Wir Boemund von gots gnaden Erczbischoff zu Trier des heiligen Romischen Reichs durch Welsche land vnd des kunigreichs zu Arelat Erczkanczler Bekennen vnd tun kunt offenlich mit disem brieff allen den die in sehen oder horen lesen
Wann der Allerdurchleuchtigste furste vnd herre her Karl Romischer keiser zu allen zeiten merer des Reichs vnd kunig zu Beheim vnser lieber gnedig(er) herre durch lieb vnd begir die er zu dem heiligen Reich vnd zu dem kunigreich zu Beheim
treit mit stetigem vleisz durch ir beider frumen vnd nutze den wechsel hat getan der hernach geschriben ist Vnd hat denselben geuestent vnd bestetigt mit seinen keiserlichen briefen die von worte zu worte lauten als hernach
geschriben stat Wir Karl von gots gnaden Romischer keiser zu allen zeiten merer des Reichs vnd kunig zu Beheim Bekennen vnd tun kunt offenlich mit disem brieff allen den die in sehen oder horen lesen Wann wir etlich bedorchen groszer
sachen vberschlagent die vns von des heiligen Romischen Reichs wegen anrurent So vinden wir vns demselben Reich manigueldiklich verbunden dann wir von des Reichs wegen keiserliche wirdikeit besiczen Auch sein wir pflichtig vns(er)
kunigreich zu Beheim zu furdern vnd zu liebn dann es ist ein edel vnd achper gelid deselben Reichs also daz sein hofnunge von vns kummpt sunderlich zu rechte vnd zu wirden Des haben wir vnder and(er)n sachen die wir in neheste mit den
Erbirdigen vnd hochgebornen kurfursten bischofen vnd leien getat haben mit namen vns sunderlich bedacht daz wir mit gotes hilfe nahesten durch notdurft willen mit mechtigem her gen Swaben zogen vnd alda die vesten Achalm vnd ho
henstauff die des Reichs eigen sint vnd lange zeit von danne empfremdet sint gewest in gewalt vnd eygenschaft des heiligen Reichs gebracht haben vnd zu der selben zeit die vesten Lauterburg vnd Tostenstein vnd die stet Ailen vnd heubach
von den Edlen Ludweigen dem eltern vnd Ludweig dem Jungen Grauen zu Oetingen vnsern lieben getruen recht vnd redlich von vnsers kunigreichs vnd der Cronen zu Beheim gelte vnd gut zu demselben kunigreich vnd der Cronen zu
Beheim gekoufft haben vnd sie zu demselben kunigreich vnd der Cronen engeleibt geeygent vnd geeynigt furbaß bedachtent wir mit den vorgen(anten) kurfursten Allein dieselben vesten Achalm vnd hohenstauff an in selber dem Reich wol nutze
sein doch waz notdurft daz sie mit beigelegen vesten vnd guten gepessert vnd gebreitet wurden vnd daz ein sulche pesser vnd merunge derselben vesten Achalm vnd hohenstauff wol geschehen mochte dem Reich zu nutze vnd frumen mit
einem wechsel vmb die obgen(anten) vesten Lauterburg vnd Tostenstein vnd den steten Aley vnd Heubach mit iren zugehorungen Wann dieselben stet vnd vesten den egen(anten) vesten Achalm vnd hohenstauff nahen beigelegen sint vnd ir
gemerke bedenthalp fast aneinander rurent Auch bedachten wir mit den egen(anten) kurfursten in ganczem rate daz die vesten parkstein vnd karelswalt gelegen in dem Egerland mit hundert lehen lehens die darzu gehoren vnd
weiden die stat mit iren guten dorffern zugehorungen vnd gebieten Allein sie des Reichs sint doch so sint sie baß gelegen dem kunigreich zu Beheim vnd den landen die wir zu demselben kunigreich zu Beheim aber wald in Beyern ge
kunnen haben wenn dem Reich vnd die vesten Lauterburg vnd Tostenstein dem heiligen Reich vnd die vesten parkstein vnd karelswalt dem kunigreich vnd der Cronen zu Beheim nuczlicher vnd bederueren baß gelegen sint vnd frumen tragen
