Wir Eberhart vnd Vlrich gebrüder, Grafen von Wirtemberg, Bekennen vnd tün kunt offenlich mit disem brife, allen den die in sehen, oder
hören lesen, Daz wir durch gebote des Allerdurchleuchtigisten fürsten vnd herren, hern Karls Romischen keysers zü allen zeiten mer(er) des Reichs,
vnd küniges zü Beheim, vnsers gnedigen herren, alle büntnüzz, die wir in dheineweis gehabt haben, mit dem Hochgebornen fürsten, h(er)n Rüdol=
fen Herzogen zü Osterreich, zü Steyr, vnd zü Kernden, genzlich abgetan, vnd v(er)nichtet haben, vnd geloben in guten trwen on geuerd, für
vns, vnd vnser erben, daz wir bei dem egen(anten) vnserm herren dem keyser, die weil er lebt, mit aller vnser macht getrwlich beleibn sullen
vnd wollen, vnd ym beigestendig, vnd geholfen sein, wider allermenglich, nymand auzgenomen, Vnd sullen vnd wellen ouch allen des heili=
gen Reichs vndertanen, die in dem Reiche gesezzen sein, des rechten gehorsam sein, vor dem egen(anten) vnserm herren dem keyser, oder wem
er daz empfilhet on geuerd, Vnd besunder geloben wir in guten trwen on geuerd, dem egen(anten) vns(er)m herren dem keyser, daz wir mitsampt
vns(er)n dienern, der wir gewaltig sein on geuerd, wollen vnd sullen, den Steten in Swaben, vmb alle missehel vnd vfleuff, die zwischen
vns, vnd in beidenseiten gewesen sind, vnd noch sein, dorumb clag für den egen(anten) vnsern herren den keyser komen ist, gerecht werden, vor ym
oder wem er daz empfilhet, oder sullen daz mit fruntschaft verrichten lazzen, vnd dasselbe sol vns ouch von denselben Steten geleichweis
geschehen on geuerd, Auch sullen vnd wellen wir furbaz mer des heiligen Reichs, Grafen, freyen, vnd dienstleute, zü dienern nicht
nemen, noch halten wider daz heilige Reich, vnd waz wir der haben, die sullen vnd wellen wir, on verzog ledig lazzen, vnd an daz
egen(ante) heilig Reich wider weisen, Auch sullen vnd wellen wir abtün, vnd genzlich vernichten, alle vngewonlich zölle, daruber wir
von dem heiligen Reiche nicht brife haben, Auch sullen alle leut, in welchen wirden, oder wesen die sind, die dem egen(anten) vnserm
herren dem keyser, wider vns gedienet haben, in disem kriege, von vns vnuerdacht, vnd vngehindert ewiclich beleibn, Auch
lazzen wir ledig alle genangen, die zü vnser, oder vnser fründe vnd diener hant gelobt haben, die in dem criege, oder vor
dem kriege genangen sind, Auch haben wir mit wolbedachtem müte, vnd mit gutem willen, dem egen(anten) vnserm herren dem keyser,
eingeantwürt des Reichs vesten, Hohenstauff vnd Achalm, mit allen iren zügehoringen, vnd haben ym ouch widergebn vnd
vfgelazzen, die lantvogtey, die wir innegehabt haben, mit allen den briefen, die vns vber die vesten, vnd lantvogtei wordn
sind, douon verzeihen wir vns, für vns, vnser erben, vnd nachkomen, ewiclich, alles rechten, forderung, vnd ansprach, die wir
dorzu indheineweis gehabt haben, oder gehaben mochten, Vnd were daz sache, daz dheinerlei briefe zü liecht quemen, die do wid(er)
weren, die sullen genzlich abesein, vnd keyne craft, oder macht haben, Vnd aller diser egen(anten) sache, zü vrkund vnd stetig war=
heit, haben wir Eberhart vnd Vlrich gebrüder vorgen(ant) vnser grozzen Infigel, an disen brief gehangen, der geben ist zü Schorn=
dorf, do man zalt nach gots geburt Dreuzehenhundert Jar, vnd darnach in dem Sechzigistem Jar, des nehsten montags, vor
sand Egidien tag :-