Karl von gotes gnaden Romischer keyser zu allen zeiten merer des Reichs. Wir Wenczla auch von gotes gnaden kunig ze Beheim vnd marggraf ze Brandemburg des ieczt genanten vnsers lieben
herren vnd vaters sun. Wir auch von gotes gnaden Johans von Beheim vnd von polen marggraf ze merhern desselben vnsers herren des keysers bruder. fur vns vnd fur alle vnser erben an dem ainen tail. vnd wir
Ludwig von gotes gnaden kunig ze vngern. vnd wir Rudolf Albrecht vnd Leupolt auch von gotes gnaden Herczogen ze Osterreich ze Steyr vnd ze kernden herren ze krain auf der windisch march
vnd ze portenaw Grafen ze Habspurg ze tyrol ze phirt vnd ze kyburg marggrafen ze Burgow vnd Lantgrafen in elsassen fur vns vnd fur alle vnser erben an dem andern tail. bekennen offenlich
mit disem brief allen den die in sehent lesent oder horent lesen. Daz wir auf ietwederm tail nach gutem rat vnserer freunt
mit rater vnser getriwen gaistlichen vnd werltlichen fursten vnd lantsherren die vnsers gesweyn rates sein durch fridung vnd suene der durchleuchtigen hochgeborn erben vnd fursten frawen von Beheim vnsers des
vorgenanten keysers kaiserin wirtin vnd vnser des genanten herczog Rudolfs von Osterreich elich swester auf den spruch den vormals die hochgeborn fursten her Casimir ze polen vnd herczog Bolko von der swydnicz
zwischen vns getan hant vns liebleichlichen mit einander vns vnd alle vnser freunt helfer vnd diener vertragen versuent vnd geainet hant freuntlich vnd gutlich als ob iecz enichtes kriegs vnd veints
wirtichait die fur vnsers enden mit worten werken vnd gelauben vns vnder einander auf disen hewtigen tag gehabt haben. vnd sullen auch genzlich ab sein alle die anspruch vnd vordrung die vnser
Ietweder tail zu dem andern vmb seine land leute oder gut ewa auf dise kegenwirtige zeit vnsers krieges gehabt hat. Darumb ze vester sicherhait ewigs vnd guten freuntschaft desselben freuntschaft vns seine
haben wir auf baiden tailen einander gelobt vnd sweren mit vnsern aiden vnd mit den worten vnser furstlichen wirdichait vnd haben auch darumb gesworn leiblich aide zu den hailigen mit angerurten henden
auf das hailige ewangelij vnd auf das holcz des hailigen chreuczes daz Ietweder tail krieglich oder vnder sinem willen nicht des andern landen noch leuten fursten diener noch helfer schaden anfechten noch vertreiben
nicht an die er nu hat vnd besiczt oder hernach gewinnet wie die gelegen oder wie die genant sint oder werden zu vnserm goten pryn gestellen noch in dar an bekrencken sturen oder beschedigen sich in dhainem
kriege vnd auch niemands raten helfen noch gestatten haimlich noch offenlich der in dar an in dhain weis besweren irren oder phlenczen wolte in alle geverde vnd arglist. vnd darumb ze ainem vesten offen ewigen
urkunt haben wir die vorgenanten keyser karl von Beheim kunig Ludwig von vngern kunig Wenczla von Beheim marggraf Johans von merhern Rudolf Albrecht vnd Leupolt herczogen ze Osterreich
vnser Ingesigel gehenkt an disen brief. Der geben ist ze prunne nach crists geburt dreuczehen hundert Iar vnd darnach in dem vier vnd sechczigistem Iare auf sant scolasitice tag des hailigen Iunckfrawen
vnsers keysertums in dem achczehenden vnd des kaisertums in dem newnden Iare.