Wir Gerlach Herr zu Hohenloch bekennen und tun kunt offenlich mit disem brief allen den die
in sehent oder horent lesen das der allerdurchlauchtigiste furst und Herr her Karll Romischer kayser
allzeit merer des reichs und kunig zu Behaim, unser genediger Herr, uns gantzlich bezalt und
volchomenlich genůg getůn hat, von acht tausent gulden von Florenz, der er uns und unsen erben
zway tausent schuldig was und auf ainem turnos zu Arnhaim an dem zolle bewaiset hatte zu
haben und ein zenemen, Und sechs tausent gulden von Florenz, unsen vater seligen, Ludwigen
von Hohenloch und seinen erben schuldig was, und dar umb pfanden und bewaiset hat zwen
grozze an dem zolle zu Remige ze haben in abslag der vorgenanten sum, do von so sagen wir
vor uns und unser erben vor unsen vater seligen und allen seinen erben, unsen H(er)n den kayser
vorgenant, und daz heilig Romisch Reich quit, ledig und los, der vorgenanten acht tausent
gulden, und geloben daz zu aint guten trewen, und sprechen offenlich an disem brief, daz wir,
unser, und unsers vater seligen erben nimmer in dhainen zeiten fordrung oder anspruche
sullen getůn umb die acht tausent gulden vorgenant, noch daz wir oder die vorgenanten erben
unsen H(er)n den kayser, daz Romische Reich, die kron zu Behaim, oder ir undertanen, da si
ansprechen oder antwurten wellen, nimmer sullen umb die obgenanten acht tausent gulden
mit pfandung, name oder sust in dhain ander wez an greiffen, schedigen, hindern, oder beswern
Und des zu ain urkund gebn wir disen brief mit unsen anhangendn insigel besigelt, Daz
ist geschehn nach Cristus gepürde drewzehn hund(er)t jar und in dem newn und funfzigistn
jare an dem Erichtag den man nennet in latin Circumcisio d(omi)ni