Wir Gerlach von gots gnaden des heiligen stuls zu meincz Erczbischoff des heiligen Romischen Reiches in dewtshen landen Erczkanczler Bekennen vnd tun kunt offenlich mit disem brieff allen den die in sehen oder horen lesen
Wann der Allerdurchleuchtigiste furste vnd Herre her karl Romischer keiser zu allen czeiten merer des Reichs vnd kunig zu Beheim vnser lieber gnedig herre vns lieb hat lazen die er zu dem heiligen Reich vnd zu dem kunig
reich zu Beheim trew mit flizzigem fleiz durch ir beider frumen vnd nucze den wechsil hat getan der hernach geschriben ist vnd hat denselben genemant vnd bestetigt mit seinen keiserlichen briefen die von worte zu worte lawten
als hernach geschriben stet Wir karl von gots gnaden Romischer keiser zu allen czeiten merer des Reichs vnd kunig zu Beheim Bekennen vnd tun kunt offenlich mit disem brieff allen den die in sehen od(er) horen lesen Wann wir
rehtes bedenchen grozzer sweren obleyklicheit die vns von des heiligen Romischen Reichs wegen anruren so vinden wir vns denselben swer manigueldiklich vbunden wann wir von des Reichs wegen keisliche wirdikeit lehen
en durch sein wir pflichtig vnser kunigreich zu Beheim zu furdern vnd zu bessen wann ez ist ein hoh vnd edel gelid desselben Reichs also daz sein hohunge dem Reich kumpft sunderlich zu troste vnd zu eren des haben wir
vnder and(er)n sachen die wir in neheste mit den Erwirdigen vnd hochgebornen kurfursten besorget vnd betrahtet haben mit namen vnd sunderlich bedacht daz wir mit gotes hilfe neheste durch notdurft willen mit mechtigen her
gen swaben geczogen vnd also die vesten Aschaw vnd hohenstauff die des Reichs eigen sint vnd lange czeit von danne empfremdet sint gewest in gewalt vnd eigenschaft des heiligen Reichs gebracht haben vnd zu derselben czeit
die vesten lawterburg vnd Ropenstain vnd die stett Alen vnd heubach von den Edlen ludweigen dem eltern vnd ludweig dem Jungen Grafen zu Otingen vnser lieben getrewen reht vnd redlich von vnsers kunigreichs vnd der cro
nen zu Beheim gelt vnd gut zu demselben kunigreich vnd der cronen zu Beheim gekowfet haben vnd sie zu demselben kunigreich vnd der cronen engeleibt geczogen vnd geeynigt furbaz bedachten wir mit den obgen(anten) kurfursten
allein dieselben vesten Aschaw vnd hohenstauff an ir selber dem Reich wol nucz sein doch waz notdurft daz sie mit beigelagen vesten vnd guten gesterckt vnd gebreitet wurden vnd daz ein stilde stete vnd merung derselben vesten Asch
aw vnd hohenstauff wol geschehen mochte dem Reich zu nucze vnd frumen mit einem wechsil vmb die obgen(anten) vesten lawterburg vnd Ropenstain vnd den stetten Alen vnd heubach vnd iren zugehorungen wann dieselben vesten vnd stett
den egen(anten) vesten Aschaw vnd hohenstauff nahen beigelagen sint vnd ir gemerke bedensiten sich aneynander ruren Auch bedachten wir mit den egen(anten) kurfursten in ganczen trew daz die vesten parkstain vnd kirstwald gelegen in dem
Eger land mit hundert lehen ackers die darzu gehoren vnd weiden die stett mit iren guten dorfern zugehorungen vnd gebieten allem sie des Reichs sint doch so sint sie baz gelegen dem kunigreich zu Beheim vnd den landen die
wir zu demselben kunigreich zu Beheim ober wald in Bayern gewunnen haben wann dem Reich vnd die vesten lawterburg vnd Ropenstain dem heiligen Reich vnd die vesten parkstain vnd kirstwald dem kunigreich vnd der cronen
zu Beheim nuczlicher vnd lidenlicher baz gelegen sint vnd frumen tragen mugen als daz alles in der warheit gesunden ist von besuhern die die kurfursten darzu gesant haben dauon vmb durch lieb vnsers angeboren kunig
