Wir Ebirhart vnd Vlrich von gotis gnaden Grauen ze Wirtenberg bekennen vnd tun kunt offenlich mit disem brieff allen den die yn sehen odir horen lesen Das wir haben angesehen dy sunderliche gnade des allerdurchleuchtigisten fursten vnd
herren hern Karls Romischen keisers zu allen ziten merer des Reichs vnd kunigs zu Beheim vnsers lieben gnedigen herren damit er vns durch sein angebirne gute gemeynet hat vnd noch je me(r) leisten gnediclichen meynet vnd darczu durch
schirmes vnd frides willen des wir an im er genaden wartende sein vnd hoffenunge haben das er vns vnd vnser Erben bei eren rechten fride freiheiten wolle gnediclich behalten So haben wir mit wolbedachtem mute mit Rate vnser
fründe vnd ouch diener vnd mit rechter wissen dem egenan(ten) vnsern gnedigen herren als eyme kunige zu Beheim seinen Erben vnd nachkomen kunigen zu Beheim vnd der Cronen desselben kungreichs williclichen vffgelazen vnd ufge
ben die nachgeschriben Sechs festen Twnenburg Burg vnd Stat Vilstein Burg vnd Stat Botkawer vnd Lichtenberg die vnser frei eigen gewesen sein vnd wir nymande(n) iemals ze lehen gangen sint vnd haben die egenan(ten) Sechs festen
mit allen iren zugehorungen wie man die pfligt mit sunderlichen worten nennen von dem egenan(ten) vnsern gnedigen herren als von eime kunige zu Beheim vnd der Cronen desselben kungreichs als wir vnser rechter naturlicher vnd or
denlicher herschaft ze rechtem manlehen genumen vnd empfangen vnd haben im als vnserm rechtem naturlichen ordenlichen herren gehuldet gesworen vnd gelobt hulden globen vnd sweren in guten trüwen on geuerde das wir wir vns
vnser erben vnd nachkomen ewiclich dem egenan(ten) vnsern gnedigen herren seinen erben vnd nachkomen kunigen ze Beheim vnd der Cronen desselben kungreichs von wegen der egenan(ten) Sechs festen vnd was darzu gehort als von
rechtem manlehen getrow holt vnd ouch vndertenig sein wollen vnd sullen ewiclich vnd iren frumen werben vnd iren schaden wenden vnd alles das gein in tun getrewlich vnd vngeuerlich das lehenman des kungreichs ze Be
heim die in dewtschen rechte siczen von manlehens wegen gein irer herschaft ze tun pflichtig seint durch recht odir gewonheit bi dem eide den wir darubir zu den heiligen leiphaftiglich gesworen haben Ouch globen wir in guten
trewen on geuerde vnd bi dem egenan(ten) vnsern eide fur vns vnd vnser Erben vnd nachkomen ewiclich das wir die egenan(ten) vesten vnd ir zugehorunge als oft das not geschiet vnd ze sulchen schulden kumpt nach lehenrechte
von eimem yeglichen kunige ze Beheim ze rechtem manlehen von newens empfahen wollen vnd sullen vnd dem selben kunige ze Beheim welchir in ziten wirdet von newens hulden globen vnd sweren in aller der mazze als do
vor begriffen ist Vnd sullen ouch die egenan(ten) Sechs vesten vnser egenan(ten) herschaft mit namen vnsirn herren dem keiser als eime kunige ze Beheim seinen Erben vnd nachkomen kunigen ze Beheim die in ziten werden vnd
iren houptleuten vnd Ampleuten ewiclich offen sein ze allen iren notdurften als oft sich das geburt widir allirmenniglich nymand auzgenomen an geuerde Nur alleine wider das heilige Romische Reich Wan vnser
egenan(ter) herre das meynet das wir lehenleuten des heiligen Reichs mug(en) vnd ere mit trewen werben sullen Ouch globen wir vor vns vnd vnser erben vnd nachkomen ewiclich das wir dem egenan(ten) vnsern herren dem keiser
als einem kunige ze Beheim seinen erben vnd nachkomen kunigen ze Beheim vnser herren ewiclich mit funfzig mannen mit helmen dienen wollen vnd sullen einis in yelichem Jare wider allermenniglich vnd wo hin das
not wirdet an wider das heilige Romische Reich das vnser egenan(ter) herre vnd ouch wir allewege auznemen als ouch do vor begriffen ist vnd den dienst sullen wir tun wann des vnsern herren den kunigen zu Beheim not wir
det also bescheidenlich das sie vns ir meynuge einen ganzen manden vor kunden sullen ee wann wir vns in den dienst erheben uf die rede das wir vns zu sulchen sachen deste nuczlicher vnd erlicher gerichten mugen Wer
ouch sache das vnser herren die kunige zu Beheim des selben vnsirs dienstes einis in dem Jare vo(n) den egenan(ten) Sechs vesten die wir in zu lehen ruren odir aus ir einteil bedurfen wurden So globen vnd sullen wir den selben
dienst dor aus tun uf vnser selbis kost einen ganzen manden Wolden abir vnser herren di kunige ze Beheim nach dem egenan(ten) manden vnsers dienstes witir bedurfen aus den egenan(ten) vesten den sullen vnd wollen wir in
