Wir Eburhart von gots genaden Graue zu Wertheim Bekennen vnd tun kunt offenlich mit disem brieff allen den die in sehen oder horen lesen Wann der allerdurchleuchtigste furst
vnd herre herr Karl Romischer keiser zu allen zeiten Merer des Reichs vnd kunig zu Beheim vnser lieber gnediger herre durch angebone seine gute vns vnser erben vnd nachkomen
Grauen zu Wertheim in seinen seiner erben vnd nachkomen kungen zu Beheim der Cronen vnd des kungreichs zu Beheim besundern schirm vnd genade enpfangen hat vnd meinet
vnd wil vns zu vnsern rechten wider allermeniglich genediclich vteidingen vnd isprechen Darumb mit wolbedachtem mute vnd gutem rate vnser freunde vnd getruen vnd mit rechter wiz
zen sein wir desselben vnsers herren des keisers als eins kungs zu Beheim seiner erben vnd nachkomen kungen zu Beheim vnd der Cronen vnd des kungreichs zu Beheim erblich man worden
vnd haben im als einem kunge zu Beheim seinen erben vnd nachkomen kungen zu Beheim der Cronen vnd dem kungreich zu Beheim die eigenschafft der Burge vnd der Stat zu Wertheim des
dorffs zu dem heiligen Creuz vber meun mit der vrfar vnd der Brucke ob der meun ab sie gemachet wirdet vnd mit den vesten ab theine bei der Stat vnd der Burge zu Wertheim oder bei dem
dorfe zu dem heiligen Creuz oder bei der vrfar des meuns vnd wen zu gehorungen gebawet vnd gemachet wirdet oder ob die Burg oder die Stat geweitert wirdet oder das dorff gebessert wirdet
mit allen rechten herschafften eigenschafften ackern wizen wazzern bergen grunden fischten eren gulten nuzzen nichtes vzgenomen wie man das mit sundern worten benennen mag vnd was
zu dem allen gehort reicht vnd sleht vfgelazzen vnd haben darnach die egenant Burg vnd Stat zu Wertheim das egenant dorff zu dem heiligen Creuz mit der egenant vrfar vnd der Brucke
vnd die egenant newen vesten wo sie gebawet wurden in aller der mazze als davor begriffen ist vnd alle zu gehorunge wir in als einem kunge zu Beheim seinen erben vnd nachkomen kun
gen zu Beheim der Cronen vnd dem kungreich zu Beheim zu rechtem manlehen enpfangen als wir vnsern rechten ordenlicher vnd naturlicher herschafft vzgenomen andern vnsern vesten
dorffern vnd guten die in der marchen der Burg vnd der Stat zu Wertheim des dorffes zu dem heiligen Creuz der vrfar vnd der Bruck nicht gelegen sint vnd ouch vzgenomen solichen zol
len geleiten vnd munzen die wir von dem Reich herbracht haben oder die wir von des Reichs genaden nach gewunnen mochten vnd des haben wir im als einem kunge zu Beheim seinen
erben vnd nachkomen kungen zu Beheim der Cronen vnd dem kungreich zu Beheim drowen vnd dinste gehuldert gelobet vnd gesworen hulden globen vnd sweren in guten truwen on geuerde
getruw gehorsam vnd ouch vnderenig zusein als vnser rechter ordenlicher naturlicher herschafft ewiclich zu vndersten wen schaden zu werben wen fromen vnd alles das gen in zutun
das erblicke man des kunreichs zu Beheim die in deutsches recht sizzen von manlehens wegen durch recht vnd gewonheit zutun pflichtig sein Es sullen ouch die vorgenant Burg vnd Stat
zu Wertheim Bruck vnd dorff vnd ouch die newen vesten ob sie da gemachet werden oder ob die Burg oder die Stat zu Wertheim gebreitet wurden oder das dorff gebessert wirdet dem egenant
vnserm herren als einem kunge zu Beheim seinen erben vnd nachkomen kungen zu Beheim vnd iren Amptleuten den sie das kuntlich beuelhen zu allen zeiten vnd zu allen iren notdurf
ten ewiclichen offen sein das sie sich darus vnd drin wider allermeniglich behelfen mugen vnschedlich vns vnd den vnsern als verr man sulichen schaden vermeiden mag on geuerd Wer
ouch das die egenant vnser herschafft kunge zu Beheim oder ire Amptleute ir volk in die egenant Burg Stat vnd vesten die nu sint oder nach gemachet werden schickete oder legete vnd darus
zu kriegen meinten wen das ouch angienge So sullen sie ir eigen kost da trugen alleweg vns vnd den vnsern vnschedlich als verr man sulichen schaden an geuerd vmeiden mag als do
vor begriffen ist Vnd des zu ewigen gedechtnizze haben wir gebeten die Erwirdigen veter in got vnd herren hern Arnesten Erczbischoff zu Prage hern Johansen zu dem Leuchtnmischel
des obgenant vnsers herren des keisers Canceller hern paulen zu freisingen hern Bertolden zu Eysteten die Bischoue Vnd die hochgebornen fursten vnd herren hern Otten margra
uen zu Brandemburg hern Bolken herzogen von Slezien vnd herr zu der Swidnicz vnd zum Jawar hern Wulblein herzogen von Brunswig vnd die Edlen herren hern fridrichen Burg
grauen zu Nurenberg hern Johansen Lantgrauen zu dem Luctemberge vnd hern Vlrichen herren zu Hanow das sie ire Insigel geruchen bei das vnser an disen brieff zuhengen zu ge
zeugnizze aller der egenant sachen Vnd wir Arnest Erczbischoff zu Prage Johans zu dem Luthmischel des egenant vnsers herren des keisers Canceller Paul zu freisingen Bertold zu
Eysteten der kirchen Bischoue von gots genaden Vnd wir Otte margraue zu Brandemburg Bolke herzog von Slezien vnd herr zu der Swidnicz vnd zum Jawar Wulbker herzog von Bruns
wig friderich Burggraue zu Nurenberg Johans Lantgraue zu dem Lutemberge vnd Vlrich herre zu Hanow die obgenant Bekennen vnd tun kunt offenlich an disem briefe das alle die
vorgenant manschafft eide huldunge vnd gelubde sich also ergangen haben vnd also geschehen sein als davor geschriben stet vnd das wir durch sunderliche fruntschaft bete des egenant Ebur
harten des Eburharts Grauen zu Wertheim zu ewigen gedechtnizze haben ouch vnser Insigel an disen brieff gehangen Mit vrkund dis brieffs versigelt mit vnser aller Insigel Der geben
ist zu Nurenberg Nach Cristus geburt dreyzehenhundert Jar darnach in dem Zwey vnd Sechzigstem Jare des nesten dynstags vor dem Oberstem tage