Wir die Rachte vnd die Burger gemeinlich der Stat zu Luckaw Bekennen uffimlich an disem briue das tun kunt allin luten die yn sehen adir horen
lesin wan die hochgeborn fursten vnd hren her ludewig der romer vnd her otte gebrude Marggrafen zu Brandemburg vnser liebn gnedigen hren
mit wolbedachtem mute mit rechter wizzen vnd mit rate irer getruwen bideramen dem allerdurchluchtigistem fursten vnd hren hern karlin ro
mischem keiser zu allin zeiten merer des Reichs vnd kunige zu Beheim als eime kunige zu Beheim sinen erbn vnd nochkomen kunigen vnd der cro
nen des kunigrichs zu Beheim vns vnd die Marggraffschaft zu lusicz mit steten dorfern marktflecken lehenen renten nuzen gewellen gultin
zehenden welden Buschen velden weiden heiden hofen ackern tzinsin wazzerin wazzerleufen echen vischerey vorlopenden zwingen gerichten herschaf
ten vnd waz anders darzu gehoret wie man daz mit sunderlichin worten mag benennen vmb eyn vnd zwenzig tusent Marg lotiges silbers Erfur
ter gewichtes vnd Eylff tusent achte breiter groschen prager muncz verkouft habin zu widerkoufe vmb die egen(anten) summe gelts vnd vnser egen(anten) hren die
Marggrafen vns an vnsin hren den keiser als an einen kunig zu Beheim an sine erbn vnd nochkomen kunige vnd an die cronen des kunigrichs zu
Beheim gewiset habin dauon han wir mit wolbedachtem mute mit rechter wizzen mit vnsin frien willin vnbetwungen von geheize vnd von gelobte
vnser obgen(anten) hren der Marggrafen von Brandemburg vnsin vorgen(anten) hren dem keiser als eime kunige zu Beheim von sinen siner erbn vnd nochkome
kunige vnd der cronen des kunigrichs zu Beheim wegen in guten truwen gelobet gehuldit vnd swerlich mit ufgerackin henden zuden heiligen geswore
daz wir dem hochgeborn fursten h(er)n Bolken herczogen zu slesien vnd herren zu der swidnicz vnsin liebn hren sime lebctage von willin vnd geheize
vnsis egen(anten) hren des keisers als eins kuniges zu Beheim gehorsam vndertanig sin vnd wartin sullin in allin sachin als vnsin rechten erblichin naturlichen
hren vnd noch sime tode sollin vnd wollin wir dem egen(anten) vnsin hren dem keiser als eime kunige zu Beheim den vorgen(anten) sinen erbn vnd nochkomen
vnd der cronen des kunigrichs zu Beheim eweclich wartin gehorsam holt getruwe vndertanig sin ir bestes werbin iren schaden warnen vnd alle
ander sache tun als wir vnsin rechten erblichin vnd naturlichen herren schuldig vnd pflichtig sin zutun als lange bis vnser vorgen(anten) herren die Mar
grafen zu Brandemburg vnd ire erbn von yrme libe manes geslechtes vns vnd die Marggraffschaft zu lusicz mit yren egen(anten) zugehorungen von
vnserm hren dem keiser als von eime kunige zu Beheim sinen erbn vnd nochkomen kunigen vnd von der cronen des kunigrichs zu Beheim vmb die
egen(anten) summe gelts genglich widerkoufen vnd sullin wir der egen(anten) huldunge globte vnd eide nimmer ledig sin noch ledig werdin mogen vnser egen(anten) hre der
keiser als ein kunig zu Beheim sine erbn adir nochkomen kunige zu Beheim sagin vns dan von usser der egen(anten) huldunge globte vnd eide mut
lich ledig vnd los vnd verczigen uff vns mit yrem guten frien willin vnd aller dieser sache zu vrkund vnd stediger warheit han wir vnser stat
Jngesigel an diesen briff gehangen der gebin ist zu Luckaw noch crists geburt druzenhundirt Jar darnach in dem vier vnd sechczigisten Jare an sant
Martins tag des heiligen Bisschofs