tun als vnsern rechten herren also das sy vns mit kost besorgen sullen Ouch sullen sie vns vnsern schaden den wir in sulchem irem dienste redlich empfahen genediclich richten vnd gelden In sulcher bescheidenheit wer das sa
che das wir vnser erben vnd nachkomen Grauen ze Wirtenberg in der egenan(ten) vnser herren kunige zu Beheim dienst schaden nemen mit den funfzig mannen mit helmen als do vor begriffen ist So sullen vnsere herren
eines kuniges zu Beheim houptman da dinne von seinen wegen uf dem velde wirdet vnd vnser houptman mit im denselben schaden uf ir eide die sie daruber sweren sullen in guten trewen an alles geuerde schaczen vnd den
selbn schaden sullen vns vns herren kunige zu Beheim in zeiten genuzlich vnd genediclich richten vnd alle die weile als das nicht geschiet So sullen wir vnser erben vnd nachkomen Grauen zu Wirtenberg vmb den dienst
der funfzig man mit helmen nicht gemanet werden vnd des nicht schuldig sein zu tun vnz an die zeit das wir sulches schadens nach der egenan(ten) houptleute schaczunge genzlich gerichtet werden also das allewege
die egenan(ten) manschafft huldunge glubde vnd eide an iren krefften bleiben Ouch mugen vnser egenan(ten) herren di kunige zu Beheim vf die egenan(ten) Sechs vesten die wir in zu lehen ruren odir vf ir einteil wie sie des ze
rate werden ire leute senden in welchir sterke odir zal sie wollen vf ire eigene kost vnschedlich vns den egenan(ten) Grauen Ebirhart vnd Vlrich vnsern Erben vnd nachkomen an vesten vnd an gute als verre als man an geuerde
sulchen schaden vermeiden mag Wer abir das die egenan(ten) vnser gnedigen herren kunige zu Beheim vnser odir vnser erben dienstes fur den wald odir anders wo hin wo das were bedurffen wurden vnd sie vns odir vnser
erben des ermanten einen manden vor So sullen wir von dem tage als wir aufzihen vierzehen tage nach ein ander zu zeiten vf vnser eigen kost dienen Bedurffen abir die egenan(ten) vnser herren die kunige zu Beheim furbaz
vnsers dienstes So sullen vnd wollen wir in dienen vnd sullen sie vns kost geben vnd allewegen redelichen schaden richten als do vor begriffen ist also bescheidenlich das alleweg die egenan(ten) lehen manschafft glubde huldunge
vnd eide die wir dem egenan(ten) vnsir herren dem keiser als eime kunige zu Beheim seinen erben vnd nachkomen kunigen zu Beheim dem kungreich vnd der Cronen zu Beheim getan haben genzlich in iren krefte(n) bleiben vnd uf
die rede das alle die obgenan(ten) ding vnsern herren den kunigen zu Beheim dem kungreich vnd der Cronen daselbst zu sicherheit in ewigen gedechtnisse bleiben So haben wir gebeten die Erwirdigen veter in got hern Johansen
Byschoff zu dem leuthmischel des egenan(ten) vnsers herren Canceler hern Gerharten zu Speyer hern Albrechten zu Wirzburg hern Bertolten zu Eysteten hern Paulen zu freisingen die Byschoue vnd die hochgebornen fursten
hern Otten marggrauen zu Brandenbu(r)g hern Edalbert herzogen zu Brunswig hern Euerharten Burggrauen zu meideburg hern friderichen Burggrauen zu Nurenberg hern Vlrichen vnd hern Johansen lantgra
uen zu dem luttemberg vnd hern Vlrichen Graen zu helfenstein das sie ire Infigel geruchen bi die vnsern an disen brieff zu hengen zu gezeugnisse alle der egenan(ten) sachen Vnd wir Johannes von gots gnaden Byschoff
zu dem leuthmischel des egenan(ten) vnsers herren des Romischen keisers Canceler vnd wir Gerhart zu Spyer Albrich zu Wirzburg Bertolt zu Eysteten Pauel zu freisingen der kirchen Byschoue von den selben gots gnaden
vnd wir Otte marggraue zu Brandenburg Edalber herzog zu Brunswig Euerhart Burggraue zu meideburg friderich Burggraue zu nurenberg auch von gots gnaden Vnd wir Vlrich vnd Johans lantgrauen zu
dem luttemberg vnd Vlrich Graue zu helfenstein die obgenan(ten) bekennen vnd tun kunt offenlich an disem brieff das alle die obgenan(ten) manschafft eide huldunge verpflichtigunge der dienste sich also ergangen haben
vnd also geschehen sein als dorin geschriben stet vnd das wir durch sunderliche fruntliche bete der egenan(ten) Edlen herren hern Ebirharts vnd hern Vlrichs Grauen zu Wirtenberg zu ewigen gedechtnisse haben ouch vnser Insi
gel an disen brieff gehangen an vrkund diz briefes vsigelt mit vnser aller Infigel der Gebn ist zu Nurenberg nach cristus geburt Dreizehenhundert Jare dornach in dem Ein vnd Sechzigsten Jare des nesten freitags
nach sant Andreas tag des heiligen Cwelfpoten -.-