Wir Ludwig von Hoenloch tun kunt offenlichen mit disem briue allen den die in sehent oder horen lesen das wir den allerdurchluchtigiste(n) furste(n)
vnd herren h(er)n Karl Romischen kung zu allen zeiten merer des Reichs vnd kung zu Beheim vnsern lieben genedigen herren sein erbn
vnd nachkumen aller schult dorumb wir in oder seliger gedechtnizze den hochgebornen fursten h(er)n Johansen ettwenne kunge ze Beheim
seinem vater mit briuen oder sust in dheineweis gemane(n) mocht(e)n vnz vff disen heutigen tag gar vnd genzlichen ledig vnd loz gelazzen
habn vnd quijt vnd auch ledig sagen mit krafft diz briues vnd gelobn fur vns vnser erbn vnd nachkumen mit guten stete(n) eiwen
an geuerde dem obgen(anten) vns(er)m genedigen herren dem kunge seinen erbn vnd nachkume(n) an dem Reiche vnd auch an dem kungrich
zu Beheim das wir suliche schult die sich vff disen heutigen tag vergangen hat nimmer in dheineweis eischen od(e)r vord(e)rn wollen
noch ir leute lemanne des kungrichs zu Beheimen der Graffschafft zu Luczemburg vnd wo sie and(e)rswa in iren herschefften vnde
landen siczen dorumb hind(e)rn pfenden od(e)r vffhalden sullen od(e)r wollen in dheinen zukunfftign zeiten Wer auch sache das furbaz
mer dheinerlei briue sulcher schult zechiechte quemen meinen vnd wollen wir das die genzlich(e)n abesein vnd keine krafft habn
sullen wenn wir sie toten vnd alzemal vernichten in disem briue vsgenumen vns(er) pfantschefften die wir inuehabn von dem
Reiche bei den wir vngescheit beleiben sullen nach laut der briue die wir dorub(e)r habn von dem Reiche an urkunde diz briues
versigilt mit vns(er)m Insigel der gebn ist zu Nurenberg nach crists geburte dreiczenhund(e)rt vnd in dem dreyvndfunfczigistem
Jare an sand Bartholomeus tage des heiligen czwelffboten