mugen als daz alliz in der warheit gefinden ist von besichtin die die kurfursten darzu gesant haben dauon mocht durch lieb vnsers angeboren kunigreichs nach dinst lieb vns erben vnd nachkomen sunder durch gotlich recht vnd vnser
gewissen in sulchen sachen die wir merken daz sie dem heiligen Reich vnd vnserm kunigreich zu Beheim desselben Reichs wirdigem gelide vnd furstenam mer nuczes vnd eren brengen mugen haben wir mit wolbedachtem mute
vnd willen rat der obgen(anten) kurfursten vnd ander fursten vnd edler des heiligen Reichs besunnen vnd eymuticlich betrachet die obgen(anten) guter aneinander zwisden dem Reich an einem teil vnd dem kunigreich zu Beheim an dem andern zu
wechseln Des haben wir als ein Romischer keiser mit rate vnd willen der kurfursten in vnserm vnd des heiligen Reichs namen mit dem hochgebornen Johansen marggrafen zu merhern vnserm lieben bruder vnd fursten als mit
vns(er)n vnd des kunigreichs zu Beheim verweser vnd pfleger die obgen(anten) vesten Lauterburg vnd Tostenstein vnd die stet Aley vnd heubach mit iren dorffern guten gebieten vnd allen zugehorungen vmb die obgen(anten) vesten parkstein
vnd karelswalt vnd vmb die stat zu der weiden vnd ir aller dorffer gute vnd zugehorungen mit ganczem recht grunt eigenschaft vnd herschaft beidenthalp recht vnd redlich verwechselt vnd wechslen in disem brieff mit key
serlicher macht vnd rechter wizzen Vnd wir als ein Romischer keiser mit keislicher macht von wizzen vnd in willin sulches wechsels haben vns verziegen vnd v(er)zeihen vff die obgen(anten) vesten parkstein vnd karelswalt vnd vff die stat
zu der weiden vnd alle ire gut dorffer herschaft recht vnd zugehorunge vnd onterley vereynen vnd eygenen ewiclich dieselben vesten stat vnd alle ire zugehorungen dem kunigreich zu Beheim vnd seiner edlen Cronen vnd
einleiben eygenen vnd eynen sie ewiclich in desselben kunigreichs zu Beheim vnd seiner Cronen eigenschaft recht herschaft grunt vnd erbschaft mit rechter wizzen zu behalten ewiclich vngeschadenlich mit erplassen rechten
Vnd die obgen(anten) vesten Lauterburg vnd Tostenstein vnd die stet Aley vnd Heubach mit allen iren dorffern guten gebieten vnd zugehorungen hat vnser egen(anter) bruder der marggraff zu merhern in namen sulcher pflege
vnd verwesens als davor begriffen ist in sulchen wechsels von vns vfgeben vnd haben wir die als ein keiser vfgenumen vnd sie dem heiligen Reich vnd seiner Camer engeleibt geeygent vnd geeyniget vnd einleiben eynen
vnd eygenen sie in desselben Reichs gewalt recht herschaft vnd eigenschaft ewiclich zu behalten furbaz haben wir gelobt vnd geloben mit disem brieff als ein Romischer keiser vor vns vnser nachkomen Romische kunige vnd keiser
vnd hat gelobt vns(er) obgen(anter) bruder der hochgeborn Johann marggraff zu merh(er)n als ein verweser vnd pfleg(er) als davor begriffen ist von vns als von einem kunige zu Beheim darzu geseczet vor vns vnser erben vnd nachkomen kunige zu Beheim
den obgen(anten) wechsel in allen seinen stucken ewiclich stet vnd gancz behalten vnd in deheinen weis dowider nicht ze tun noch zu versprechen mit recht oder mit tat mit vns oder ander personen in deheine weis domit sulicher wechsel gehindert
oder abgen mochte Auch haben wir der obgen(anten) keiser karl als ein Romischer keis(er) vor vns vns(er) nachkomen Romische kunige vnd keis(er) vnd der egen(anter) vns(er) bruder marggraff Johans zu merhern von der obgen(anten) pfleg wegen vor vns vns(er) erben
vnd nachkomen kunige zu Beheim mit rechter wizzen verziegen vnd verzeihen an allen den obgeschriben sachen vnd waz auch daraus ensteen mochte in deheine weis als davor begriffen ist aller ansprache rechtes vnd forderunge vnd
