Wir Wenczla von gots gnaden h(er)czoge von Slie vnd h(er)re zu Lignicz Bekennen vnd tun kunt offenliche mit dysem briue allen den di in sehen oder horen lesen Wann wir mit wolbedachtem mute mit rate vns(er)s getruwen vnd mit
rechter wissen aller cweivnge criege vnd ofleufe welicherlei die seint di sich czwuschen der hochgebornen furstinnen vnd frawen frawen Katherinen h(er)czoginnen von Slie vnd frawen zu dem Brige vnser lieber antkan an
eynem teile vnd vns an dem and(er)n vntz vff disen hutigen tag verlouffen haben vff den Allerdurchluchtigesten fursten vnd h(er)ren h(er)n Karl Romischen keiser zu allen zeiten mer(er) des Reichs vnd kunig czu Behem vnsern liebn
gnedigen h(er)ren genczliche gegangen sein vnd alle di selben vns(er) sachen beidentente zu seiner entscheidung geseczet haben Vnd wann auch der egen(ant) vns(er) h(er)re mit rate sin(er) fursten geistlicher vnd werntlicher seiner h(er)ren
vnd seiner getrwer vndertanen vns entscheden hat vnd aller vnser sache mit vnser beider guten willen in sliche ordenunge geseczet hat als h(er)nach geschriben steet Czu dem ersten daz wir vmb alle schult di vormals
di h(er)czoginnen vns(er) antke vor vns(er)m vater h(er)czogen Bunczlab wem vntz seligen vergolten hat oder noch gelten sal komen sullen vor den Erwirdigen Vatter in gote h(er)n Preclab Bisschoff den haubtman vnd di Ratlude
von Breslaw vnd wez di selbn nach vnser furleginge vnd nach der gewissen bekennen vnd entscheden daz di selbe h(er)czoginne fur den vorg(enant) vns(er)n vatter yren wirt h(er)czogen Bunczlaben nuczencleichen beczalet hat vnd
vergulden daz sullen wir ir widergeben Vnd wo si noch fur den selben vns(er)n vatter gulden sal nach sulcher chuntschaft vnd gewissen als da vor geschribn steet daz sulln wir fur si gelden vnd si des ledig machen
Furbaz vmb di Dreihundert mark grosser polenscher zal welicher gulde di si zu Niclasdorff haben sal zu irme leibe ist ir also von dem vorg(enant) vns(er)n h(er)ren dem keiser mit vnser beid(er) gutem willen entscheden Vnd
demmale daz di selbe vns(er) antke hat zu dem Brige Nunczich mark welicher gulde der selben zal di ir nu bewiset seint So sal si noch alda selbest zu dem Brige offheben zehen vnd hundert mark di si geantwurt
hat alle Jar zu irme leibe Vnd darzu wil der vorgen(ant) vns(er) h(er)re der keis(er) ir beholfen sein daz ir di geuallen Vnd sulln vnd wolln ouch wir darzu helfen in guten trwen ane geu(er)de Vnd we(re) der sache daz di selbn
czwaihundert mark geldes von ymand angesprochen wurden in welicher weise daz were daz sulln vnd wulln wir entwer(en) Vnd sulln ouch der eg(enant) vns(er) antken hundert mark ietiges geldes zu hant bewisen an
Niclasdorff zu irme leibe Ouch ist czwuschen vns entscheden mit vns(er)s beider willn als da vor begriffen ist Sint demmale daz di obgen(ant) h(er)czoginne vns(er) antke bekant hat Vnd bekennet daz si von der sum(m)en
Tausent mark di in keiserlichen vns(er)s egen(ant) h(er)ren briuen furmals czwuschen vns begriffen ist funffhundert mark von vns enpfangen hat So sal si vnd sullen ouch wir vmb di lezsten funffhundert mark
