Wir Vlrich vnd Johans lantgraue zu dem Leutenberg bekennen vnd tun kunt offenlich mit dysem brieff allen den die yn sehen od(er) horen
lesen wann die edeln herren heinrich von dem Newenhaus vnd buzze von Luag vnser lieben frunde die sache die qwischen dem all(er)durch
leuchtigstem furste vnd herren h(er)rn karl romische(n) keys(er) zu alln zeiten mer(er) des Ruchs vnd kunig ze Beheim vnsern liebn genedigen herren
an einem teil vnd vns an dem and(er)n teil vmb die grenigen des Behemischen waldes vlauffen ist durch gebot des obgen(anten) vns(er)s herren
des keysers vnd durch vns(er) bete willen entscheiden habn als hernach geschribn stet des ersten habn sie gemerket drew puechen mit dryn
Czewczen vnder dem Eyrinperg vf dytirstorffer veld vnd derselb tayn sol stozzen vf Eselarner velde das do haizzet daz futlis als v(er)re
vnser merke wendet vnd nicht furbaz vnd an d(er) andern seiten von den dreyn puechen herwider auf qwischen dem Behemischem wald
vnd dytirstorffer veld vnz an drey viechten die ouch gemerket sint vnd furbas hinauf als man gerichtigst mag vnz an ein puechen vnd
an ein viechten vor daz haus die ouch gemerket sint vnd von dannen hin ab gen horzstems weitz als v(er)re Reuhenstein begriffen hat
vnd herwider auz gen Reuhensteiner velde vnd wann der obgen(ante) vns(er) herre der keys(er) als ein kunig ze Beheim bestetigt hat die egen(anten) grenigen
vnd taynung als sie douor begriffen sint darumb sullen vnd wellen wir vnd vnsir erben vnd nachkomen dieselbn grenige vnd taynunge
stet vnd vnuerruket habn vnd halden also daz wir vnd vns(er) erbn vnd nachkomen der vorgen(anten) grenigen vnd taynung ein teil die an vns
gehoret sullen von dem egen(anten) vns(er)n herren dem keys(er) als von einem kunig zu beheim seinen erbn vnd nachkomen kunigen zu Beheim
vnd von der Cronen desselben kunigreichs ze Beheim zu rechtem lehen vnd manschafft habn vnd halden gleich and(er)n guten die zu dem Reuhen
stein gehoren die w(ir) ouch von dem egen(anten) vns(er)n herren dem keys(er) als von eim kunig ze Beheim vnd von der Cronen desselbn kunigreichs ze lehen
habn vnd halden an vrkund diz briues versigelt mit vns(er)n Jngesigel der gebn ist zu Nurenberg Nach cristus geburt drewzehnhundert
Jar darnach in dem ein vnd sechzigstem Jar am freytag vor dem Sontag als man singet Oculi in der vasten