnen frawen Annen d(er) Romisschen kunginnen vnd kunginnen zu Be
heim vnser lieben frawen vnd mumen eewenn herczogen Heinreichs seligen vnsers bruder tochter an dem andern teil darumb gebn machen vnd schenken wir der obgen(anten) vnser lieben frawen vnd mumen als einer kunginnen zu Beheim vnd ires leibes erben die sie mit obgen(anten) vnserm herren dem kunige haben wirdet vnser her
czogtum furstentum vnd herschaft zu d(er) Sweydnicz vnd zu dem Jawor mit den steten Sweydnicz Strigow Hayn Landishut Reichenbach Nympesch Jawor lewemberch hussperch Bunczlaw vnd Boberen mit den vesten vnd merkten Greiffenstein Greiffenberg len Schonow klesschpurg Hornsperch vnd kynspurg
mit allen zinsen zinsphlichten lehen lehenphlichten furlehenten guten gerichten czollen aczungen cinsen gulden steygen Wychpilden furstlichen pfründen vnd gotzgaben welden puschen bergen slüchten wazzern wazzerlouffen molen wisen weyden getreide vngelt(e)n rechten nuczen gewonheiten vnd allen zugehorungen
wie man die benennen mag mit sunderlichen worten inbegriffen angenomen In all der maze als wir es yczunt haben vnd hie noch mit rechte zu vns brengen mochten In sulcher bescheidenheit Ee daz sache daz wir von gots obenhange also absterben daz wir ehliche leibes erben mannes geslechte hinder vns nicht
liezen daz denne die obgen(ante) vnser gnedige frawe vnd liebe mume vnd ires leibes erben die sie mit vnserm herren dem kunige haben wirdet als davor geschriben stet dieselben vnsere herczogtum furstentum herschafte lant lute vnd all ires zugehorunge als davor begriffen ist erben vnd besiczen sal genczlichen vngehindert
vnd do mitte tun vnd lazzen nach ires willen als mit irem rechten erbe vnschedlich doch der hochgebornn furstinnen frawen Angnesen vnser ehlichen wirtinnen in irem leibgedinge wenn sie all die vorgen(anten) furstentum lant vnd herschafte mit allen nuczen haben vnd besiczen sal nür zu iren lebtagen Wer aber daz wir
mit gnaden gots ehliche leibes erben mannes geslechte gewunnen so sullen dieselben vnser erben d(er) obgen(anten) vnser frawen vnd mumen oder ires leibes erben ob sie nicht were siben tusent schog groz pfenninge pragersch muncze mit getruwem gelde betrichen vnd bezalen oder die vesten lewemberg vnd Bunczlaw mit
denselben vesten rechten nuczen vnd zu gehorungen zu rechtem pfande seczen als lange vncz daz sie die obgen(anten) sibentusent schog genczlichen betrichen vnd bezalen vnd damitte sullen denne dieselben vnser erben bei den obgen(anten) vnsern furstentumen herschaften vnd landen vngehindert bliben Wer ouch daz wir
ehliche leibes erben mannes geslechte nicht hetten vnd doch tochter liezen so sullen die obgen(ante) vnser liebe gnedige frawe od(er) ires leibes erben die sie mit vnserm herren dem kunige gewinnet yclicher vnser tochter czwehen tusent schog grozzer pfenninge geben vnd sie bestaten noch vnser gewonheit als
geborn fursten kinden Ouch haben wir gelobt vnd getedingt Ee daz sache daz die obgen(ante) vnser ehliche wirtinne vnser tot gelebte daz sie dann noch der zeit vnsers todes keinen burggrauen pfleger oder amptman vff vesten husern in steten oder in landen seczen noch ab wechsseln sol ez sie dann daz sie
einen biderman der do geloupt gut vnd gewisz sei von ersten an sein stat secze an dem der obgen(anten) vnser frawen od(er) iren erben moge billichen genugen vnd daz derselbe zutun swer aller gelubde eyde vnd trwen ibunden habe d(er) obgen(anten) vnser frawen d(er) kunginnen oder iren erben geleich sinen wirtsin
In des stat er geseczet wirdet Wer ouch daz die obgen(ante) vnser gnedige frawe vnd liebe mume wärtode des obgen(anten) anevalles e wann sie in gewer keme also sturbe daz sie leibes erben mit dem obgen(anten) vnserm herren nicht gewunne so sullen alle man stete knechte burggrauen burg vnd allez lantses
zen allir ir obgen(anten) eyde vnd gelubde ledig sein doch in sulcher bescheidenheit daz dem obgen(anten) vnserm herren dem kunige vnd sinen erben daz obgen(ante) theil vnd herschaft der obgen(anten) siben tusent schok geuallen sal oder mit pfanden gesaczt werden in all der maze als davor begriffen ist daz sie do
