Wir Ruprecht der Junger von gots gnaden pfallenczgraue bey Reyn vnd Herczog in Beyren Entbieten allen herren freyen Mannen Dinstleuten Rytteren knechten Aygenn leuten Burgeren vnd gemeinschefften der Stete Schultheissen Gebawren vnd
allen lantsessen Geystlichn vnd werntlichn Armen vnd Reichen dy in den landen kreysen vnd Weichpilden der nachgeschriben vesten Stete vnd Merkte gesezzen sind oder dar inne lehengut oder Erbe besiczend vnser genediclichs hulde
Wann wir mit wolbedachtem mute mit Rat vnser fründe vnd mit rechter wizzen dem allerdurchleuchtigsten fursten vnd herren her Karl Romischem künig zu allen zeiten merer des Reichs vnd künig zu Beheim vnsm liben genedigen hren seinen erbn
vnd nachkomen künigen zu Beheim vnd der kronen des selben künigriches ewiclich vnd awiclich vmb Zwelftausent mark lotiges Silbers da mit er vns von vnsm Vettern von Sachssen geledigt vnd gelöset hat die nachgeschriben Vesten
Newenstat Storenstein Hyrssaw vnd liechtenstain Vnd dar nach vmb zwainczig Tausent mark lotiges silbers dy er vff seliger gedechtnüzze dem hochgeloren fursten hn Rudolffen etwenne pfallenczgrafen bey Reyn vnd Herczogen in Beyren
vnsm liben Vettern vmb wissentlich gewendet vnd im gelihen hat die nachgeschriben vesten Stete vnd Merkte Sultzpach Rosemberch Hertenstein Neydstein Dürrendorf Hyltpoltstein liechtenekke frankenberch lauffen
Eschenbach haspruk Aurbach pegnitz Velden vnd das plach vnd alles daz vnser Vetter der egenant zu Beyren innegehabt vnd besezzen hat mit allen dörferen leuten herschefften Güten Gerichten Rente Gulten Zehenden zinsen
Wildpannen Gulten Zinsen wiczen velden welden püschn Geyden vogelwaiden Wisen weyden wazzeren Mülen wazzerleuffen Teychen Vischerey pergen Gründen Glüchten Gemerken kreynen weychpilden vnd allen nuczen ob vnd vnder
der erden wy man di benennen mag vnd auch mit Ryttern knechten Mannen Manschefften lehen lehenschefften verlehenten guten kirchenlehen vnd Gotzgaben dynsten Aygenn leuten pfantschefften von dem Reiche oder sust von
yemand anders Vnd allen zugehorungen Erbe vnd eygen als es gelegen ist pfantschafft fur pfantschafft Recht vnd redlich verkaufft haben in aller der mazze als sy der obgenant vnser Vetter seliger innegehabt hat vnd
besezzen hat Vnd als sy von seinem tode vff vns ewiclich vervallen waren vnd haben vnd verczihen fur vns vnser Erben vnd nachkomen ewiclichn alles Rechten anspruch vnd anredung dy wir zu den obgenant vesten Steten
Merkten vnd allen zugehorungen als sy do vor begriffen sind gehabt haben haben oder gehaben mochten in dheiner weis Vnd haben vns auch vertzigen aller hilfe Gaistliches oder Werntliches Rechten vnd aller gesetze kayserlich
vnd Bebstlicher Richte der lande gewonheit vnd aller vbnunge vnd behaltnuzze da mit diser kauf mochte in dheinenweis gehindert werden Vnd meinen daz wir vnser Erben vnd nachkomen vns do mit nimer in dheinen
zeiten mit dem Rechten oder mit der tat mit worten oder werken behelfen süllen oder wellen Auch haben wir gelobt mit guten trewn on geuerde fur vns vnser Erben vnd nachkomen dem obgenant vnsm hren dem künig
seinen Erben vnd nachkomen künigen zu Beheim daz wir in vnd der kronen des selben künigriches alle dy obgenant vesten Stete Merkte vnd zugehorung Als sy do vor begriffen sind versprechen vnd entweren süllen
vnd wellen bey namen fur vnser Vettern keyser ludwiges seligen kynden Herczogen Ruprechten den Eldern vnsm Vetter den obgenant vnd fur aller meniclich vnd fur aller anspruch onich igleuchm wi der genennet sey Als
in den landen recht vnd gewonlich ist Dar vmb mit wolbedachtem mute vnbetwungen vnd mit freyer willekür lazzen wir euch allesampt vnd iglichen besunder ledig vnd los aller huldunge trewen gelübde vnd Ayde
da mit ir vns vnsn Erben vnd nachkomen als pfallenczgrafen bey Reyn vnd Herczogen in Beyren vnd der obgenant lande elichen Erben von Todes wegen vnsers Vettern seligen oder sust in dheinenweys verpunden
gewesen seit oder gesein möchtet Vnd weisen euch an den obgenant vnsn genedigen hren den Romischn künig vnd künig zu Beheim sein Erben vnd nachkomen künige zu Beheim vnd an dy Cronen des selben künig
riches Vnd wellen vnd gebiten euch allen sampt vnd iglichem besunder daz ir allesampt vnd iglicher besunder zuhant vnuerzogenlichn vnd on alles hindernüzze von ewr ewer Erben vnd nachkomen wegen ewiclichn dem
egenant vnsm hren dem Romischn künige als eim künig zu Beheim seinen Erben vnd nachkomen künigen zu Beheim vnd der Cronen des selben künigrichs gancz trawe gehorsam vnd volenige vnder tenikeyt geloben
hulden vnd sweren süllet als ewrem Rechten Erbherren vnd in dy selben laisten vnd vollenfuren ewiclichn als ir ewer erblichn herschafft zu recht pflichtig seyt Dar vber zu grözzer ewr sicherheit geloben wir
euch mit guten steten trewen on geuerde daz wir euch allesampt vnd iglichen besunder wenn wir des an mut werden Aller huldunge trewen vnd Ayde da mit ir vns in dheinenweys verpunden gewesen seyt oder
gesein mochtet ledig vnd los sagen vnd lazen wellen mit vnser selbs munde Vnd euch an den vorgenant vnsn hren den Romischn künig vnd künig zu Beheim sein Erben vnd nachkomen künige zu Beheim vnd an
dy Cronen des selben künigriches vnüczogenlichn weisen Mit vrkund ditz briefes versigelt mit vnsm Insigel Der geben ist zu Hagenaw nach Cristus geburt Dreuczenhundert Jar vnd dar nach in dem dreu vnd
funfczigsten Jar des nehsten dinstages nach aller Heyligen tag