komen vor di obgen(ant) den Bisschoff den haubtman vnd den Rat zu Breslaw vnd waz wir alda bewisen daz wir der selbn sum(m)en funffhundert mark der lezsten ir haben beczalet daz sulln wir ledig sein
Waz aber wir nach sulcher bewisunge der selben sum(m)en ir noch schuldig bliben daz sullen vnd wullen wir ir zu hant nach der bewisunge gelden vnd beczalen Ouch hat der obgen(ant) vns(er) h(er)re der keiser mit vns(er)s willekur beider
seiten gesprochen vnd entscheden daz wir fur den egen(ant) Bisschoff den Haubtman vnd den Rat zu Breslaw der selbn h(er)czoginnen vns(er)r antken zu dem ersten antw(er)ten vnd gerecht werden sullen waz si vns anderswa zu
beschuldigen hat darnach sal si vns ouch gerecht w(er)den fur den selben wez wir si ouch haben zu beschuldigen Vnd sal alle dise entscheidunge gescheen vnd getan w(er)den von dem nehesten Sontage der schirst kumpt nu
wendig Sechs wochen nach eynander in vmlauf zu zelen Vnd ob der egen(ant) Bisschoff von Breslaw an solicher entscheidunge sturbe daz got nicht wulle so sullen alle dise gemeltige sache dannoch di obgen(ant) der hau
btman vnd der Rat zu Breslaw entscheden vnd entrichten Jz hat ouch der egen(ant) vns(er) h(er)re der keiser mit vnser beider gutem willn daruff eyne sulche pene geseczt wer vns nicht gehorsam we(re) solicher entscheidug
der sal nist(er) an dysen sachen vnd cweivngen sein recht v(er)lorn haben vnd veruallen in pene Dreier Tausent mark grosser polentscher zal der halbeteil geuallen sal vns(er)s h(er)ren des keisers kuniclicher cam(er)n vnd der and(er)
den teil der solicher entscheidunge gehorsam wirdet der ouch alle seine rechte domite behalden sal Vnd ist beynamen entscheden ob di obgen(ant) h(er)czoginne vns(er) antke der vngehorsam we(re) daz czwuschen vns entscheden wirdet vo(n)
dem Bisschoue dem haubtmane vnd dem Rate zu Breslaw so sal di pen Dreitausent mark geuallen von irme leibgedinge Weren aber wir da vngehorsam so sal man di selbn pene nemen vff vns(er)m B(er)ckw(er)ck zu Niclasdorff
vnd vff aller and(er)r vns(er) habe wo di sey Vnd ob teil aber an disen stucken gehorsam od(er) vngehorsam genant w(er)den sulln daz sal bewiset w(er)den mit briuen d(er) obgen(ant) des Bisschoues des haubtmanes vnd des Rates zu Breslaw
od(er) mit d(er)selben haubtmanes vnd Rates briuen ob der Bisschoff nicht we(re) als vorgeschribn steet Darvmb so haben wir gelobt dem egen(ant) vns(er)n h(er)ren dem keiser Vnd geloben ouch an disem briue in guten trwen ane
geu(er)de daz wir stete vnd gancz halden wulln vnd vollenkomeleiche folfuren alles daz da fur geschribn steet als verre vns daz anruret Vnd ouch alles daz d(er) Bisschoff der haubtman vnd d(er) Rat zu Breslaw in den obgeschribn
sachen vnd artykeln nach gewissen vnd nach d(er) kuntschaft entscheden vnd sprechen machen vnd finden Vnd we(re) der sache daz wir darwyder quemen od(er) icht dar an wunden in deheinerwis so wullen wir vnd sullen in di obgen(ant)
pene verfallen sein in aller der mazze als si dafur begriffen sint Mit urkunde dicz brifs versigelt mit vns(er)m Jngesigel Der geben ist zu prage nach Cristus geburte Dreiczenhundert Jar vnd dornach in dem Sechs
vnd funffczigesten Jare des nehesten Dinstages nach sente Jacobs tage des heiligen Cwelfboten