aller hilfe geistliches vnd werltliches rechtes domit wir vns behelffen mochten oder wider sulche sache vnd wechsel ymmer im(m)er mit recht oder mit tat ingericht oder inwendig gerichts oder domit sulche sache oder
wechsel abgen geirret mocht oder gebrochen werden in deheine weis Ob auch von rechtes wegen notdurft wer daz sulchs recht wie die genant sint mit namen stuen in disem brieff overden gelaute(r)t vnd von worte zu worte
geschriben furbaz wir karl der obgen(anten) keiser tun ab vnd erfullen mit rechter wizzen mit keiserlicher macht volkumenheit allen gebrechen der in den obgeschriben dingen oder ir etlichen geschehen wer daz leute etliche schonheit
vnd zirheit gelazen weren vnd sust an worten oder an worten oder andern dingen die durch alle die obgen(anten) sachen in kunftigen zeiten vndergesprochen gehindert oder geswachet werden mochten in deheine weis vnd wellen mit
disem keiserlichem gesecze daz daz alles gancz craft vnd macht habe vnd ewige bestendikeit in allen seinen stucken artikeln vnd puncten Also daz in allen diesen sachen alle recht geschriben oder gewonlich oder gesecze die dowid(er)
lauten oder sulchs ding anders seczen on schedlich sein sunn(er) wir alle sulche recht abnemen also verre als sie die obgen(anten) sachen betruren mugen Des verbieten wir allermenglich niemant vzgenomen daz niemant wider diese ge
genwertig vnser keisliche schrift ymmer thut tun in deheine weis Wer aber dowider tet der sei in vnser vnd des Reichs groz vngnad verfallen als oft daz geschiht vnd in pein tausent marc loetiges goldes der halberteil in des Ro
mischen Reichs Camer vnd der ander habeteil in eines kuniges von Beheim Camer der in zeiten wirt vnwendiclich gar vnd genczlich geuallen sullen vrkund diz briefs isigelt mit vns(er) keislichen maiestat Ingesigel
der geben ist zu Nurenberg nach Crists geburt dreuczenhundert Jar darnach in dem Sechczigsten Jar an sand Barbaran tag der heiligen Juncfrawen vnser(er) frawen in dem funffzenden vnd des keisertums in dem
Sechsten Jar Vnd wir der egen(anter) Boemund Erczbischoff zu Trier des heiligen Romischen Reichs in welschen landen vnd durch das kunigreich zu Arelat kanczler haben bedacht daz der egen(anter) wechsel dem heiligen Ro
mischen Reich zu eren vnd zu nutze vnd auch dem kunigreich vnd der Cronen zu Beheim zu gemache vnd zu gut redlich geschehen ist als wir des von erbern weisen leuten den wir vnd ander vnser mitkurfursten da zu bese
hen empfalhen haten wol vnd genczlich vnderweiset sein So haben wir zu demselben wechsel gancze gnuge erkentnisse verbietunge gesecze penen vnd allen den obgen(anten) stucken puncten vnd artikeln als sie davor begriffen sint
vnd alle die dauon komen vnd ensteen als ein Erczbischoff zu Trier vnd Erczkanczler in welschen landen vnd durch das kunigreich zu Arelat des heiligen Reichs vnd ein kurfurste mit wolbedachtem mute vns(er)n guten willen darzu
geben vnd getan haben geben vnd tun auch mit disem brieff vnd haben auch die egen(anten) punct in allen iren puncten artikeln vnd clauseln von worte zu worte als sie davor geschriben sten bewert gelobt vnd bestetigt mit recht(er)
wizzen bewerten loben vnd bestetigen auch mit disem brieff vnd daz zu einem ewigen gedechtnisse haben wir diesen brieff besigelt mit vnserm grozzen Ingesigel Der geben ist zu Trier do man nach gots geburt in vnserm
bischtum von Trie zu schreiben zalt nach Crists geburt Tausent dreuhundert vnd Sechczigsten Jar vff den Sechczensten tac des mandes genant Februarij in Latin :.