Ich Thomas Winkeler von falkenaw bekenne vnd tun kunt offinlich mit diesim briefe allen den die yn sehen adir horen
lesin Wann vor dem allerdurchluchtigistem fursten vnd herren hern Karl Romischem keis(er) vnd kunig zu Beheim mynem
gnedigem herren vnd sinem Rate Ist gwer betedinget vnd vollendet daz her Albrecht Nothaft von Tirpitz leutiklich
vnd slechte sich v(er)ziczen hat sines anfalles der veste vnd stat falkenaw vnd der veste genant der Sactl mit ir zubeho=
rung als ich ym mit wizze wille vnd gehengunz myns herren obgen(ant) als eyns kunigis zu Beheim v(er)schreben hatte
vnd mir derselbe myn herre als ein kunig ze Beheim von besundern gnaden erlaube(n) hait daz ich dieselben stat vnd
veste falkenaw vnd den Sactl vnd waz dar zu gehoret vnd alle andir myne gut die ich izunt han adir furbaz
gewinnen moge v(er)schriben vnd machen hern Jesken von wilhartiz vnd sinen erbn adir dem Trost von kynsperk
vnd sinen erben adir Annen vnd Margarethen mynen swest(er)n vnd yren erbn adir wem ich vnderdenselben wil nach
myner begir vnd mir fuglich ist ob ez zu sulichen schulden kome daz ich abgethe sundir libes erben dauon gelob
ich yn guten truwen daz ich die obgen(ant) veste vnd stat falkenaw vnd den Sactl mit alle ir zugehorung von mynem
herren vnd der Crone von Beheim halden sul vnd besiczen vnd auch dieselben vesten vnd stat mit ir zugehorung vnd
swaz ich gutes han vnd gewinnen nymand nach debenn der v(er)z(icht) machen noch v(er)schriben sal dan mit den furwor
vnd vnderscheit daz sie vnd ir erbn dieselben sullen halden besiczen vnd enfahen von mynem h(er)ren dem keis(er)
vnd sinen erben kunigen zu Beheim vnd der Crone desselben kunigreichs vnd in semlicher weis als ich sie izunt
von ym halden vnd besiczen des zu vrkunde han ich myn Jnsiegil an diesen brief gehangen Geben zu Prage nach
Cristus geburt druzehnhund(er)t vnd sechczig Jar an der nechsten mitwoch nach vns(er)s herren lichnams tag