Wir ludwig genant der Romer von gotes gnaden Marggraue zu Brandemburg vnd zu lusicz des heiligen Reichs obirstercamerer pfallenczgraue by Reyn
vnd herczog in Beyrn Bekennen vnd tun kund offenlich mit disem briff allen den die in sehen oder horent lesen daz der Edel man her Johans Lantgraue
zu dem Leutemberg von seinen vnd herren Vlrichs seines bruders wegen komen ist in vns vnd aller ander gaistlicher vnd werltlicher kurfursten
gegenwurtikait vnd hat bekennet mit gutem willen vnbetwungen vnd mit rechter wizzen daz der egen(ant) her Vlrich sein bruder er vnd ir beder erben
ire huser pleyenstain vnd Reichenstain vnd waz darzu gehoret dem allerdurchluchtigsten fursten vnd herren h(er)n karly Romischen keis(er) zu allen zeiten
mer des Reichs vnd kunige zu Beheim vnsim liben genedigen herren als ainem kunig zu Beheim seinen Erben vnd nachkomen kunigen zu Beheim
vnd der Cronen desselben kunigreichs zu Beheim recht vnd redlichen auff gelazzen haben vnd die von dem obgen(anten) vnsim herren dem keis(er) als von ainem
kunig zu Beheim vnd der Cronen desselben kunigreichs zu ewigem erlichen lehen enpfangen haben Vnd darnach bekennen wir ouch daz der Erwir
dige vater in got her Boemund Erczbischoff zu Trier des heiligen Reichs Erczkanczler durch welhisch lande vnd daz kunigreich zu Arelat in vns(er)
vnd aller ander kurfursten gegenwurtikait als do uor begriffen ist den egen(anten) Lantgrauen Johansen der do zugegen waz herren Vlr(ich) seinen bruder
vnd ir baider Erben ledig vnd loz gesaget hat aller huldunge eyde vnd gelubde der sie im vnd dem stifte zu trier vbunden waren von we
gen ires huses zu Styrberg daz von dem egen(anten) stifte zu trier lehen waz Wann seliger gedechtnizze her waldwein ettwen Erczbischoff zu trier sein
vorfar dieselben manschaft wechselt hate mit dem kunigreich zu beheim vmb andere lehen vnd manschafft der die kirche zu trier noch heutt
in gewer ist Dornach so hat der egen(ant) Lantgraue Johans fur sich h(er)ren Vlr(ich) seinen brud(er) vnd ir beyder Erben daz egen(ant) huse zu Styrberg mit
den nachgeschriben guten vnd dorffern Ekkemyut Eczendorf Herczendorf Droschenreutt muldorff Bambsentale hieffling vnd den hoff zu
hunger den hoff ze weygang die vischerei bei Stankwazer mit wisen welden Eckern geurn vnd vngeurn vnd mit allen and(er)n dingen die
zu dem egen(anten) huse zu Styrberg gehoren dem egen(anten) vnsim herren dem keis(er) als ainem kunig zu Beheim seinen Erben vnd nachkomen kunigen
zu Beheim vnd der Cronen desselben kunigreichs ouch vnbetwungen mit gutem willen recht vnd redlich auffgelazzen vnd die von ym zu
rechtem erlichen lehen enpfangen vnd hat ym fur sich herren vlrichs seinen bruder vnd ir baid erben gehuldet gelobet vnd gesworen
daz si ym als ainem kunig zu Beheim seinen Erben vnd nachkomen kunigen zu Beheim vnd der Cronen desselben kunigreichs getwe
gehorsam vnd vndtenig sein sullen vnd wollen vnd alles daz gen in tu tun daz man gen iren rechten lehenherren zutun pflichtig sint
vnd ouch in aller der weize als si sulche huldunge getan habent in den zeiten da sie die obgen(anten) ire vesten plaienstein vnd Reichenstein von dem
kunigreich zu Beheim enpfingen vnd des zu vrkund zu ewigen gedechtnizze vnd zu gezeuge geben wir disen briue vsigelt mit vnsim Insigel
Der geben ist zu Nurenberg nach Cristus geburt Dreuczehenhundert Jar darnach in dem Sechsundfumfczigsten Jar des nehsten tags vor
dem heiligen Obisten tage