Wir Boemund von gotes gnaden Erczibischof zu Triere des heiligen Romischen Reichs durch welsche lant vnd daz kúngrich zu Arelat Erczkanzler veriehen vnd tun kunt
offenlich mit disem briue allen den die in sehen oder horen lesen daz die hochgebornen fursten vnd herre her Ruprecht der elter vnd her Ruprecht der Junger pfallenczgrauen
bei Rein vnd herczoge in Beyern in dez allirdurchluchtigsten fursten vnd herren hern karls von gotes gnaden Romischen keisers zu allen zeiten mer(er) dez Reichs vnd kungs zu
Beheim vnsirs lieben genedigen herren vnd ouch vnsir vnd aller andir kurfursten kegenwirtikeit offenlich bekant haben das sie mit wolbedachte mute vnd mit rate ir frunde mit
gutem willen vnbetwungen vnd mit rechter wizzen fur sich vnd alle ire Erben vnd nachkomen ewiklichen dem obgen(anten) vnserm herren dem keiser als einem kunge zu Beheim
seinen erben vnd nachkomen kungen zu beheim vnd der Cronen dezselben kungrichs recht vnd redlich verkouft haben zu rechtem eigen vnd Erbe die nachgeschribne vesten stet
vnd lande hirso(w) Newnstat Stornstein liechtenstein die der vorgen(anten) herren vnd fursten hern Ruprechts dez eltern vnd h(er)n Ruprechts dez Jungen rechtes Erbe vnd eigenschaft
gewesen sein vnd dornoch die vesten stete vnd merkte Sulzbach Rosenberg Neidstein hertenstein hilpoltstein liechtenecke turrendorf frankenberg louffen vnd daz plech
Eschenbach Pegniz husecke werdenstein vnd Ruprechtstein die etwenne dez hochgeborne fursten hern Rudolfs selig(en) gedechtnizze pfallenczgrauen bei Rein vnd herczoge in Beyern
dez obgen(anten) vnsers herren dez keisers swcher waren vnd die nach tode dezselben herczogen Rudolfs vf den egen(anten) herczoge Ruprechte den eltern seinen bruder erblich vnd zu rechter
eigenschaft ouch veruallen waren Vnd dornoch die vesten vnd merkte hoenstein Aurbach vnd hersbrucke die lehen sind von dem Romischen Reiche haben sie dem obgen(anten) vnserm
herren dem keiser als einem kunge zu Beheim seinen erben vnd nachkumen kungen zu Beheim vnd der Cronen dezselben kungriches ouch verkoufet zu lehene recht vnd velden
vnd veldner vorst mit iren zugehorungen die von dem erwirdige(n) vat(er) in got dem Bischoue von Babemberg lehen sind glicherweiz als dieselben von todes wegen dez egen(anten) herczoge
Rudolfs vf den egen(anten) herren herczog Ruprecht den eltern geerbet sind doran der egen(anten) herczog Ruprecht der Junger sein wartunge vnd sulchen aneval als er doran gebeitet hat dem
egen(anten) vns(er)m herren dem keiser als einem kunge zu beheim der Cronen vnd dem kungrich zu beheim als douor begriffen ist recht vnd redlich verkouffet hat vnd daz alle dieselben
vesten stete vnd merkte vnd alle ire zugehorunge wie man die benennen mag hat der obgen(anten) vnser herre der kaiser in seinen erben vnd nachkomen kungen zu Beheim vnd d(er)
Cronen dez kungrichs zu Beheim recht vnd redlich vmb sein eigen gut gekouffet daz fur eigenschaft vnd erbe douor geschriben ist zu eigenschaft vnd erbe vnd waz
fur lehen douor geschriben ist zu lehen Des haben die obgen(anten) herren her Ruprecht der elter vnd her Ruprecht der Junger gebeten das wir vnser briue zu geczugnizze dorub(er)
geben wolden des sei wir ouch geczeug vnd ist vns wizzentliche das die obgen(anten) herczogen sulche vesten stete vnd zugehorungen wol verkouffen mochten vnd sie der egen(anten) vns(er) h(er)re
der keiser recht vnd redlich kouffen mochte vnd gekouffet hat in aller der mazze als douor begriffen ist Vnd des zu geczugnizze geben wir disen brief vsigleten mit vns(er)m
Jnsigel der geben ist zu Nurenberg nach Cristus geburtte dreiczenhundert Jare dornoch in dem Sechs vnd funfczigsten Jare an sancth Thomas tag von kantelberg