Wir Wilhelm von gots gnaden Erczbischof zu Coln des haligen Reichs Erczcanczler in Jtalien Bekennen vnd tun kunt offenlich mit disem briue
allen den die in sehent odir horen lesen Alleine die briue des allirdurchluchtigsten fursten vnd herren hern karls Romischen kungs zu allen zeiten mer
des Reichs vnd kungs zu Behem vnsirs liebin gnedigen herren die er vbir seine pfantschafte der stat vnd des landes zu Eger vnd der vesten floz vnd park
stein vnd waz dorzu gehoret gehabit hat vnd die auch seliger gedechtnisse die hochgebornen fursten ettewenne kunge zu Behem seine Eldirn durch merkli
chir sachen willen von dem haligen Reiche behalden vnd dirworbin haben von widirwert vngeschicht beide verbrennet vnd verlorn sint daz er domite
sein recht nicht bewisen mag als billich were Doch sintdemal daz vns dieselbe pfantschaft wol kundig ist vnd wir sulcher geleginheit wol vnd gencz
lich vndirwisit sein daz die obgen(ante) stat zu Eger mit dem lande vnd die vesten floz vnd parkstein mit allen zugehorungen dem kungrich vnd der Cronen
zu Behem vmb vierczigtusint mark lotigs silbers sechshalbin guldin florenger gewicht fur ye die mark gereytin zu rechtem pfande recht vnd red
lichen von wegen des heiligen Reichs versaczt sint vnd sein Eldirn vnd vorvarn kunge zu Behem in gewere vnd rechter besiczunge derselbin pfant
schafte gewesin sint vnd er noch ist vf disen hutigen tag Des haben wir angesehen die besundire gnade vnd den nuczen fleiz vnd auch die swerli
che arbeit domite der obgen(ante) vnsir herre des haligen Reichs nucz vnd ere getruw lichin vndirstanden hat Vnd haben auch gedracht die merklichen getruw
en dienst die seine Eldirn ettewenne hochgeborne kunge zu Behem dem obgen(anten) Reiche erlichin vnd innglichin offte getan haben Wanne auch daz kungriche zu
Behem ein edles wirdiges gelyet ist der Romischen Cronen So meinen vnd wollen wir sulchen schaden des obgen(anten) kungrichs zu Behem vnrumpfichlichen
vndirsteen durch die besundir truwe domite wir als ein kurfurste dem heiligen Reiche verbundin sein vf die rede daz der obgen(ante) vnsir herre daz selbe seine
kungrich zu Behem durch sulchen zweinilichin beschedigit odir gehindirt werde So bekennen wir mit wolbedachtem mute vnd mit rechtin wizzen daz die
obgen(ante) stat zu Eger mit dem lande vnd die vesten floz vnd parkstein mit acker baw dorfirn mit edlen vnd vnedlen armen vnd reichen lewten vnd allin
zuhorungen die in den gemerken derselbin lande vnd vesten gelegin vnd gesezzin sint des obgen(anten) vnsirs herren als eins kungs zu Behem sein erbin vnd
nachkumen kungen zu Behem vnd der Cronen des selbin kungrichs rechte pfantschaft lange gewesin sint vnd noch sein fur vierczigtusint mark lotigs
silbirs sulchis gewichtes als davor begriffen ist vnd dieselbin pfantschaft bestetigen wir mit rechtin wizzen in allir d' mane als davor begriffen ist
vnd geben dorzu vnsire gunst willen vnd wort als ein Erczbischoue zu Coln Erczcanczler in Jtalien vnd ein kurfurste des haligen Reichs an vrkund
diz briues versigilt mit vnsim Jnsigel Der gebin ist zu Speyr nach cristus geburtte druczenhundirt Jare dornoch in dem dreyvndfumfczigsten Jare
an der nechsten mitwochin vor des haligen sanct Niclas tage