Wir Wilhelm von gots gnaden der heiligen kirchen zu colne erczbischoff des heiligen Romischen Richs in Jtalien erczkanczeler
bekennen vnd tun kunt offinlich mit disem briefe allen den die yn sehen odir horen lesen daz vns wißentlich ist vnd auch ge
sehen haben sulche briefe die der hochgeborn furste her Ruprecht der elter pfalenczgraff by dem Reyne des heiligen Richs obrister
Troßez vnd hertzog in Beyrn dem alludurchluchtigistem fursten vnd h(er)ren h(er)n Karl Romischem keyser zu allen zeiten merer des
Richs vnd kunig zu Beheim vnsirm lieben gnedigen herren mit sinem großen hangenden Jnsiegele vngeletzet vnuerseiret vnd
vngekanczelieret in der formen gegebn hat als von worte zu worte hernach ist geschriben Wir Ruprecht der elter von gots
gnaden pfaltzgraff by Rime des heiligen Romische Richs obrister Troßez vnd hertzog in Beyrn bekenne vnd tun kunt offinlich
mit disem briefe allen den die yn sehen odir horen lesen daz vns kuntlich vnd wizzentlich ist vnd dazselbe vnsir eltern vnd vordirn
hertzogen zu Beyrn an vns vnd seliger gedechtnisse den hochgeborn hertzog Rudolf vnsirn brudir herbracht habn daz die vesten
vnd gerichte der hoenstem hersprugke vnd Vrbach die von vnsirs brudirs hertzog Rudolfs des vorgen(anten) tode vff vns verfalln wa
ren vnd die wir dem alludurchluchtigistem fursten vnd herren h(er)n Karln Romischem keyser zu allen zeiten merer des Richs vnd ku
nig zu Beheim vnsirm lieben gnedigen herren als eynem kunige zu Beheim vnd der cronen desselben kunigrichs zu Beheim
recht vnd redelich verkauft haben von niemand andirs ruren danne von dem heiligen Romischen Riche vnd wir vnsir eltern vn(d)
bruder ez von niemand andirs gehabet haben nur von dem heiligen Riche als douor begriffen ist an vrkunde ditz briefes versig
gilt mit vnsirm Jnsiegel Geben zu heidlberg nach cristus geburt druzchen hundirt Jare darnach in dem achten vnd funfzigste(n)
Jare am nechsten donrstage nach der heiligen tzwolfbotten sant petirs vnd sant pauls tage Vnd des zu vrkunde vnd daz vns
als eynem kurfursten des heiligen Richs vnd in Jtalien erczkanczeler die vorgen(anten) sachen in der meinunge als sie geschribn sint
wissentlich sein vnd die briefe als vorgeschriben ist gesen haben so han wir vnsir Jnsiegil an diesen brieff tun henken der gege
ben ist zu Colne nach cristus geburte drutzenhindirt Jar dornach in dem acht vnd funftzigstem Jar an sant Stephans tage als
er funden wart