reichs noch durch lieb vnser erben vnd nachkomen sunder durch guthes reht vnd vnser gewizzen in sulcher sachen die wir merken daz sie dem heiligen Reich vnd vnserm kunigreich zu Beheim desselben Reichs wirdigem gelide
vnd fursteney mer nuczes vnd eren brengen muge haben wir mit wolbedachtem mute vnd vollem rat der obgen(anten) kurfursten vnd ander fursten vnd Edler des heiligen Reichs besunnen vnd eyntrechtig betrahtet die obgen(anten) gut aneyn
ander czeuissen dem Reich an einem teil vnd dem kunigreich zu Beheim an dem andern zu wechsiln des haben wir als ein Romischer keiser mit rate vnd willen der kurfursten in vnserm vnd des heiligen Reichs namen mit dem hochge
bornen Johansen marggrafen zu merhern vnserm lieben Bruder vnd fursten als mit ein fur vnd des kunigreichs zu Beheim sweser vnd pfleg(er) die obgen(anten) vesten lawterburg vnd Ropenstain vnd die stett Alen vnd heubach mit iren dorfn
guten gebieten vnd allen zugehorungen vmb die obgen(anten) vesten parkstain vnd kirstwald vnd vmb die stett an der weiden vnd ir aller dorfer gute vnd zugehorungen mit ganczem rehten grunte eigenschaft vnd herschaft leiden
leuen reht vnd redlich verwechselt vnd wechsiln an disem brieff mit keiserlicher macht vnd rehtem wizzen vnd wir als ein Romischer keiser mit keislicher macht von wegen vnd in willen sulches wechsels haben wir daczogen
vnd daczilhen vff die obgen(anten) vesten parkstain vnd kirstwald vnd vff die stett an der weiden vnd alle ir gute dorfer herschaft reht vnd zugehorungen vnd ein leiden nemen vnd eigen vberdaz dieselben vesten stett vnd alle
zugehorunge dem kunigreich zu Beheim vnd seiner edlen cronen vnd einleiben eynigen vnd einen sie ewiklich in dazselben kunigreich zu Beheim vnd seiner cronen eigenschaft reht herschaft grunt vnd erbschaft mit reht
Briczen zubesiczen ewiklich vngescheidenlich mit erblichen rehten vnd die obgen(anten) vesten lawterburg vnd Ropenstain vnd die stett Alen vnd heubach mit allen iren dorfern guten vnd gebieten vnd zugehorungen hat der egen(ante) bru
der der marggraff zu merhern in namen sulcher pflege vnd wesens als dauor begriffen ist in sulchen wechsiln vor vns vffgeben vnd haben wir die als ein keiser vffgenumen vnd sie dem heiligen Reich vnd sein cron
eingeleibt geczogen vnd geeynigt vnd einleiben eynen vnd eygen sie in dazselben Reichs gewalt reht herschaft vnd eigenschaft ewiklich zu besiczen vmb haben wir gelobt vnd geloben mit disem brieff als ein Romischer
keiser vor vns vns(er) nachkomen Romische kunige vnd keis(er) vnd hat gelobt vns obgen(anter) brud(er) der hochgeborn Johans marggraff zu merhern als ein sweser vnd pfleg(er) als dauor begriffen ist vor vns als von einem kunige zu Beheim
darzu geseczet vor vns vns(er) erben vnd nachkomen kunige zu Beheim den obgen(anten) wechsil in allen seinen stucken ewiklich stet vnd gancz behalten vnd in deheinen czeiten dawider niht zutun noch zeverfuchen mit reht od(er)
mit tat wie vns oder ander personen in deheine weis durch sulcher wechsil gehindert oder abgetan mochte Auch haben wir der obgen(anter) keiser karl als ein Romisch(er) keis(er) vor vns vns(er) nachkomen Romische kunige vnd keis(er)
vnd der egen(ante) vns(er) Bruder marggraff Johans in craft von der obgen(anten) pfleg wegen vor vns vns(er) erben vnd nachkomen kunige zu Beheim mit rehtem korzen vns vffgeben vnd vffzeihen an allen den obgeschriben sachen vnd waz
