Wir Carl von gotes gnaden Romisch(er) keyser ze allen zeiten merer des reichs vnd kunig ze Beheim Vnd wir Wenczla sein erstgeborn(er) sun
vnd wir Johans von denselbn gotes gnaden Margraf ze Merhern Vnd wir Rudolff Frid(e)r(ich) Albr(echt) vnd Leupolt von gotes gnaden h(er)czogn
ze Oster(reich) ze Steyr vnd ze Kernden (et) c(etera) Bekennen vnd tun kunt offenlich mit disem brief allen den die in sehen od(er) horen lesen
Daz vnser ieglicher sunderlich vnd wir all gemainlich nach guter vorbetrachtung mit rechter wizzen gesworn haben leiplich aide
zu den heiligen recht vnd redlich mit vngewerten handen auf das heilig Ewangelj fur vns vnd fur all vnser Erbn vnd Erbes
Erbn ewichlich daz wir mit allen vns(er)n Landen vnd herschaften wo die gelegen vnd wie si genant sein die wir nw haben od(er) hienach
gewinnen bey einand(er) beleibn vnd einand(er) mit aller vns(er)r macht ewichlich geraten vnd geholfen sein sullen vnd wellen getreulich stet(e)
lich vnd freuntlich mit leibn vnd mit guten Ane alle geuerde wider aller menlich nieman ausgenomen in welichen wirden eren od(er) wesen
der sey In solicher maze wer der ist oder wirdt dem ayn(er) vnder vns veynt ist od(er) wirdt dem sullen wir die and(er)n all ze gleich(er) maze
veynt sein vnd sullen ouch einand(er) in allen sachen beygestendig vnd geholfen sein als vestiklich als endlich vnd als ernstlich als vnuczogent
vnd als getwlich als ob die sache vnser ieglichen besunder angieng vnd sein aigen ding wer Ane alle geuerde vnd arge liste Vnd
in welichen krieg wir also mit einand(er) vallen oder komen gegen wem od(er) wa das sey od(er) werde da sol sich vnser dhainer nicht
vntiding noch berichten od(er) sonen Ane des and(er)n vnd d(er) and(er)n aller wizzen rat vnd willen Ouch ensol vnser dhain(er) dhain grozze
redliche vnd ernstliche oder namhaft sache antwurtten anuahen noch enden noch dhaine puntnuzze mit iemanne machen an d(er) and(er)n
aller wizzen rat vnd willen Vnd sol ouch vnser dhainer sich selb(er) noch seine chind die wir nw haben oder hienach gewinnen die nicht
verlobt sind veheyratten denn mit der and(er)n aller wizzen rat vnd willen Darub(e) sullen wir ouch einand(er) getw vnd gewer sein fur
all and(er) leut vnd sol vnser ieglich(er) des and(er)n schaden wendn sein mug vnd ere furd(er)n Vnd sullen ouch einand(er) eren vnd gutz raut(en)
wurtten vnd besprechn getreulich vnd freuntlich wider aller menlich niemann ausgenomen mit worten vnd mit werchen haimlich
vnd offenbar als wir wir chunnen vnd mugen Ane alle geuerde Swaz wir ouch vormals puntnuzzen mit ieman wer d(er) ist gemacht
habn die sullen diser puntnuzze aller ding vnschedlich sein Mit vrchund diz briefs versigelt mit vnser aller Insigeln Der geben ist
ze Prage Nach Christs gepurd dreuczehen hund(er)t iar darnach in dem aym vnd sechczigistem iar An sand peters tag ze der
ketenfeier Vnser des egen(anten) keysers Reiche des Romischen in dem Sechszehenden des Beheimischen in dem funfzehendn vnd des keysertums
in dem Sibenden Jare