Wir Bolke von gotis genaden Herczoge in Slesien Herre von furstenberk vnd czur Swydnicz tuen
kunt vnd Bekennen offinlich mit disim briue allen den die in sehen odir horen lesin Wanne
der Allirdurchluchtigiste furste vnd Herre Herre Karl Romischer keyser czu allen czeiten merer
des Richis vnd kunig czu Behemen vnser liber genediger Herre sinen willen laube vnd
gunst mit rechter wissen durch sundirlicher liebe vnd fruntschaft willen die her ge
nediclich czu vns treit dar czu gegebin hat Das wir das Bolwerk czu den Eichen
steine in sime lande bi frankinsteyn gekouft habin wedir die Edeln Swidegern vnd
heynrich gebruder von knigwiz czu vnsirm libe czu habin So meynen vnd tuon wir
in disim briue das das obgenante Bolwerk mit herschaft nucze rechten vnd mit
siner czuhorunge in der wirkentniss vnsirn herren den keyser sine Erbin vnd nach
komelinge kunige czu Behemen nach vnsim tode geuallen sal lediclich vngehindirt
vnd an alle wedir rede czur vrkunde dis brifs den wir versigilt habin lazen werdin
mit vnsim anhangenden Ingesigil Gegebin czu prage an dem nehisten dunnirstage
nach ascencion nach gotis geburt druczen hundirt iar in dem Sechs vnd
funfczigistim iare : -