Ich Johans Tycker dez Durchleuchtigen fursten herren Rudolfs etwenn hertzogen in Beyren d(ie)n(er) /
Bekenne offenlich an disem brief allen den di in sehen oder horen lesen Wann der allerdurchleuchtigest
furste / mein genediger h(er)re her Karl Romischer kayser und kunig ze Beheim fur mich bezalt hat / dem
edelen manne herren Czenken etwenn h(er)rn Smyls von Lypchen sun und seinen frunden / funfhundert
schok grozzer pfenning / an dem kauffe der vesten zu Krotow / und irer zugehorung di ich / und er in
meinem namen gekaufet haben umb den selben h(er)rn Czenken Dar umb gelob ich mit guten trewen an ge/
uerde / dem selben meinem h(er)ren dem kayser / wider zegeben und gelten di selben funfhundert schok grozzer /
hie zwischen / und sand Gorgen tag / der nu schirest kumpet tend tete ich aber dez nicht / So sol der mark(t)
und daz stetelin zu dem Lu / daz mein pfand ist / von dem selben meinem h(er)ren dem kayser / im ledig
und loz sein allerding / Und sol ich / und mein hausfrawe / im / danne die brief di wir dar uber haben
oder hie zwischen und dez vorgenan(ten) sand Gorgen tag / hetten genomen / alle widergeben / mit urkund
diz briues / versigelt mit meinem Insigel / daz dar an hanget / Der geben ist ze Prag / do man zalt
von Cristus geburt Dreutzehenhundert Jar und dar nach in dem dreu und sechtzigsten Jar / an
aller sele tag :: -