mitte tun vnd lazzen noch ires willen vnd daz geben wem sie wellen Wer ouch daz die obgen(ante) vnser frawe vnd mume den obgen(anten) vnserm herren den kunig vber lebte vnd einen andern man neme an vnser danc vnd willen so sullen beide sie der man vnd alle kint die sie mit im gewinnet in den obgen(anten)
vnsern furstentumen vnd herschaften nichtes haben Ouch ist geredet vnd getedingt daz die obgen(ante) vnser frawe die kunginne vnd vnser liebe mume noch ymand von iren wegen vns vnd vnser erben mannes geslechte vmb semelich erbteil od(er) vmb keine andir sache anreden oder ansprechen sullen an
ders wenn davor geschriben ist Ouch meinen vnd willen wir Ee daz sache daz vns ehaftige not antreten wirdet vmb geuanknuzze krieg od(er) ander geschefte vns od(er) vnser manne ere vnd leip zu losen daz wir dann theilen vnser furstentum lant vnd lute gewaltig sein zu tun vnd zu lazzen doch
in guten trwen vnd an alle geuer Darnoch swer dem mal daz vns d(er) obgen(ante) vnser gnediger herre mit sulchen sinen gnaden gunstlich vnd fruntlich begriffen hat so geloben vnd wellen wir im mit guten trwen an geuer bygestendig vnd geholfen sein wid(er) allir menlichen nyemand vzzzenemen
vnd in nym(er) vnderwegen zulazzen mit leibe noch mit gute vnd alle seine veinde sullen vnser veinde sein Vnd meinen vnd wellen ouch sime seine vnd sinen od(er) veinde tristen suden od(er) haden in vnsern landen husen steten halden od(er) dreyngen die vns daz recht sein vnd nicht recht tun
wellen die gunnen wir im vnd sinen amptluten daz sie dieselben angreiffen vnd rechtfertigen sullen vnd mogen wo sie d(er) bekomen in allen vnsern herschaften vnd landen zu vrkund dis briues besigelt mit vnserm grozzen Ingesigel der gegeben ist zu der Sweydnicz noch crists geburt dreiczehen
hund(er)t In dem dreyvndfunfczigsten Jar an d(er) nehsten mitwochen noch sant petirs vnd pawils tag d(er) heiligen zwelfboten Dauon durch sunderlich gebot des obgen(anten) fursten vnd herren herczog Bolken vnsers lieben gnedigen herren der vns daz geboten vnd geheizzen hat mit lebend(er) styme vnd in
offembar(er) geczembrister seiner edlen getrwen manne so haben wir mit wolbedachtem mute mit worte gunst wizzen vnd willen der ganczen gemeinsschaft aller vnser mitburg(er) der obgen(anten) alludurchluchtigsten furstinn(en) d(er) Romisschen kuniginn(en) vnd kuniginn(en) zu Beheim frawen Annan vns(er) gnedigen
frawen vnd iren leibes erben die sie mit dem obgen(anten) fursten vnd herren kunig Karl irem ehliche wirte gewinnet gehuldet gelobt vnd gesworn hulden geloben vnd sweren daz wir wem ez zu sulchen schulden komet als davor geschriben stet in vns(er)s herren herczog Bolken briuen ir vnd denselben
iren leibes erben wem sie die mit hilfe gots gewinnet getwe gehorsam wartende vnd indwrtig sein wellen vnd sullen als vnser naturlichen vnd angeboren herschaft in all den punkten meinungen vnd artikeln vnd in all d(er) maze als die obgen(anten) vns(er)s herren herczog Bolken briue sprechent
Ausgenomen doch den artikel d(er) an dem lezten in denselben briuen stet vmb die hilfe die beide d(er) obgen(ante) kunig karl vnd ouch vnser herre herczog Bolke einander tun vnd leisten sullen wann vns dieselben gelubde nicht ane gen vnd zu den andern vns(er)n sachen doruff wir gehuldet vnd gesworn haben
nicht gehoret Ausgenomen ouch der huldunge vnd den gelubden die wir dem hochgebornn fursten dem kunige von polan zu einem pfande getan habe vmb dreitusent vnd funf hundert mark polenisch(er) zal d(er) man vns ledig machen sal vnd vnser briue die wir dar vmb gebn haben wider
schaffen bescheide aber des nicht so sullen wir in d(er) obgen(anten) huldunge gegen polan zu einem pfande so lange warten vncz daz vns in vnsern stät zu d(er) Sweydnicz daz obgen(ante) gelt bezalet wirdet od(er) wir des obgen(anten) geldes huldung vnd gelubde geledigt vnd entworten werden Zu vrkund dis
briues besigelt mit vnser stät Ingesigel d(er) geben ist zu der Sweydnicz noch crists geburt dreiczehenhund(er)t vnd darnoch in dem dreyvndfunfczigsten Jare des nehsten donrstage noch sant petirs vnd pawels tag der heiligen zwelfboten