ouch darancz entstan mochte in deheine weis als dauor begriffen ist aller ansprache rehtes vnd forderunge vnd aller hulfe gaistliches vnd werltliches rehten damit wir beider seiten vns behelfen mochten oder wid(er) sulche sache vnd
wechsil ymmer tun mit reht so mit tat in gerihte oder vzwentig gerihtes oder damit sulche sache vnd wechsil abgetan gecrenczet mocht od(er) gebrochen werden in deheine weis ob auch von rehtes wegen notdurft wer daz sulche
reht wie die genant sint mit namen solten in disen brieff werden gelawtert vnd ouch worte zu worte geschriben stunden wir karl der obgen(anter) keiser tun ab vnd erfullen mit reht wizzen mit keislicher macht volkomen heit
allen gebrechen der in den obgeschriben dingen oder in etlichen geschehen wer daz leicht etliche schonheit vnd geferte gelazen weren vnd sust an worten oder an worten oder and(er)n dingen die durch alle die obgen(anten) sachen in
kreftigen czeiten hindergesprochen gehindert oder geswecht werden mochten in deheine weis vnd wellen mit disem keislichem gesecze daz daz alles gancz craft vnd macht habe vnd ewige bestetikeit in allen seinen stucken arti
keln vnd puncten also daz in allen diesen sachen alle reht geschriben oder gewonheit oder gesecze die dawider lawten oder sulch dink and(er)s seczen vnschedlich sey wann wir alle sulche reht abnemen also ver als sie die
obgen(anten) sachen hirren mugen Des vbietten wir allermenglich niemant vzgenomen daz niemant wider diese gegenwrtig vns(er) keiserliche schrift ymmer tun sey in deheine weis wer aber dawider tete der sey in vns(er) vnd
des Reichs groz vngnad verfallen als oft daz geschiht vnd in pein tawsent marg lociges goltes der halbeteil in des Romischen Reichs camer vnd der ander halbeteil in eines kuniges von Beheim camer der in czeiten ist an vn
wendiclich gen vnd ganczlich gevallen cze vrkund dicz briefs besigelt mit vns(er) keislichen maiestat Insigel der geben ist zu Nurenberg nach crists geburt dreuczenhundert Jar darnach in dem sehcziigisten Jar an sand
Barbaren tag der heiligen Juncvfrawen vnser Reichs in dem funfczenden vnd des keisertums in dem sechsten Jare Vnd wir der egen(ante) Gerlach Erczbischoff zu meincz des heiligen Romischen Reichs in dewtshen landen Erczkanczler
haben bedacht daz der egen(ante) wechsil dem heiligen Romischen reich zu eren vnd zu nucze vnd ouch dem kunigreich vnd der cronen zu Beheim zu gemache vnd zu gut rehtlich geschehen ist als wir die von erbn(n) weisen leu
ten den wir vnd and(er)n vns(er) mitkurfursten daz zubesuchen emppolhen hatten wol vnd ganczlich vnderweist sein so haben wir zu demselben wechsil geeynigt eynige erkentnisse vbermige gesecze penen vnd allen
den obgen(anten) stucken puncten vnd artikeln als sie dauor begriffen sint vnd alle die dauon kumen vnd entsten als ein Erczbischoff zu meincz vnd Erczkanczler in dewtshen landen des heiligen Reichs vnd ein kurfurste mit
wolbedachtem mute vnsern guten willen darzu geben vnd getan haben geben vnd tun auch mit disem brieff vnd haben auch die egen(anten) sache in allen iren puncten artikeln vnd clauseln von worte zu worte als sie
dauor geschriben sten bewert gelobt vnd bestetigt mit rehtem wizzen bewaren loben vnd bestetigen auch mit disem brieff vnd der zu einem ewigen gedechtnisse haben wir disen brieff besigelt mit vns(er)m
grozzen Insigel der geben ist zu Aschaffenburg nach crists geburt dreuczenhundert Jar darnach in dem ein vnd sehcziigisten Jar an den nehesten sunnabend vor vnser frawen tag liechtmesse