Wir Walther vnd Rudolff gebruder von Ransberg veriehen vnd tun kunt offenlich mit disem brieffe allen den
die in sehen oder horent lesen wenne wir vnse vesten Wildenstein vnd Tierstein die vnser frey veterlich eigen
gewesen sein von dem allerdurchtigsten fursten vnd herren hrn Karle Romischem keiser zu allen czeiten merer des
Reichs vnd kunge ze Beheim vnserm gnedigen herren als von eime Romischen keiser zu rechtem lehen empfangn
vnd genomen haben vnd er vns mit denselben vnsern vesten in sein vnd des Reichs schutzung vnd schirm gne
diclich empfangen hat darumb so geloben wir dem egenanten vnsm gnedigen herren als eim Romischen keiser
vnd seinen nachkomen an dem Reiche mit den egen(anten) vnsn vesten zu dienen vnd zugewarten getrewlich vnd
gewerlich iren vnd des Reichs schaden zu wenden iren fromen zuwerbn on alle geuerde vnd argelist vnd allez
daz ze tun daz rechte lehenleute kegen ire rechten naturlichen ordenlichen herschafft ze tun pflichtig sein
also daz die egenanten vnse vesten ire vnd des Reichs offne vesten sein sullen zu aller not kegen aller meni
clich czu vrkund diz briefs versigelt mit vnser beider Jnsigel der gebn ist zu Prage nach Cristus ge
burt drewczenhund(er)t Jar dornach in dem czwei vnd sechczigsten Jar an dem nehsten Sunabent nach vns(er)
vrowen tage als sie geboren wart